Nasionale inperking: Só kan Afrikaansonnies aanlyn onderrig

  • 0

Fotobron: Canva

Die huidige landswye afsondering en die gevolglike verlengde skoolvakansie weens die uitbreek van die COVID-19-virus noop onderwysers om die aanbieding van taalonderrig te heroorweeg en te beplan hoe vernuwende onderrig-leer-metodes gebruik kan word om tuisleer te vergemaklik.

Die doel van hierdie artikel is om ondersteuning aan taalopvoeders te bied wat onseker en moontlik angstig voel oor die “e-woord” wat nóú nie meer ’n futuristiese idee vir die moderne taalklas is nie, maar daadwerklike antwoorde bied om dié pandemie se impak op akademiese gebied te versag.

Dit is beslis nie nuwe kennis dat hedendaagse leerders aan tegnologiese toestelle geheg is nie. Soekenjins en die sosiale media is die huidige jong generasie se hulpbronne vir inligting en hulle deel voortdurend kennis en insigte met mekaar deur middel van hierdie media, aangesien hulle in staat gestel word om onmiddellike terugvoer te kan gee en te ontvang. Tydens die korona-afsondering kan taalopvoeders hierdie leervoorkeure van die 21ste-eeuse leerder inspan om te verseker dat onderrig en leer nie gedurende die 21-dae-inperking agterweë bly nie.

Wanneer taalopvoeders planne vir aanlyn leer beraam, is dit egter noodsaaklik om in gedagte te hou dat leer in die kuberruim vir sommige leerders ’n groter uitdaging gaan wees as vir ander. Die meerderheid leerders in Suid-Afrika het nie noodwendig toegang tot onbeperkte data nie, of toegang tot rekenaars en tablette nie. Indien leerders net op hulle selfone moet staatmaak, moet opvoeders dus probeer om lae-data-take en aktiwiteite te gebruik. Hierdie artikel fokus op e-leer, maar opvoeders kan gerus in gedagte hou dat opvoedkundige uitsendings op radio en televisie plaasvind.

Daarbenewens is dit belangrik om duidelike riglyne aan leerders te bied oor hóé leer aanlyn gaan plaasvind en wat daar van hulle verwag gaan word. Opvoeders moet in gedagte hou dat nie alle leerders gekondisioneer is om selfstandig te leer nie. Inteendeel, die meeste leerders is daaraan gewoond om binne ’n tradisionele klaskameromgewing grootliks op die onderwyser as sentrale rolspeler staat te maak vir begeleiding in die onderrigleerproses. Daarom is dit belangrik vir die suksesvolle implementering van e-leer-strategieë dat die nodige ondersteuningsmateriaal vir leerders beskikbaar gestel word. Verder moet daar in ag geneem word dat nie alle leerders gelyke toegang tot die aanlyn ruimte het nie. Leerders moet daarom aangemoedig word om aanlynleermateriaal op hulle persoonlike rekenaars of vanaf ’n selfoon af te laai sodat hierdie bronne ook sonder internettoegang (aflyn) besigtig kan word.

Die Afrikaansdepartement van HMS La Rochelle in die Paarl deel graag die volgende wenke oor hoe om die impak van COVID-19 op taalonderrig te fnuik. Hierdie wenke vir die suksesvolle implementering vir e-leer kan gebruik word om te verseker dat al vier KABV-vaardighede vir taalonderrig vir Afrikaans Huistaal en Eerste Addisionele Taal, naamlik Luister en praat, Lees en kyk, Skryf en aanbied, en Taalstrukture en konvensies, asook die onderrig van letterkunde vasgelê word.

  1. Skep ’n aanlyn klaskamer

Ons het ’n Google Classroom vir elke vakgroep per graad gemaak. Die rede waarom ons op hierdie platform besluit, is dat dit kommunikasie met leerders vergemaklik en toegang tot lesmateriaal te bied. Google Classroom bied ook die opsie om assesserings aanlyn te laai volgens ’n kalender wat kennisgewings aan leerders stuur. Die taalopvoeder kan dus kort toetsies of ’n vasvra aan leerders stel wat onmiddellike terugvoering bied.

  1. Aanlyn bronne

Die onderrig van letterkunde kan deur middel van PowerPoint-opnames aangebied word. PowerPoint bied die funksie om ’n stemopname te maak soos wat die aanbieder die skyfies verduidelik.

Die omgekeerde-klaskamer-benadering kan ook ingespan word. ’n Toepassing van hierdie metode sal wees waar leerders individueel of in groepe aanlyn ’n gedig op ’n Goolge Doc ontleed. Daarna sal die onderwyser op grond van die leerders se ontleding ’n verdere bespreking bied wat hoërorde- kognitiewe vlakke inspan. Die omgekeerde-klaskamer-benadering betrek leerders aktief by die leerproses en aktiveer konstruktivistiese leer, waar leerders hulle eie kennis konstrueer eerder as om passiewe ontvangers van kennis te wees.

