Eldon van der Merwe van In Slavenhuis 39 opgewonde oor tweede speelvak by Woordfees

  • 0

Eldon van der Merwe (Foto: verskaf)

Die bekroonde toneelstuk In Slavenhuis 39, wat handel oor vier bruin eerstejaarstudente wat ’n woonstel in Stellenbosch deel wat jare gelede slawe gehuisves het, is weer vanjaar by die Woordfees te sien.

In Slavenhuis 39 is onlangs benoem vir die beste nuutgeskepte Afrikaanse teks by die Fiësta-toekennings en het verlede jaar by die Toyota US Woordfees in Stellenbosch gedebuteer, waar dit die Woordtrofee vir beste opkomende kunstenaars ontvang het.

Herschelle Benjamin het die teks geskryf en Philip Rademeyer behartig die regie.

Die opkomende akteurs in die produksie is Stephren Saayman, Eldon van der Merwe, Stefan Erasmus en Cantona James.

Een van die ontluikende sterre in hierdie toneelstuk is Eldon van der Merwe.

Nie net is hy te sien in In Slavenhuis 39 nie, maar hy het ook onlangs sy debuut op die kassie gemaak in die televisiereeks Arendsvlei.

Eldon vertel meer oor sy loopbaan en liefde vir die kunste.

In Slavenhuis 39 het verlede jaar by die Woordfees debuteer en sedertdien oral opgang gemaak. Vanjaar kan die stuk weer by die Woordfees gesien word. Het julle ooit gedink die stuk gaan so suksesvol wees?

Die oorspronklike teks van In Slavenhuis 39 is vir die eerste keer by Teksmark 2017 voorgelees met drie van die huidige akteurs as deel van die geselskap. Met ondersteuning van Nati en die Toyota US Woordfees kon die produksie debuteer by Woordfees 2019. Ek het van die begin af geweet dat Herschelle Benjamin se teks in staat was om gehore aan te gryp, maar toe die produksie die WoordTROfee ontvang het vir beste opkomende kunstenaars, was dit vir elkeen van ons ’n groot skok.

Ons het in September 2019 nog ’n suksesvolle lopie by die Kunstekaap-teater gehad en gehore kon nie genoeg uitpraat oor die impak wat die produksie op hulle gehad het nie. Ons is hierdie jaar terug by die Woordfees met drie vertonings wat belowe om die Rhenish-teater in Stellenbosch vol te pak met hoendervleis. Ons hoop dat die produksie nog na baie verhoë genooi sal word, juis omdat dit so baie kwessies rondom menswees aanspreek.

Die geselskap van In Slavenhuis 39 (Foto: verskaf)

Hoe hou julle die toneelstuk “vars” en voorkom dat jul toneelspel in ritmes verval na soveel optredes?

Ons probeer die produksie vars hou met nuwe energieë vir elke vertoning. Die karakters is vier eerstejaarstudente en dis vanselfsprekend dat hulle nie ’n verbeeldinglose lewe sal hê nie.

Daar is ook baie fisieke bewegings en passies in die produksie wat ons as akteurs self moes skep en uitdink, en omdat ons dit self uitgedink het, laat dit ons toe om onsself daarin uit te leef en sodoende ons persoonlike dryfkrag daarin uit te stort.

’n Toneel uit In Slavenhuis 39 (Foto: Vulture Photography)

Vertel asseblief meer oor die karakter wat jy in die toneelstuk vertolk.

Ek vertolk die rol van Chester, ’n onderwysstudent wat afkomstig is van ’n baie “fancy” hoërskool. Chester is ook mal oor rugby en glo dat sy naam dalk iets te doen het met sy soortgenoemde gunstelingsportlegende, Chester Williams. Tussen die vier studente is Chester dalk die minste gefokus op sy akademie.

Is jy en jou karakter in sekere opsigte dieselfde?

