Breyten Breytenbach (Foto: Izak du Plessis)
Lewensreis
Op Ounooi se skoot het jou tong geleer
om uit klanke en ritme woorde te skep.
Vir haar kon jy om die dood nie ’n wrang
vers skryf nie, want sy bly jou Ounooi.
By haar het jy geleer om om die dood nie
aan ’n mondvol bitter woorde te smul nie.
In jou swerfjare het sy jou met heimwee
gekoester en gesmeek dat berge jou behoed.
Op gekneusde knieë en met geboë hoof
het sy jou ná sonsak aan haar God gewy.
Wie is dit wat só lig loop as die aandwind
opsteek en die skaduwees begin uitstrek?
Dit is Yolande wat vreugdeklokke laat beier;
sy haas haar om jou met lente se olie te geur.
Jou troeteling wil liefdesvlerke oor jou sprei
en jou tree vir tree na die liefdestuin lei.
Mag die digter tot rus kom
in die boord se donker aarde.
Lees ook:
Kommentaar
'n Uitstekende gedig vir die meester wat nou gegroet het.
Cas Vos
Jy eggo met woorde
soos hamerslae
Breyten se impak
op ons taal
ons moet ligloop
in die aandwind
van lewensdenke
wat uitreik na die albegrip.
Al het Breyten die aardse bestaan verlaat, sal die mirakelman se woorde en gedigte sonder ophou met ons praat. En ons sal spitsoor luister.
Dankie Prof, vir hierdie woorde oor 'n vreeslose verkenner. Mag die oneindigheid aanhou spreek tot ons begrensde bestaan.
Daar gaan Breyton ook
Daar gaan sit my hart in my keel
nooit sal ek my held ontmoet nie
die nederige woord ridder
wat gewoon was
niks opstairs nie
niks verbeel nie
net plein afrikaans
soos ons hom praat
tog een van die reuse
daar is ‘n paar -
nou was daar ‘n paar
die enkeles kan ek tel
op my een hand
Ingrid was ook een
maar ‘n ander een
‘n spesiale boodskap een
‘n seer boodskap een
soos Breyton
die mens – mens
wat my gerus gestel het
dat ek moet skryf
wat my hart voorlees
sonder ‘n woordeboek
sonder spoggerige woorde
sonder verbeel
skryf soos jy praat
stadig matig en duidelik
sodat ‘n kind jou kan verstaan
soos Jesus gepraat het
nou glo ek is hy daar
daar waar hy geglo het
God sy Vader is
in rus in gerus wees
vry van wees en vrees
in liefde en vrede
wat hy so hard voor geveg het
gestry en baklei voor het
nou rus hy
rus sag my held
my groot vriend
wat ek nooit geken het nie
hoe wens ek -
dat ek het