Nog ’n gratis aanlyn hulpmiddel is Screencast-O-Matic wat enige beeld wat op jou rekenaarskerm verskyn, as ’n video met beeld en klank vasvang. Screencast-O-Matic maak dit moontlik vir die opvoeder om lesmateriaal wat byvoorbeeld in Word- of PDF-formaat is te verduidelik.

Gidse vir letterkunde en kontekstuele vrae kan op ’n elektroniese platform soos Google Classroom aan leerders beskikbaar gestel word. Die taalopvoeder kan ook skakels na ander elektroniese bronne met leerders op hierdie platforms deel, soos RSG se aanbieding van Reza de Wet se Mis  of Fanie Viljoen se kortvideo’s oor Onderwêreld.

Werkstate vir taalonderrig kan ook só aangebied word of onderwysers kan die taalaktiwiteit in die vorm van ’n aanlyn vasvra aanbied, met die voordeel dat leerders onmiddellike terugvoer ontvang.

Mondelinge oor grense heen

Die assessering van mondelinge neem dikwels baie klastyd in beslag, en met die verlengde skoolvakansie is ons aanbeveling om eerder elektronies te klets! Laat leerders die voorbereide mondeling op hulle selfone opneem en aanlyn laai. Daar is ’n paar platforms wat hiervoor gebruik kan word. Leerders kan hulle mondelinge deur middel van ’n Google Classroom-assessering voltooi, hulle kan die video-opname e-pos, of ’n groep op ’n sosialemediaplatform soos Facebook, WhatsApp of Telegram kan geskep word waarop leerders hulle video’s deel. Luistertoetse kan ook deur die gebruik van ’n podsending en ’n aanlyn vasvra voltooi word. Verrykende mondelingse oefeninge kan deur die selfoontoepassing Speaking Photo, geskied. Hierdie toepassing maak dit moontlik om stemopnames by ’n selfoonfoto te voeg en dit dan op verskeie platforms te deel.

Vernuwende skryf en aanbied-benaderings

Die aanbieding van e-skryf-opdragte bied ’n gulde geleentheid vir outentieke, regtewêreld-skryftake. Die taalopvoeder kan ’n verskeidenheid stimulusse vir kreatiewe en transaksionele skryfwerk gebruik wat ’n outentieke taalervaring vir die leerders skep. Leerders kan byvoorbeeld aanlyn na ’n lokprent van ’n film kyk en dan ’n resensie skryf. Webjoernale met daaglikse/weeklikse kort inskrywings vir hoe leerders die isolasietydperk ervaar kan ’n wonderlike geleentheid vir gereelde skryfoefeninge bied en ’n gratis platform soos Padlet  skep ook die moontlikheid vir samewerking en bied ’n verskeidenheid multimediamoontlikhede. Aanlyn skryfopdragte kan ook voltooi word deur Word-dokumente op Google Classroom te laai of aan die onderwyser te e-pos.

Kletskamers

Google Hangouts is ’n platform wat gebruik kan word vir kontaksessies met leerders. Die platform maak dit moontlik vir tot 150 mense om deel te neem aan ’n aanlyn gesprek, alhoewel die videofunksie die kletskamer tot 25 mense beperk. Hierdie aanlyn platform kan gebruik word om ’n gevoel van samehorigheid tussen leerders en onderwysers te bewerkstellig gedurende ’n tydperk van isolasie.

Ons wil ten slotte beklemtoon dat die gevolge van COVID-19 opvoeders wêreldwyd noop om met ’n nuwe bril na die onderrig-leer-verhouding te kyk. Kom ons gebruik die hedendaagse leerder se tegnologiese bemagtiging tot almal se voordeel om kwaliteitonderrig te midde van ’n wêreldwye krisis te laat seëvier, maar ook om isolasie en vervreemding teë te werk. Dit skep terselfdertyd die geleentheid vir opvoeders om elektroniese-leer-gemeenskappe te vorm en na mekaar uit te reik oor skoolgrense heen om saam te werk aan ’n oplossing vir ’n nasionale krisis.

  • Marné Pedro en Michele van der Merwe is betrokke by onderskeidelik HMS La Rochelle en Universiteit Stellenbosch

Lees nog artikels deur Michele van der Merwe en Marné Pedro:

Taalonderwysers se perspektiewe aangaande vervlegte leer as onderrig- en leerbenadering vir die 21ste-eeuse leerder

’n Kritiese blik op 21ste-eeuse onderrig en leer deur ’n onderwyser- en leerderbril

Superspellers op ’n slimfoon

Leer spel met woordeboeke

’n Toekomsgerigte tegnologieryke taalklaskamer

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top