Litnet

Eben Venter (1954–) het op ’n skaapplaas in die Oos-Kaap grootgeword.

Op Grey Kollege in Bloemfontein was hy bevoorreg om Charles Malan, ware pedagoog, as Afrikaans-onderwyser te hê.

Hy behaal ’n MA in filosofie aan die Universiteit van Port Elizabeth (nou Nelson Mandela Universiteit) en skryf ’n proefskrif oor die laat filosofie van Max Horkeimer van die Frankfurt-skool.

In 1986, die jaar van die groot noodtoestand in Suid-Afrika, emigreer hy na Australië. Daar is hy eienaar-sjef van Wild Rice, ’n makrobiotiese kafee in Melbourne. Ook in 1986 debuteer hy met die kortverhaalbundel Witblitz, en in 1993 verskyn sy debuutroman, Foxtrot van die vleiseters. Hierdie roman palm die WA Hofmeyr-prys in, en Venter sou daarna vir vier verdere romans die WA Hofmeyr-prys wen.

Vir ’n paar jaar woon hy en sy lewensmaat, Gerard Dunlop, in Prins Albert, Wes-Kaap, waar hy sy vyfde roman, Horrelpoot, voltooi. As Trencherman deur Luke Stubbs vertaal, verskyn die roman, en sy latere Wolf, wolf, in beide Australië en Engeland. Talle van sy kortverhale is ook in versamelbundels opgeneem, mees onlangs in The new century of South African short stories.

Eben en Gerard woon op die ooskus van Nieu-Suid-Wallis. In Februarie 2022 tref ’n vloed hulle dorp; hulle huis word oorstroom en Venter se kosbare biblioteek spoel weg.

Venter het ’n DPhil van die Universiteit van Queensland, waar hy sy proefskrif oor ’n teorie van selfvertaling geskryf het.

Sy mees onlangse roman, Decima, oor die lewensloop van ’n swartrenoster, skryf hy in Engels, waarna hy self die storie vertaal of in Afrikaans herskep (onder dieselfde titel). Die South African Literary Award, of Sala, word in 2024 aan hom as literêre vertaler van Decima toegeken, en in 2025 word die Afrikaanse Decima met die Hertzog-prys vir prosa vereer.

Eben was in 2022 een van die raadgewende skrywers vir die LitNet-slypskool Om te skryf. Sy verslae oor die deelnemers se verhale is op hierdie blad beskikbaar.

Ander artikels deur Eben Venter:

• “Wandeling op Welgevonden” oor Etienne Leroux se Sewe dae by die Silbersteins (Rapport, 2025)
• “Olga Kirsch: ’n Vreemde boom op hierdie aarde” (Werkwinkel 9(2), 2014)
• “Loss and mourning: Writings on death and its appeal to the reader” (Werkwinkel 1(1), 2006)