Litnet

Foto: Rhys Abel op Pexels

• Bettina Wyngaard skryf ’n gereelde rubriek vir LitNet.

Beste Vlugtelinge

Heel eerste wil ek julle gerus stel en verseker dat ek die eerste persoon is wat vlugtelinge aanmoedig om hulle veiligheid en hulle gesinne eerste te stel.

Net verlede week het ek gesien hoedat daar ’n massagraf gegrawe word buite Goma in die DRK om die ongeveer 3 000 lyke ná die slagting daar te begrawe. Ek het ook gelees dat honderde vroue verkrag was voor hulle vermoor was. Honderde. Dis reg en dis goed dat enigeen wat dit oorleef het, moet vlug. En as hulle by ons kan uitkom, dan is dit goed en reg dat ons regering hulle inneem. Daar is niks erger as om onveilig in jou eie land te wees en geen ander heenkome te hê nie.

Maar ek het nog niks gesien of gehoor van massagrafte om vermoorde Afrikaners hier by ons te begrawe nie. Die bose linkse media hier in die land steek seker die nuus weg vir ons. Is dit dalk omdat hulle kop in een mus is met die bose ANC-regering? Maar wat dan van AfriForum en Solidariteit en hulle nuusbronne? Hulle sou mos basuin geblaas het dat die berge antwoord gee as daar massamoorde van Afrikaners was. Kan dit wees dat hulle tjoepstil is omdat daar nie massamoorde is nie?

........

Of is dit ’n eenvoudiger geval van dat julle gelykheid met swart en bruin as onderdrukking ervaar en dat dit die ware rede vir die ontevredenheid is?  

........

Of is dit ’n eenvoudiger geval van dat julle gelykheid met swart en bruin as onderdrukking ervaar en dat dit die ware rede vir die ontevredenheid is?  

Maar goed, ek verstaan julle hou nie daarvan dat beweegredes bevraagteken word nie. Dis duidelik dat ’n hele klomp van julle, meer as 44, sedert Vrydag met ’n lied in die hart loop, want julle Daddy Trump  staan op vir julle. Het julle al by Shoprite en Spar gevra hulle moet hulle bokse vir julle hou? Of nee wag, julle kan darem seker, ten spyte van julle onderdrukking, betaal vir ’n maatskappy om julle goedjies te kom pak en versend. Anders as ander vlugtelinge vlug julle nie met net die klere aan julle bas en als wat julle op julle rug kan dra nie. Anders as ander vlugtelinge sal julle toegelaat word om julle huisruim en oupa Sagrys se stinkhouttafel wat ’n familie-erfstuk is en die Familiebybel met almal se doopdatums saam te neem.

Sê gou, het julle mooi gekyk na julle Daddy Trump se bevel? Kyk, hy is ’n eenvoudige man. Hy sê wat hy gaan doen en hy steek nie sy motiewe weg nie. Net ’n dom en/of naïewe mens sien hom nie kom nie. Kyk na die heel laaste paragraaf van sy uitvoerende bevel.

Artikel 5 (c) lui: “This order is not intended to, and does not, create any right or benefit, substantive or procedural ...” Dis legalese vir “Moenie te gou bly raak nie – net omdat ek dit sê beteken dit nie ek gaan iets doen daaromtrent nie.” Dalk skrik dit julle nie af nie, en dis goed so. Was dit ek, sou ek terugflitse gehad het na al die mense wat oor die jare al agtergekom het dat julle Daddy Trump vere voel vir enigeen anders as homself. Sy eie visepresident het hy aan genade uitgelewer toe die Capitol bestorm was. Hoekom sal hy meer vir julle omgee? Hoeveel beloftes het hy al gemaak wat hy nie nakom nie? Maar julle glo hy gaan julle op die hande dra? Mooi man.

Maar terug na die uitvoerende bevel. In artikel 4 belowe hy: “The Secretary of State and the Secretary of Homeland Security shall take appropriate steps, consistent with law, to prioritize humanitarian relief, including admission and resettlement through the United States Refugee Admissions Program, for Afrikaners in South Africa who are victims of unjust racial discrimination.” Dalk het hy vergeet dat hy al op 20 Januarie USRAP, die United States Refugee Admissions Program, opgehef het, en dat dit tans nie in werking is nie en daar geen begroting voor bestaan nie. Maar as julle Daddy Trump iets sê, glo julle mos blindelings, of hoe? Geloof soos ’n mosterdsaad is al wat nodig is, in die Gospel van Trump.

