Toyota US Woordfeesbundel 2020: ’n onderhoud met Jaco Fouché

  • 0

LitNet plaas oor ’n tydperk van ’n maand onderhoude met die skrywers wie se verhale vanjaar in die Toyota US Woordfeesbundel opgeneem word. 

Jaco Fouché praat met Naomi Meyer oor Jaco se kortverhaal wat vanjaar in die Toyota US Woordfeesbundel gaan verskyn.

Jaco, waaroor handel jou kortverhaal en wat was die inspirasie daarvoor?

My verhaal se verteller is ’n ontnugterde vrou. Dit gaan nie goed in haar huwelik nie en sy moet aanvaar dat haar man ’n affair het. Die inspirasie was ’n vriend wat ’n girlfriend gekry het. Hy het vir my gesê: “My huwelik het ‘stale’ geword.” Ek het die verhaal geskryf voordat ek besluit het om dit vir die bundel voor te lê. Dit was net iets wat ek wou skryf. Gelukkig pas dit toe in by die beoordelaars se voorkeure en tema.

Wil jy iets vertel oor die skryfproses? Het jy die verhaal vooraf beplan of het dit organies ontwikkel? Afronding, redigering?

As ek reg onthou, het ek die storie in twee sessies geskryf. Die stem van die ding het dadelik vir my interessant geklink en ek kon dit klaarmaak. Baie pogings loop op niks uit nie. Hierdie een het gewerk. Ek wou ’n siniese maar bemagtigende einde aanwend en die verteller ’n tikkie genot, miskien selfs ’n vorm van wraak, midde-in die goor situasie gun, en die verhaal het deurentyd daarop afgestuur. Wat ek in die algemeen oor die skryfproses kan sê, is dat ek met die eerste skryf van ’n verhaal soveel reg wil hê as moontlik. Ek kan nie eers net vinnige, oppervlakkige notas maak wat ek later oopborduur of redigeer nie. Soms kry ek ander mense se skryfwerk te sien en dit is vir my ’n raaisel hoe iemand ’n eerste draft so rof en onafgewerk kan skryf en dit dan oorskryf. Dis onnodige werk. Vir my moet die ding van die begin af min of meer “reg” wees. Die Britse skrywer Anthony Burgess het sy boeke so geskryf dat hy ’n bladsy eers klaarmaak voor hy na die volgende een aanbeweeg en wanneer hy die laaste bladsy getik het, is die manuskrip volledig geredigeer en gereed om gepos te word. Natuurlik het hy op ’n tikmasjien gewerk en ek op ’n rekenaar, maar dit bly vir my ’n goeie benadering. Tog is dit ook so dat ’n mens kwaai afwyk van jou eie voorskrifte en veral met boeke moet ’n mens hier en daar soms erg herskryf.

Gaan jy vanjaar die Toyota US Woordfees kan bywoon en indien wel, en as jy reeds tyd gehad het om na die program te kyk, is daar enige items op die program waarna jy uitsien?

Ek weet nie of ek tydens die Woordfees in die omgewing gaan wees nie. Skares maak my maar skrikkerig! Ek dink egter daaraan om die bundelbekendstellingsfunksie by te woon en ons gaan seker deurry daarvoor.

Lees ook

Toyota US Woordfeesbundel 2020: ’n onderhoud met Santie van der Merwe

Toyota US Woordfeesbundel 2020: ’n onderhoud met Elmarié Dercksen

Toyota US Woordfeesbundel 2020: ’n onderhoud met Emile Joubert

Toyota US Woordfees-kortverhaalbundel 2020: ’n Onderhoud met Naomi Meyer

Toyota US Woordfees-kortverhaalbundel 2020: ’n Onderhoud met Cliffordene Norton

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top