Riana Scheepers
Riana Scheepers se lewe is dramaties en opwindend, uitdagend, avontuurlik en romanties. In vyf dekades het sy die wêreld deurreis, boeke gelees én geskryf, haar seuns met vreugde grootgemaak en ánder mense se kinders lief gemaak vir woorde. Sy het huise gerestoureer, bome geplant, verlore stemme oor die uithoeke van Suid-Afrika opgespoor en hul stories opgeteken. Vir haar familie is sy moeder, minnares en muse.
Dr. Riana Scheepers is in 1957 in KwaZulu-Natal gebore. Haar pa, ‘n spoorwegwerker, sterf in ‘n treinongeluk toe sy 6 jaar oud is. Sy leer, saam met haar verpletterde gesin, deeglik wat armoede en ontbering is; sy leer ook oorlewing, die kuns van vreugde - en die vreugde van kuns.
Reeds in haar vroeë tienerjare wen sy verskeie skryfkompetisies en redenaarskompetisies. Sy word twee agtereenvolgende jare aangewys as die beste redenaar in Noord-Natal. In 1975 word sy verkies as hoofmeisie van Hoërskool Vryheid. Sy neem ook deel aan verskeie sportsoorte en verwerf Natal-kleure vir atletiek, swem en sierduik.
In 1976 begin sy haar studies aan die UOVS in Bloemfontein. Sy behaal die grade B.A. Kommunikasiekunde, B.A. Hons en M.A. (Afrikaans) - almal cum laude. In 1997 behaal sy 'n doktorsgraad in Afrikaans en Nederlands aan die Universiteit van Kaapstad.
Sy was dosent by die Universiteit van Zoeloeland en Kaapstad, skakelredakteur by Tafelberg Uitgewers en onderwyser by Paul Roos Gimnasium. Sy begin ook haar gewilde kursus in Skryfkuns en Kreatiewe Denke wat sedert die ontstaan daarvan talle pryswenner-skrywers opgelewer het. Sy skryf boeke en rubrieke, en word ‘n huishoudelike naam in Suid-Afrika met die skep van die hardkoppige, slim en dierbare karakter “Katriena”.
In 2002 trou sy met Johann Loubser en woon sedertdien op die historiese plaas De Compagnie naby Wellington. Sy is bedags plaasbestuurder en snags skrywer.
Haar boeke is topverkopers, in Suid-Afrika en in die buiteland. Sy ontvang verskeie toekennings vir haar skryfwerk, onder meer die ATKV-Prosaprys, FAK-prys, Eugène Marais-prys die ATKV-Kinderboekprys. Die Nederlandse vertaling van Blinde sambok, Scorpioenkind, is op die kortlys vir die Vlaamse Kinderjurie-prys (2004).
In 2006 ontvang sy nie minder nie as vier toekennings vir haar werk: Die avonture van Wilde Willemientjie kry die KKNK se Kanna-prys vir die Beste Kinderproduksie. Sy ontvang die Rapportryers se Erepenning vir haar werk asook die Patrick Petersen Gedenkprys vir haar hele oeuvre. Vir die kulturele bydrae wat haar bundel plaasverhale Die melkweg het ‘n ster laat val in die landbougemeenskap gelewer het, kry sy ‘n spesiale toekenning van die Departement van Landbou (Wes-Kaap).
In 2007 word sy deur Rapport / City Press aangewys as een van die Top Tien Vrouepresteerders in Suid-Afrika.
Benewens skrywer is Riana ook plaaswerker, geleentheidspreker, motiveerder, wynboer, restoureerder en liefhebber van die natuur.
Sy het twee seuns: Floris (‘n geöktrooieerde rekenmeester) en Adriaan (dramaturg en skrywer) - die twee perfekste kunswerke wat ‘n kunstenaar kán voortbring.
Riana Scheepers gesels oor ’n baie spesiale feetjie (en oor Wêreldboekedag)
2026-04-22"Miskien is ek eerstens beïnvloed deur die Zoeloeverhale wat ek as kind gehoor het, en verder deur Skandinawiese en Russies sprokiesverhale – dit volg ’n totaal ander patroon as Europese sprokies, en die sfeer is totaal anders."
