DigiKuns: ’n onderhoud met Jacqueline Göttert

  • 0

Jacqueline Göttert praat met Naomi Meyer oor die ATKV se projek, DigiKuns.

Jacqueline, kunswedstryde is vanjaar wêreldwyd gekanselleer. Kunstenaars in alle genres sit morbied by die huis. Waarom sal die ATKV-projek DigiKuns hulle dalk hoop gee?

ATKV-DigiKuns bied aan kunstenaars van alle ouderdomme die platform om hulle kreatiwiteit met ’n unieke uitdaging te toets. Dit gaan nie net deelnemers se gemoedsvlakke ’n hupstoot gee nie, maar sal hulle ook die geleentheid gee om saam met die ATKV direk by te dra tot die ontwikkeling van kuns en kultuur. Deelnemers gaan ook die geleentheid hê om ander met hul kuns te inspireer, waarna die publiek ’n geleentheid sal kry om hulle gunstelinge te kies deur middel van ’n digitale kunsuitstalling.

Ek sal die inligtingstuk aanheg, maar wil jy dalk uitbrei op hoe DigiKuns sal werk? Wie kan inskryf, wat moet hulle doen en wat is die proses?

ATKV-DigiKuns vereis dat deelnemers ’n Afrikaanse gedig kies en ʼn visuele interpretasie daarvan skep in die vorm van ’n oorspronklike kunswerk. Jonk en oud kan deelneem. Wanneer deelnemers gereed is, kan hulle voor of op 24 Julie teen R50, of voor of op 31 Julie teen R80, inskryf. Meer inligting is op https://atkv.org.za/neem-deel/digiprojekte/digikuns beskikbaar.

Die kunstenaars kan enige medium gebruik, is ek reg? Dink jy sekere kunsmediums gaan beter werk vir doeleindes van hierdie kompetisie? Voorstelle, gedagtes hieromtrent?

Alle mediums, soos verf, teken, collage, beeldhouwerk, fotografie of ’n oorpronklike digitale illustrasie, word aanvaar. Die kunswerke word per medium beoordeel, daarom dink ek nie dat daar ’n medium is wat beter gaan werk vir die doeleindes van hierdie kompetisie nie. Elke medium bied die geleentheid om ’n unieke konsep en die interpretasie daarvan uit te beeld. Dit is deel van die kunstenaar se opdrag om die mees gepaste medium vir sy unieke konsep te kies, want dit, tesame met tegniese aspekte – dws vaardighede in die gekose medium – vorm deel van die kriteria vir beoordeling.

Wat van digitale inskrywings? Hoe lyk die ruimte en potensiaal daarvoor? En wat van mense wat dalk doodgewoon niedigitale kuns verkies? Sal hulle 'n agterstand hê teenoor diegene wat tegnies vaardiger is?

Nee, ATKV-DigiKuns maak voorsiening vir elkeen. Ja, dit is ’n digitale kompetisie en geen fisiese kunswerke kan aanvaar word nie, maar kunstenaars wat niedigitale kuns verkies, soos teken, verf, collage of beeldhouwerk, kan steeds deelneem. Hulle gaan net ’n foto van hul kunswerk moet neem of dit inskandeer.

Dit is die eerste keer dat die kompetisie aangebied word. Wat is uiteindelik die kriteria om te bepaal hoe 'n goeie inskrywing sal lyk?

Die kriteria vir ’n goeie inskrywing word ooreenkomstig die opdrag aan deelnemers gemeet; dws as jy ’n Afrikaanse gedig of rympie gekies het (hetsy gepubliseerd óf selfgeskrewe) en ’n visuele interpretasie daarvan geskep het in die vorm van ’n oorspronklike kunswerk, wat terselfdertyd ATKV-DigiKuns se kriteria vir beoordeling bevredig of dalk oortref, dan is jý gereed om in te skryf!

Wie is die beoordelaars?

Ons hoofbeoordelaars is kenners op die gebied van die kunste en letterkunde. Hulle sal volgens ATKV-standaarde opgelei en belyn word alvorens beoordeling plaasvind.

Mag mense enige plek in die wêreld inskryf?

Ja! Mense uit enige uithoek van die wêreld kan aan ATKV-DigiKuns deelneem!

Sal mense enige plek in die wêreld die kuns kan besigtig?

Alle kunswerke sal op die ATKV se webtuiste en Facebook-blad beskikbaar gestel word sodat die publiek hul gunstelingkunswerk vanaf 7 Augustus kan kies. Die wenners word op 14 Augustus bekendgemaak.

Waarom is kuns vir die ATKV belangrik?

Te midde van die COVID-19-pandemie besef die ATKV opnuut dat die volhoubare ontwikkeling van kuns en kultuur kernbelangrik is vir ’n gesonde samelewing. ATKV-DigiKuns bied vir die ATKV die geleentheid om gedurende onsekere tye steeds ’n aktivis te bly vir die ontwikkeling van kuns, kultuur, die mens en uiteindelik die samelewing in sy geheel.

Laat asseblief weet waar die praktiese inligting beskikbaar is, en laaste belangrike reëlings.

Alle inligting ten opsigte van ATKV-DigiKuns is beskikbaar by https://atkv.org.za/neem-deel/digiprojekte/digikuns. Gaan loer vir ander opwindende ATKV-Digiprojekte gerus by atkv.org.za/neem-deel/digiprojekte.

ATKV-Digipraat 2020: ’n Zoom-onderhoud

ATKV-Digipraat: wenke van ’n gereelde beoordelaar van redenaarskompetisies

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top