Kom luister saam!
Robyn van de Rhede en Menán van Heerden voer onderhoude met mense wat passievol is oor hul taal.
Afrikaans en Afrikaaps leef en beef op teaterverhoë, in die woordkuns van rymkletsers en digters, tydens vurige debatte by feeste ... en die lys hou nie op nie!
Die vierde gas op die maandelikse Lekker LitNet-insetsel op Radio 786 is bekroonde teater-praktisyn en voormalige Die Burger-joernalis, Herschelle Benjamin.
Herschelle het in 2018 ’n internskap onder Die Burger se kunsredaksie voltooi.
Hy is vanjaar by die Woordfees met die Beste Opkomende Kunstenaar-prys vir sy drama, In Slavenhuis 39 (onder regie van Philip Rademeyer), bekroon. Hierdie produksie is onlangs by die Kunstekaap opgevoer.
Herschelle was ook onlangs ’n tutor by ’n teater-somerskool by die Universiteit van Edinburgh.
Hy het verlede jaar as deel van die Kunstekaap se Nuwe Stemme-program met sy produksie Korreltjie kop klong is my dood as dramaturg gedebuteer. Hierdie toneelstuk was die enigste Afrikaanse toneelstuk wat deel gevorm het van die Nuwe Stemme-program.
Luister meer hier:
*Luister ook na die maandelikse #litkitsfeit oor Afrikaans aan die einde van elke onderhoud*
By die Radio 786-ateljee in Athlone, Kaapstad. Van links: Menán van Heerden, Herschelle Benjamin en Robyn van de Rhede
……………
Waar en wanneer skakel ek maandeliks in?
⇒ Die Lekker LitNet: #litnetisnetlit-insetsel word die eerste Sondag van elke maand uitgesaai tydens die maandelikse program Barakat, aangebied deur die Afrikaanse Taalraad (met Fatima Allie agter die mikrofoon).
⇒ Skakel in op die eerste Sondag van elke maand, 17h00–18h00 (Radio 786 – 100.4fm).
⇒ Luister hier na die lewende-stroom-skakel van Radio 786
……………
Lees ook:
Bekroonde toneelstuk In Slavenhuis 39 nou by die Kunstekaap te sien
Luister na die ander insetsels:
Luister na ons eerste gas, Universiteit Kaapstad-student Riyaadh Lawrence. Ons gesels met Riyaadh oor sy LitNet-gedig “Van Diep Rivie’ na Mennenberg”; sy passie en liefde vir Afrikaaps; en die taal as lewenskragtige skryftaal:
Ons tweede gas is bekroonde teater-praktisyn en toegepaste teater-fasiliteerder Chenal Kock. Chenal vertel onder andere meer oor haar Afrikaaps teater-produksie, Mama (regisseur: Jeremeo Le Cordeur), haar werk met leerders van verskillende gemeenskappe dmv toegepaste teater en haar kunstenaarsverblyf in Liverpool, Engeland, as Kunstekaap-verteenwoordiger:
Ons derde gas is bekroonde teater-praktisyn Jeremeo Le Cordeur. Jeremeo vertel onder andere meer oor sy Suidoosterfees-toekenning (Nasionale Afrikaanse Teater-inisiatief, oftewel NATi se Rising Star-toekenning); sy toneelstukke Jerry, an unconventional hero en Dude, wa’s my bakkie?; sy kunstenaarsverblyf in Liverpool, Engeland as Kunstekaap-verteenwoordiger; sy deelname aan die Baxter-teater se musiek-meesterklasse aangebied deur David Kramer; asook sy toneelstukfotografie en webtuiste, Vulture Productions.
Ons vyfde gas is Romario Fabiano Cloete, ’n honneursstudent aan die Universiteit van Wes-Kaapland. Romario gesels oor Namakwalandse Afrikaans. Lees ook Romario se LitNet-artikel: “Van plat tot volrond en rondborstig in my taal”.
Ons sesde gas is Mercy Kannemeyer. Mercy gesels oor haar gunsteling Afrikaanse woord, haar nuutste projekte en die toekoms van Afrikaans.
Ons sewende gas is Teneal Apollis, ’n MA-student aan die Universiteit van die Wes-Kaap. Ons gesels met Teneal oor haar navorsing oor Afrikaanse digters, haar studie-uitruil in Nederland, Overbergse Afrikaans en haar gunsteling- Afrikaanse herinneringe.
Ons agtste gas is Tasneem Daniels (dramaturg en onderwyser). Tasneem skryf in Maleis-Afrikaaps en wil die Kaap inspireer om “tramakassie” (Maleis vir “dankie”) weer terug te bring.
Ons gesels met Tasneem oor haar dramaproduksie Miela’s box. (Let asseblief daarop dat hierdie onderhoud voor die grendeltyd opgeneem is.)
Hierdie Suidoosterfees-toneelstuk is onlangs op Radio 786 as radiodrama uitgesaai as deel van die Kunstekaap se 2020-New Voices-program, in samewerking met die Suidoosterfees, die Nasionale Afrikaanse Teater-inisiatief (NATi) en die Jakes Gerwel-stigting.