Maar goed, kom ons los nou maar my onnodig tegniese bekommernisse. Julle Daddy Trump gee om vir julle en sal nooit in der ewigheid toelaat dat julle julle gemaklike lewens omverwerp vir die lugkastele wat julle nou al bou nie.

Dalk het die skoenlappers van opgewondenheid nog nie gesak nie, maar dink tog maar aan die implikasies as julle besluit om te vlug.

Het julle al gedink oor hoe julle lewe daar gaan wees? Laat ek raai: Julle het visioene dat elkeen van julle dadelik ’n drieslaapkamerhuis met swembad en huishulp gaan kry die oomblik dat julle daar land. Of dalk word julle sommer ’n plaas in die area van julle keuse toegewys. Dis nou na die parade wat daar op die lughawe vir julle gehou was, met al die mense wat hande klap en julle met trane in die oë verwelkom. Word wakker. Julle sal gaan waarheen hulle julle stuur, bly waar hulle julle laat bly, en doen wat hulle sê julle mag doen. Jy sal gelukkig wees as jy in ’n motelkamer geplaas word en nie in een of ander kamp nie. Anders as met gewone immigrasie, waar jy dalk alreeds ’n werksaanbod het, mag jy nie werk nie. Vir maande, en in sommige gevalle jare. Jy moet dus sorg dat jy genoeg geld het om vir ’n lang tyd in dollars te oorleef. Agtien rand teen die dollar, ingeval jy wonder.

Watse werk gaan jy doen, wonder jy? Mediese personeel en ingenieurs is altyd welkom, maar hoekom as vlugteling gaan as jy in elk geval maar die gewone immigrasieroete kon volg? Ek reken die enigste mense wat as vlugtelinge soontoe wil gaan, is dié wat nie gesogte beroepe het nie. En julle, is ek bevrees, gaan moet werk doen, as julle ooit werk kry, wat julle oor julle dooie liggame nie hier in Suid-Afrika wil doen nie. Kelnerinne in restaurante. Of die skottelgoedwassers. Dalk kan julle op die lande gaan werk om die oeste in te bring. Die Meksikane is mos hoeka almal gedeporteer of het gevlug. As julle in dele van die land is waar hulle nog huishulpe aanhou, dan kan julle seker as bediendes gaan werk. Maar ek moet waarsku, die meeste Amerikaners het nie bediendes nie. Wat ook beteken julle sal maar moet leer om self julle bed op te maak en julle eie huis/paleis/pandok/varkhok skoon te maak.

Hoe gaan julle van punt A na punt B kom? Amerika het nie vreeslik goeie openbare vervoer nie, en die stede is nie regtig uitgelê vir mense wat moet stap nie. Met al die tariefverhogings gaan karre al hoe duurder word om aan te koop, so hoe gaan julle maak om te reis?

........

As julle jonk genoeg is om kinders op skool te hê, dan is daar darem een gerusstelling. Julle hoef nie meer julle hande stomp te baklei oor moedertaalonderrig nie. Julle kinders sal in Engels onderrig word.

........

Gepraat van tariefverhogings, kos gaan ook al duurder word. Vergeet maar van steak eet. En die hele laaste verkiesing het om die prys van eiers gegaan, so dalk moet julle maar dit ook uit julle dieet sny. Dalk moet julle dit in elk geval uit julle dieet sny, want daar is glo vreeslik voëlgriep. Julle sal nie kennis kry van enige uitbrekings nie, want julle Daddy Trump het mos in een van sy ander uitvoerende bevele die gesondheidswaghonde en die landbouwaghonde gemuilband. Hier in die bose Suid-Afrika is daar sekere siektes waaroor die publiek in kennis gestel moet word. Dis nie meer die geval in Amerika nie. Jy kan dus langs iemand met tuberkulose beland, en daar is geen verpligting op enigeen om jou te waarsku nie.