Ek wat vuur bemin en altyd waaghalsig was
2025-08-07"En wat het in 60 jaar gebeur – van ’n kind wat langs ’n vuur sit, tot ’n volwassene wat ’n skrywer en letterkundige geword het? Stories, dit is wat gebeur het. En vuur. En ’n dodelike skoot waansinnige waaghalsigheid. Want skryf, dit weet ons, is nie vir bangbroeke nie."
Luisterverhale: "Die Rachelsporsie" deur Riana Scheepers, voorgelees deur Rolanda Marais
2024-04-24Rolanda Marais lees Riana Scheepers se verhaal "Die Rachelsporsie" voor. Die verhaal het oorspronklik in Dulle Griet, in 1991 deur Tafelberg uitgegee, verskyn.
Dag 13: Kwarantyn-ketting – "Die inperking: die geskenk van gekonsentreerde tyd" deur Riana Scheepers
2020-04-08"Ek mis my fiets en ek kry vir Klara Skaaphond jammer wat saam met die fiets wil hardloop. Maar ek weet dit gaan nie vir ewig duur nie. Ek geniet elke sekonde hiervan. Ek koester ’n ongewone, nuwe ervaring, iets wat ek nie noodwendig vir myself sou bewerkstellig het nie. En ek begin skryf."
Week van de Afrikaanse roman 2019: onderhoud met Riana Scheepers
2019-09-17"Ek gaan beslis nie Nederland toe om te gaan rus nie – ek gaan elke moontlike aanbieding van my mede-skrywers bywoon. Dit is ’n uitsonderlike, en uiteenlopende groep skrywers, ek kan nie wag nie!" Riana Scheepers gesels met Naomi Meyer oor die Week van de Afrikaanse roman, waar sy binnekort optree.
Bydraes vir Die sjokoladeshow word ingewag
2017-12-04"Die sjokoladeshow is ’n unieke geleentheid vir skrywers om hul werk op die verhoog te sien. Gaan koop jou gunstelingsjokolade, sit voor jou rekenaar, en skryf!"
Bientang
2017-07-12"sy kruip al dieper in haar seegrot in
sy stook al hoër ’n bossievuur
sy hoor die branders dreun en druis"
Bydraes gesoek vir aksierym- en liedjieboek vir pikkies van een tot drie jaar!
2013-10-09 "Ons beoog ’n opvolgbundel vir die ouer kleingoed, Rympies vir kleintjies en kleuters,maar ons fokus is nou eers op die heel kleintjies: peuters van 1 tot 3 jaar."
Rym-, aksierym- en liedjiebundel vir pikkies: Lees dié onderhoud oor bydraes wat jy self kan stuur!
2013-10-09 Riana Scheepers, Suzette Myburgh-Kotzé en Gertie Smit is besig om 'n rym-, aksierym- en liedjiebundel saam te stel vir heel kleintjies van ouderdom een tot drie jaar. Naomi Meyer het al drie van hulle oor die projek uitgevra.
Namibiese Woordfees 2013: Slypskole met Riana Scheepers
2013-09-03 Riana Scheepers is een van die skrywers wat gedurende die Namibiese Woordfees 2013 slypskole aanbied. Sy deel foto's van vorige slypskole en boekgesprekke met LitNet se lesers.
Die gevoelswêreld van die jong skrywer – 'n soektog
2013-03-12 Riana Scheepers en Leti Kleyn stel ’n publikasie met jeugherinneringe saam wat later dié jaar by LAPA Uitgewers sal verskyn. Hulle het hul geheueflitse aan Naomi Meyer vertoon.
Nuwe Stories 2013-onderhoud: Riana Scheepers
2013-01-25 Riana Scheepers gesels oor die kuns van kortverhale skryf.
Die Afrikaanse Skryfgids – vir almal wat (wil) skryf
2012-08-09 "Die grootste argument, myns insiens, vir ’n Afrikaanse skryfgids is dat die leser bekend en vertroud is met die medewerkers se werk as briljante voorbeelde. Ons medewerkers is elkeen ’n meester op sy vakgebied, só het ons hulle gekies; hulle is geloofwaardig en betroubaar."
Bloedgrond: die smul en spoeg aan die swiets van ’n verrassingspakkie
2011-07-14 Ek het die afgelope tyd binne kort bestek drie romans van Malene Breytenbach gelees, een daarvan nog in manuskripvorm. My binnegoed sê vir my dat Breytenbach besig is om in ’n opwindende skrywer te ontwikkel – al weet ek nog net nie presies ...