Mandri Sutherland. (Foto: verskaf)
Teks en regie: Mandri Sutherland
Na amper twee jaar het agteros ook in die kraal gekom en na die sjarmante Mandri Sutherland se Vrou ens gaan kyk. Sutherland het bekendheid verwerf met haar huiskonserte wat sy al vir twee jaar aanbied met Vrou ens. Die stuk is so geskryf dat dit gesien kan word as “immersive” teater waar die gehoor as ’t ware saam met Sutherland om ’n denkbeeldige tafel sit en deel word van ’n erediens oor geloof, liefde, jaloesie, verwerping, verligting (“enlightenment”) en verlies. Sutherland het die uitsonderlike vermoë om diep emosionele temas met humor en insig te verweef sodat die stuk ’n rou en eerlike blik op die kompleksiteite van vrouwees in die 21ste eeu aan die gehoor bied.
........
Tannie Elsie, met haar vape en ’n lekker brandewyn en Coke, open die verrigtinge tot groot vermaak.
........
Vrou ens is ’n versameling van karakters en monoloë wat Sutherland self op die planke bring, en haar uitvoerings is histeries, maar ook teer. Vanaf die eerste oomblik dat sy die verhoog betree, gryp sy die gehoor se aandag met haar sterk teenwoordigheid en dinamiese vertolkings. Die stuk draai om die lewe van moderne vrouens en spreek kwessies soos selfbeeld, verhoudings, loopbane en die ewigdurende strewe na balans en vervulling aan. Sutherland se teks is deurdrenk van skerp waarnemings en ’n diep menslikheid wat elke vrou – en inderdaad elke mens – in die gehoor kan aanraak. Tannie Elsie, met haar vape en ’n lekker brandewyn en Coke, open die verrigtinge tot groot vermaak. Vrou ens is een van daai ervarings waar mens begin lag en dan kan jy nie ophou nie. En as iemand anders in die gehoor skreeu van die lag, dan lag jy ook sommer totdat jou niere wil ingee en jy hyg na asem. Dan is daar Mariëtte-se-ma wat diep ontstig is oor die stand van haar dogter se netbalwedstryde. Veronica Koekemoer, ’n bodybuilder en stigter van “Swingers for Jesus”, daag daarna in ’n pienk baaikostuum op. Sy is getroud met ’n eksdominee wat ook nou bodybuilding in Benoni doen. Luna, ook in ’n baaikostuum, maak dan ’n draai om haar ervaring van AfrikaBurn met die gehoor te deel en oor spiritual healing en cleansing rituals te praat. Sy het ook ’n moonbag vol MDMA en acid. Oe, en ek ken vir jou Lunas daar buite in die wêreld! Laaste aan die beurt is Mandri self. Haar ontroerende stories van haar ouma het my laat verlang na die dae in my ouma se tuin en kombuis vol Huisgenoot-wenresepte.
........
Sutherland kan binne sekondes vir jou ’n bolla klits en in ’n baaikostuum inglip.
........
Die verhoogontwerp is minimalisties, maar uiters effektief. ’n Eenvoudige stel, bestaande uit ’n stoel en ’n aanpaskamer. Sutherland kan binne sekondes vir jou ’n bolla klits en in ’n baaikostuum inglip. Sy gebruik ook nie net die verhoog om haar gehoor mee te voer nie. Baie kere is sy tussen gehoorlede, met nog histeriese geskater tot gevolg. Ek en my vriendin wonder steeds hoeveel sy op Brazilian waxes spandeer …
Sutherland se vertolkings is meesterlik in haar vermoë om die komplekse emosies van haar karakter oor te dra. Haar uitdrukkings en liggaamstaal wissel moeiteloos van humoristies en lig na intens en ontroerend. Sy slaag daarin om die gehoor te laat lag, dink en soms selfs huil, en dit alles binne die bestek van ’n enkele optrede. Haar vermoë om die alledaagse ervarings van vroue op so ’n genuanseerde manier uit te beeld getuig van haar diep insig en talent as aktrise en dramaturg.
........
’n Hoogtepunt van die produksie is die manier waarop Sutherland verskillende stemme en perspektiewe insluit. Sy vervleg die verhale van al die vrouens met haar eie.
........
’n Hoogtepunt van die produksie is die manier waarop Sutherland verskillende stemme en perspektiewe insluit. Sy vervleg die verhale van al die vrouens met haar eie. Hierdie keuse versterk die tema van die universele vroulike ervaring. Dit is veral treffend hoe sy stem gee aan die stiltes en onderdrukte emosies wat so dikwels deel is van vroue se lewens.
Die dialoog is deurdrenk van humor, soms skerp en soms wrang, wat ’n welkome balans bring teenoor die ernstiger temas wat aangespreek word. Sutherland se skryfstyl is natuurlik en vloeiend, en sy het ’n fyn oor vir die ritme van gesproke taal. Die gehoor word ingetrek in die ritme van haar vertelling, en die resultaat is ’n produksie wat voel soos ’n gesprek met ’n goeie vriendin – intiem, eerlik en diep bevredigend. Wat hierdie produksie verder versterk, is die musiekkeuses en klankontwerp, wat subtiel maar effektief tot die atmosfeer bydra. Die musiek, wat wissel van nostalgiese Afrikaanse liedjies tot kontemporêre treffers, ondersteun die emosionele landskap van die stuk en bring ’n ekstra dimensie na Sutherland se vertelling. Dit is duidelik dat daar baie aandag gegee is aan elke aspek van die produksie, wat daarvan ’n samehangende en kragtige geheel maak. Die lewe is veral ’n lied as die remix van Anneli van Rooyen se “Neem my op vlerke” op die luidspreker geblaas word.
Mandri Sutherland bewys waarom sy een van die opwindendste nuwe stemme in die Afrikaanse teater is. Haar vermoë om die komplekse en dikwels teenstrydige ervarings van vroue op ’n boeiende manier te verwoord, maak hierdie produksie ’n moet-sien. Dit is ’n viering van vroulikheid in al sy fasette en ’n herinnering aan die krag van die menslike gees. Nee kyk, ek is nou ’n moerse fan!
Mandri doen tans huiskonserte in Gauteng en is dan begin Junie in Nederland en België met nog huiskonserte. Gaan volg haar Instagram-blad, Vroudrie, vir meer inligting. Sy is sterk op soek na ’n spasie of huis in Amsterdam om haar vreugde ook daar te versprei. Dus, as jy hier lees vanaf Amsterdam, doen jouself ’n guns en kontak haar!
Lees ook:
Suidoosterfees 2024: Monsters – ’n onderhoud met Tinarie van Wyk Loots
KKNK 2024-teaterresensie: Die stoele ontleed die absurditeit van belangrikheid eerlik