Kom ons praat gou ’n bietjie oor mediese sorg, terwyl ek dit nou noem. Ek weet julle almal bevuil julleself nou oor die nasionale gesondheidsorg wat die bose ANC wil inbring. Baie Amerikaners word bankrot gemaak na ’n mediese intervensie. MedicAid en Medicare is al twee nou in hulle kanon in – nie dat julle as vlugtelinge daarop kon staatmaak nie. As enigiets met julle gesondheid verkeerd gaan, is julle in julle peetjie. En julle is vlugtelinge, onthou. Julle kan nie vinnig terugkom Suid-Afrika toe om julle huisdokter te kom spreek nie.

As julle jonk genoeg is om kinders op skool te hê, dan is daar darem een gerusstelling. Julle hoef nie meer julle hande stomp te baklei oor moedertaalonderrig nie. Julle kinders sal in Engels onderrig word. Julle kan hulle seker tuis onderrig, maar enige gestandaardiseerde toetse sal steeds in Engels wees as julle hulle kwalifikasie erken wil hê. En kort voor lank moet julle maar leer om Engels met julle kleinkinders te praat, want hulle sal nie Afrikaans kan praat nie. Kyk maar wat in Patagonië met die Afrikaners gebeur as julle my nie glo nie.

.........

Hoekom, dink julle, is Steve en Kallie en daai span nie al lankal Amerika toe om hulle heil daar te soek nie? Kom ek help julle.

.........

Hoekom, dink julle, is Steve en Kallie en daai span nie al lankal Amerika toe om hulle heil daar te soek nie? Kom ek help julle. Want hulle weet daar is hulle irrelevant. Daar kan hulle nie geld soos bossies maak uit julle vrese soos wat hulle hier kan doen nie. Hulle sal nooit trek nie. Dit gaan te lekker sit-sit-so hierso. Hulle weet die gras is net groener daar waar die mis die dikste gesmeer is, en hulle weet waar hulle die mis gestrooi het.

En dan, net voor ek koebaai sê, hoekom dink julle is Daddy Trump nou eers bekommerd oor julle, nadat AfriForum en Solidariteit destyds al gaan voorbrand maak het? Hoekom skielik spesifiek nadat Bibi Netanahyu vir hom gaan kuier het? Is hy regtig besorgd oor julle, of gaan dit baie meer oor dit wat in artikel 1 uiteengesit word? Kom ek maak dit maklik, ek haal dit vir julle aan: “In addition, South Africa has taken aggressive positions towards the United States and its allies, including accusing Israel, not Hamas, of genocide in the International Court of Justice, and reinvigorating its relations with Iran to develop commercial, military and nuclear arrangements.”

Dit gaan glad nie om die hondjie nie, liewe vlugtelinge, dit gaan om die halsbandjie, en die oomblik as jy nie meer ’n useful idiot in diens van Daddy Trump se agenda is nie, gaan hy jou soos ’n warm patat los.

Maar moet asseblief nie dink dat ek jou probeer oorreed om hier te bly nie. Gaan. Ek gee jou my blessing. Stuur jou adres, ek sal kom help pak. Maar doen dit uit volle bors. Skeur die groen mamba op die oomblik as jy grondvat in Amerika. Doen afstand van jou Suid-Afrikaanse burgerskap. Moenie die moeite doen om vir SA Homecoming te vra hoekom soveel Suid-Afrikaners terugkom nie, en dit nogal uit polities en ekonomies stabiele lande nie. Gaan, julle, Daddy Trump wag vir julle.

Koebaai, and don’t let the door hit you on the way out.

Lees ook:

Wat sê Bettina? Trump 2.0 in volle swang

Trump se uitvoerende bevel en die Onteieningswet: wat nou?

Elders gesien: Dit word deur kwaadwillige mense so geskets

DA slaan vure dood oor Trump se bewerings oor Onteieningswet 

Straight shot: Tembeka Ngcukaitobi about the Expropriation Act

On land, constitutional law and social justice | Etienne van Heerden Veldsoirée 2023

Praktiese wenke as onteiening sonder vergoeding jou in die gesig staar

Die Afrikaner Verklaring: Saambou of laertrek?

Africanis albus herbesoek: reaksie op die Afrikaner Verklaring

Trump, grondonteiening, MIV/VIGS en tariewe

Twenty million people face death due to aid cuts

South Africa – and the world at large – will feel the impact of Trump’s climate change denial