Litnet

Rachelle se publikasies sluit in kortverhaalbundels, romans, bundels essays en kinderprenteboeke. Sy is ook die skrywer van die toneelstukke Die naaimasjien (met Sandra Prinsloo) en Rondomskrik (met onder andere Shaleen Surtie-Richards, Lee-Ann van Rooi en Richard September). Haar werk is meermale in verskillende genre’s bekroon, en sy is die fasiliteerder en aanbieder van die skryfskool by die Breytenbachsentrum op Wellington.

Sy het B.Drama aan die Universiteit van Stellenbosch studeer en daarna Honneurs in Joernalistiek (cum laude). Later kry sy ’n Meestersgraad in Kreatiewe Skryfwerk (cum laude) aan die Universiteit van Kaapstad. Sy was verbonde aan die redaksie van NG Kerk-Uitgewers, Die Burger en Huisgenoot en was vir ses jaar die boekeredakteur by Rapport. Tussendeur werk sy as redigeerder, manuskripontwikkelaar en mentor van nuwelingskrywers, vertaler, joernalis en boekeresensent.

Sy debuteer in 1990 met Die rugkant van die bruid waarvoor sy ’n CNA-prys kry. In 2002 kry sy die RAU-prys vir Skeppende Skryfwerk vir haar kortverhaalbundel Merke van die nag. Van haar kortverhale is opgeneem in bundels wat in Amerika (New Letters), België (Deus ex machina), Denemarke (Opbrud) en Nederland (Dochters van Afrika) verskyn het.

Het jy geweet?

Die naaimasjien was een van die gewildste ooit teaterstukke in Suid-Afrika, en het in Engels ’n draai by die Edinburgh-kunstefees in Skotland gemaak. Dis intussen verfilm en is een van die toneelstukke wat in die grendeltyd aanlyn gestroom word, steeds met Prinsloo in die hoofrol.

Sy het die Skryfskool by die Breytenbachsentrum op Wellington begin en fasiliteer dit steeds steeds. As boekeredakteur het sy die boekebylae Rapport Boeke begin.

Sy het twee seuns, Albertus en Ferdinand Kidd, en woon in die suidelike voorstede van Kaapstad.

Bekronings
CNA-debuutprys (1991) – Die rugkant van die bruid 
Sanlam-letterkundeprys (1999) – Vir die kortverhaal “Tell him it is never too late” 
ATKV-kinderboekprys 3–5 jaar (2000) – Net perfek 
RAU-prys vir skeppende skryfwerk (2002) – Merke van die nag 
Wenner van die Woordfees se nasionale Afrikaanse kortverhaalkompetisie (2005) – vir haar kortverhaal, “Swiets in Rhodesië”. 
Nagtegaal-teksprys (2008) – Vir Die naaimasjien (toneelstuk)
KKNK se Herrie-gewildheidsprys (2009) – Die naaimasjien
Fleur de Cap Beste Inheemse teks (2010) – Die naaimasjien

ATKV Beste Inheemse Teks - Rondomskrik
Lys van publikasies
Prosa
1990 Die rugkant van die bruid (kortverhale) 
1993 Onwaarskynlike engele (kortverhale) 
1996 Al die windrigtings van my wêreld (roman) 
1998 Spektakels en mirakels (sketse) 
2001 Merke van die nag (kortverhale) 
2002 Hanna (roman) 
2006 Palazzo van die laaste dans (kortverhale) 
2008 Alles behalwe die geheim van my whiskies (rubrieke)
2011 Die naaimasjien (toneelstuk) LAPA Uitgewers

Die naaimasjien en ander stories (kortverhale)

Kinderboeke
1996 Enebene en die ander (’n Ster-storie) 
1999 Net perfek
2004 ’n Ma moet soms jok (Rimpelstories)
Samesteller
1993 Veerkrag
1994 Lyfspel/Bodyplay: erotiese kortverhale deur Suid-Afrikaanse vroue

‘n Keur uit Petra Müller se kortverhale

Bloemlesings

1991 Vuurslag
1992 Die wond en ander verhale
1994 Vrouevertellers
1998 The torn veil
1998 Borde, borde, boordevol
1999 Die mooiste liefde is verby
1999 Vonkfiksie

2007 Desembers  (‘n Keur uit die kortverhale van Petra Müller)

2013 Skarlakenkoors

2016 Woordfees-kortverhaalbundel Bly

2017 Kleure van die liefde

2018 Woordfees-kortverhaalbundel 100%

2019 My Mother’s Mother’s Mother – SA Women’s Writing from the 17th Century Dutch to Contemporary Afrikaans

2019 Die Nuwe Afrikaanse Prosaboek

Vertalings
Al die windrigtings van my wêreld (1996) 
Duits (Wohin der wind dich trägt, 1999), Nederlands (Alle windrichtingen van mijn leven, 2002; Het huis aan de voet van de Tafelberg, 2004)
Uittreksels uit resensies
“Greeff’s play (Die naaimasjien) is a precious gift: it is an accomplished, and triumphant, celebration of what it means to be human.” – Tyrone August, Cape Times, 17 February 2011.
“Greeff op dreef is super-onderhoudend. Sy is lakonies, wrang, filosofies en snaaks.” – Deborah Steinmair oor Alles behalwe die geheim van my whiskies, LitNet (2008)
“Rachelle Greeff se Palazzo van die laaste dans is ’n sterk en betowerende bundel. Dit is ’n dans van woorde wat die leser meesleur en intrek. Dit is ’n ode aan die laaste dans en die lewe as repetisie hiervoor.” – Madri Victor, LitNet (2007)
“Greeff skryf besonder visueel, sensueel meevoerend en is 'n vernuftige storieverteller wat die leser se aandag van die eerste sin in beslag neem. Merke van die nag is 'n bundel van ’n besondere allooi, een van die allerbeste wat die laaste paar jaar verskyn het.” – PH Roodt, Beeld (2001)
“Die navorsing is goed, die karakterbeelding getrou en die beeld van die vuurtoring, ook op die mooi, evokatiewe buiteblad, goed geïntegreer.” – Cecile Cilliers oor Hanna, Volksblad (2002)
“Nogtans illustreer hierdie roman waarom Greeff 'n steeds prominenter plek begin inneem in die galery van vroulike Afrikaanse skrywers. Hanna is 'n genietbare boek, met 'n positiewe, bemoedigende slot, vol van die troos wat volg wanneer twee uiteenlopende enkelinge saam op een wysie begin dans.” – Dorothea van Zyl oor Hanna, Die Burger (2002)