#politieklimeriek - Hier is ons 10 finaliste!

  • 10

Elke week, vir 10 weke, het LitNet lesers uitgenooi om limerieke met ’n politieke tema in te stuur as deel van ons #politieklimeriek-kompetisie ter viering van LitNet se 20ste verjaarsdag. Hier is die 10 weekwenners, waaruit ons limeriekpaneel ’n algehele wenner gaan aanwys. Dankie aan ons beoordelaars: Heindrich Wyngaard, Philip de Vos, Bibi Slippers en Jonathan Jansen.



Week 1: Neels Jackson

In ruil vir die trek van jou kruisie
beloof ek vir jou ʼn huisie.
     En wat dit ook verg,
     ek beloof jou ʼn berg
wat lewe sal skenk aan ʼn muisie.

 



Week 2: Koos Kombuis

Het jy gehoor van daai ou tannie Zille?
Syʼt meer balls as al die Blou Bulle!!!
Sy sê “Fokkof, SARS!
Julle kan almal gaan bars
Want op my tax return staan daar net nulle!!!ˮ



Week 3: Marieta McGrath

Die landsleier sê ʼn tablet
Sal leerders van domgeit kan red
As elkeen een kry
Kan hul net soos hy
Dit lees op die skoolputtoilet



Week 4: Hannes Visser

Vals hoop

ʼn dominee van mdantsane
sê hy kan dit glad nie verstanie
dat ministers wat lieg
en miljoene bedrieg
glo hulle sal hemel toe ganie



Week 5: Cecile Bosman

Die melkkoei by Megawatt Park
Se uier is lelik bevark:
Van al die leegtap
Deur Zuma se klub
Word dit nou as droëwors bemark.

 



Week 6: Rohan Magerman

De Lille sê sy gaan die land regruk
en jou stem t’ruggee as sy misluk
maar al doen sy haar bes
klink haar belofte nes
die waarborg van ʼn Samsung-produk

 



Week 7: Willie Kühn

ʼn Altyd optimistiese man van ons land
sien diep in die tonnel ʼn liggie wat brand.
Hy juig: “Dis nuwe daeraad wat wink
met tye skuldvry, beurtvry en blink. ”
Helaas - dis toe Cyril met kers in die hand.

 



Week 8: Pirow Bekker

Sunnyside stem

ʼn Stempunt in die opelug in ʼn parkie
is ʼn stalletjie of ʼn vrolike markie
en soos ʼn lekker kêrel
laat val jy dalk jou pêrel
in die buik van ʼn gulsige varkie.



Week 9: Carina Stander

Paloekatieke tierlantyntjies
raak by die dag al meer verfyntjies.
Vir jou ware kleure
voel party(e) vere:
“Verkies u ʼn swart-én-wit pikkewyntjie?ˮ

 



Week 10: André Louw

Max het jou werklikwaar weer ʼn eie koerant
Malema skree: “Gee terug die land”
     Steve sing vir Amanda
     Almal huil oor Rwanda
En my vrou maak huis aan die kant

 


 

  • 10

Kommentaar

  • Avatar
    Davida Barnard

    Ek het hierdie rymelaars baie geniet. Baie dankie dit was prettig pittig en gevat. My keuse is Willie Kuhn Nr 7.

  • Avatar
    Rita Swanepoel

    Ek stem beslis ook vir Willie Kuhn - skitterend! Ek sien sommer vir die prez met sy kersie.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top