Riette Rust
Riette Rust is in die Paarl gebore en het aan die Hoër Meisieskool gematrikuleer. Daarna het sy drama en tale aan die Universiteit Stellenbosch gestudeer en tussenin vir die koshuisblad en Die Matie geskryf.
Ná universiteit het sy vir KWV in die Paarl as skakelbeampte gewerk, verskeie wynkursusse geloop en later self dié kursusse landwyd aangebied. Hierna is sy as redakteur van KWV se personeelblad, Parskuip, aangestel. Terselfdertyd het sy ’n paar kort kursusse in bedryfsjoernalistiek voltooi. Parskuip is verskeie kere bekroon.
Riette was daarna vir onder meer Sarie ’n vryskutskrywer. Haar artikels is met ’n Media24-merieteprys, twee ATKV-Mediaveertjies, asook ’n Citadel-prys vir finansiële joernalistiek bekroon.
Riette is tans ’n boekresensent vir LitNet, Fine Music Radio, Rapport en Die Burger. In 2016 het sy die kortlys van die kykNET-Rapportpryse, die grootste boekpryse in Afrikaans, gehaal met haar resensie “Warm en wild, maar nie vir almal” (oor Jan van Staden se Boer kry ’n vrou in By, Die Burger, 6 Junie 2015).
Haar vyfde boek, Ek! Ek! Ek! Herken en hanteer narsiste (LAPA, 2016), was die eerste Suid-Afrikaanse en Afrikaanse boek oor dié onderwerp. In 2016 was dit vir ’n hele paar weke onder die top 10 Afrikaanse boeke. Ek! Ek! Ek! is verlede jaar (2017) as een van die top Afrikaanse verkopers van die jaar (onder fiksie én niefiksie) aangewys.
Vlees en bloed, met sy vertaling, Flesh and blood, is in Februarie 2016 uitgegee, ook deur LAPA. Dit handel oor twee (ware) susters wat misdaadtonele skoonmaak en is ’n opvolg van Ilse Salzwedel se Bloedsusters.
Haar Die Aa tot Oe van seks (Tafelberg, 2013) was die eerste volwaardige seksgids in Afrikaans. Dit was volgens Nielsen-syfers die agtste beste verkoper van daardie jaar, onder fiksie én niefiksie. Van die woorde daarin, waarvan sy sommige self geskep het, is in die WAT (Woordeboek van die Afrikaanse Taal) opgeneem.
Riette het ook ’n kortverhaalbundel, ’n Lyf onthou (Protea, 2012), gepubliseer. Haar eerste boek was Lang bene & Lipstiek – Gebruik jou seksualiteit en behaal sukses (Naledi, 2011).
Dié skrywer het haar eerste TV-draaiboek oor wyn geskryf en dit self op kykNET aangebied. Haar tweede draaiboek is as Bloedsusters op Via uitgesaai. Sy verskyn gereeld op TV en neem aan regstreekse radio-onderhoude deel, onder meer oor die onderwerpe wat sy vir vryskutartikels navors.
Riette is ’n lid van die gesogte SA Brandewyngilde, wat haar vir haar joernalistieke bydrae tot die brandewynbedryf vereer het.
Sy studeer tans sielkunde deur Unisa.
Die lirieke van haar eerste liedjie, “Waar bly jy?”, is op die sanger Willie Strauss se album Seisoene opgeneem.
Haar liefdes sluit in lees (sy het ’n uitgebreide boekversameling), musiek (veral jazz), toneel, kunsflieks, bak, asook goeie kos en wyn. Sy hou van avontuur en het al valskerm gespring (solo!), ’n skubaduikpoging aangewend, self ’n helikopter gestuur en saam met die bulle in Pamplona gehardloop.
Sy woon in ’n noordelike voorstad van Kaapstad. Sy en haar oorlede man, JD, het twee dogters. Zahn (32) het ’n meestersgraad in kuns, is ’n bloemiste met haar eie besigheid in Kaapstad en beoefen ná ure kuns. Cara (26) het ’n dramagraad en werk vir ’n maatskappy wat video’s vervaardig – ook in Kaapstad.
Merk deur Rudie van Rensburg: ’n resensie
2020-10-08"Merk is hoogs toeganklike leesstof. Dis trouens een van die boeiendste ervarings wat jy in ’n lang tyd sal hê."