Eldon en Chester het redelik baie gemeen. Albei geniet sport. Ons vermy ook graag konflik en soos in die vertonings sigbaar is, geniet Chester ook die smaak van ’n glasie rooiwyn. Ons verskil ook in ander aspekte. Chester verkies om Engels te praat, waar ek, Eldon, ’n groter liefde vir Afrikaans het. Chester is afkomstig van die suidelike dele van die middestad terwyl Eldon oorspronklik van die platteland af kom.

’n Toneel uit In Slavenhuis 39 (Foto: Vulture Photography)

Jy is ook tans te sien in die televisiereeks Arendsvlei. Vertel asseblief meer oor dié hoofstuk. Hoe het hierdie geleentheid oor jou pad gekom?

Toe ek vir die eerste keer van Arendsvlei hoor, was die telenovelle reeds haastig besig om harte te steel met hulle eerste seisoen. Ek was op daardie oomblik besig met ’n projek in Johannesburg en so gelukkig soos wat ek was, sou ek baie graag verkies het om in Kaapstad werk te kry. Ek het onmiddellik begin rondvra en moes ongelukkig wag vir die tweede seisoen voordat ek kon oudisie vir enige rol.

Na maande se aansoeke het ’n uitnodiging vir ’n oudisie uiteindelik plaasgevind. Kort daarna het ek die nuus ontvang dat ek die rol van die 17-jarige Curtley Neethling gekry het, wat ironies nie die rol was waarvoor ek oudisie het nie. Curtley se vorige skool het bankrot geraak gedurende sy graad 11-skooljaar en hy is toe oorgeplaas na die Hoërskool Arendsvlei. Hy's omtrént nuuskierig en hou van inmeng, daarom is hy gereeld teenwoordig wanneer moeilikheid kom, al is hy selde die skuldige party.

’n Toneel uit In Slavenhuis 39 (Foto: Vulture Photography)

Van waar jou liefde vir die kunste?

Ek het van kindsbeen af reeds ’n oorvloed van energie en entoesiasme gehad. Ek was by alles betrokke wat ’n buitemuurse aktiwiteit was, van skaak tot atletiek. My ma was baie lief vir klassieke musiek en ons was altyd verwonder deur die pragtige klanke van musiekinstrumente.

Ek het eers op ’n later stadium besef wat dit kos om ’n instrument te speel. Baie musikante het hulleself uitgeleef deur hulle musiek, en hoe hulle emosies deur klanke aangebied het, het my verstand te bowe gegaan. Ek was onmiddellik versot op hulle kuns en die verskillende maniere waarop ’n kunstenaar uiting kan gee aan hulle emosies.

’n Toneel uit In Slavenhuis 39 (Foto: Vulture Photography)

Wat is jou raad vir die jeug wat ook ’n loopbaan in die kunste wil volg?

Ek sou aan enige kunstenaar aanbeveel dat hulle kennis maak met die algehele Skepper, God. Glo in jouself en werk aan jou vaardighede. Onthou dat iemand anders se vooruitgang nie beteken dat jy misluk nie. Jou lewensreis is op sy eie koers.

Wat hou die toekoms vir jou in?

In Maart is ek natuurlik te sien by die Woordfees met In Slavenhuis 39, sowel as die terugkeer van David Kramer se musiekblyspel Danger in the dark by die Baxter-teaterkompleks in Rosebank, Kaapstad. Ek sien ook uit daarna om nog baie betekenisvolle werk te verrig in die nabye toekoms. Ons is immers in die jaar 20plenty.

  • In Slavenhuis 39 is 6, 8 en 12 Maart by die Toyota US Woordfees te sien. Kaartjies is teen R80–R140 beskikbaar by Computicket en kos R130 by die deur.

Lees ook

Cantona James van In Slavenhuis 39 benoem as beste opkomende kunstenaar by Fiëstas

Bekroonde toneelstuk In Slavenhuis 39 nou by die Kunstekaap te sien

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top