ATKV-Digipraat: wenke van ’n gereelde beoordelaar van redenaarskompetisies

  • 0

Foto van Zesta Vorster: verskaf. Bron van die ATKV se foto’s: https://atkv.org.za/

Naomi Meyer het vir Zesta Vorster, gereelde beoordelaar van die ATKV se redenaarskompetisies in die verlede, vir wenke rondom vanjaar se ATKV-Digipraatkompetisie gevra. Hierdie wenke kan ook gebruik word as mens voorberei vir redenaarskompetisies in die toekoms.

Die inligting oor die Digipraat op die webwerf is baie waardevol en noodsaaklik – net soos die gewone riglyne (dis nie reëls nie!) van die gewone redenaarskompetisie. Ek sou tog mooi daarna kyk en dit so ver as moontlik probeer toepas – veral wat die raamwerk en inhoud van die toespraak betref.

Net ’n paar aanvullende gedagtes: Wanneer jy besluit het wat die doel van jou toespraak is – maw om te vermaak, in te lig, te motiveer of te redeneer – moet jy besin in watter formaat jy dit gaan aanbied (altyd maar begin, middel, einde, ens, nè), en wat die gepaste aanslag sal wees. Elke soort toespraak het sy eie uitdagings.

Die beredenerende toespraak (soos in die gewone ATKV-Redenaarskompetisie vereis word) kan al die elemente van die ander soorte toesprake bevat: vermaak, inligting, motivering (in veral die slot) en beredenering.

Wat aanbieding betref:

Kyk op ooghoogte na die "gehoor" – in die kamera. Afstand is belangrik – ons wil nie meer as kop en skouers sien nie – dit skakel ook lastige, onnodige handgebare uit. Die gesig moet praat! Moenie te veel gebare wys nie. Moenie elke nuwe gedeelte van die gesprek met dieselfde woord begin nie. Lei elke hoofpunt net mooi duidelik in, na ’n effense pouse. Maar moenie oogkontak verloor nie. Moet ook nie staar nie – ontspan, wees aangenaam en natuurlik – deur te dink oor en te bedoel wat jy sê. Verder: Nooit jaag nie – sê eerder minder, maar met pouses en beklemtoning.

Dit klink na baie moets en moenies – maar as jy mooi daaroor dink, is dit alles maar net logies!

Nederig, opreg en aangenaam doen die ding. Onthou, jy praat met ’n mens, nie met die kamera nie.

ATKV-DigiPraat 2020: ’n Zoom-onderhoud

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top