Resensie: Klaskamer deur Vita du Preez
2020-01-24"Vita du Preez verdien lof vir haar waagmoed om die BDSM-tema (in Afrikaans) te takel. As die Fifty Shades-reeks wel vir jou boeiend was, skaf gerus Klaskamer aan."
NouNet-mening: Drink en bestuur – "Mamma wag nie vir my nie"
2019-09-26"’n Nuwe perspektief oor drink en bestuur is nodiger as ooit. En dit sluit nie padblokkades en blou ligte in nie."
Boekresensie: Liefde agter tralies deur Carla van der Spuy
2019-09-26"Die gevangenes en hul metgeselle buite die tronk vertel hul verhaal in ’n eiesoortige stem. Dis asof karakters in ’n roman aan die woord is."
Seks, leuens en die internet deur Erla-Mari Diedericks: ’n resensie
2019-09-14"Die memoire behoort byval te vind by almal wat hul horisonne wil verbreed. Vroue, veral dié met lewenservaring, sal met Diedericks kan identifiseer. Mans kan meer oor die alfavrou uitvind."
Om tot verhaal te kom – Verwerk trauma en verlies deur skryfterapie deur Lizette Rabe: ’n resensie
2019-05-02"Hierdie skryfgids beantwoord vrae soos: Hoekom skryf? Kan jy jouself 'gesond' skryf? Die 21 hoofstukke bevat basiese skryfwenke (soos 'vermy byvoeglike naamwoorde en clichés'). Jy lees ook hoe belangrik dit is om net te begin."
Sondag deur Irma Venter: ’n FMR-resensie
2019-04-16"Jy hoef nie voorheen ’n Venter-roman te gelees het nie; Sondag is ’n verhaal wat op sy eie sin maak. Dis trouens ’n boeiende blitsblaaier wat ek heelhartig aanbeveel."
Boodskapper van die gode – Fabels en fantasieë van ’n vlieg teen die muur deur Murray La Vita: ’n resensie
2019-04-12"Sommige van die skrywer se ervaringe en waarnemings is so verstommend, dis asof die gode wél ingegryp het. Die bundeltitel verwys juis na Hermes, die boodskapper van die gode. Ook na ’n soort tikmasjien wat ’n skrywer soos Etienne Leroux gebruik het. En kyk net watter woorde het hý teweeggebring!"
Kainsmerk deur Annelie Botes: ’n resensie
2019-03-09"Nes die karakters, sal die meeste lesers van die broeiende verhale in Kainsmerk in hul menswees groei."
Aankoms en vertrek deur Pat Stamatélos: ’n resensie
2019-01-15"Hoewel Aankoms en vertrek nie dieselfde oemf as Stamatélos se vorige romans het nie, is dit wel die lees werd. Buiten die geloofwaardigheid van die karakters, verras die wendings en ontmoet die verskillende verhaalelemente mekaar op ’n besonderse wyse."
Sielskos – Stories oor verlange en hoop deur Koos van der Merwe: ’n resensie
2018-11-24"Sielskos sluit verhale oor bekende mense in. Die pad wat die sanger Elvis Blue gestap het, inspireer, terwyl die rubriek oor die aktrise Wilna Snyman pleinweg mooi is."
Van kant gemaak deur Kris van Steenberge: ’n FMR-resensie
2018-08-30"Indien jy nog nie ’n leser van Nederlandse letterkunde is nie, sal hierdie roman jou waarskynlik inspireer om meer hieroor uit te vind. Van kant gemaak is Van Steenberge se eerste roman. Wat ’n meesterstuk is dit nie!"
Tweespoor deur Helena Gunter: ’n resensie
2018-07-25"Gunter se werk is toeganklik, maar daag die leser terselfdertyd uit. Dis ’n skop teen die kop wat jou dwing om anders kyk."
Waarom mans altyd reg is (en ander onnoselhede) deur André le Roux: ’n resensie
2018-04-18"As jy met ’n glimlag wil gaan slaap en ook so wil opstaan, geniet elke aand een of twee rubrieke. Jy sal ná die lees van Waarom mans altyd reg is (en ander onnoselhede) jou lewensmaat, man óf vrou, veel beter verstaan."
Begin ’n lewe van sukses deur Hennie J de Villiers: ’n resensie
2018-02-16"Die inligting in die boek is nie heeltemal nuut of aardskuddend nie, tog het dit waarde, want mens vergeet so maklik die waarhede wat daarin vervat is."