Frazer Barry
Frazer Barry, gebore en grootgeword in Kleinmond. Hy is al vir meer as 20 jaar besig om verhoë nasionaal en internasionaal (Nederland en België) met Afrika-klanke te betower. Hy is al bekroon met verskeie toekennings vir musiekteaterproduksies waarby hy betrokke was, oa Lepeltjie vol snare en Die riel van hip hop. Frazer was verantwoordelik vir die musikale regie in beide produksies. Lepeltjie vol snare, met die legendariese Hannes “Slide Spoon” Coetzee, was ook genomineer vir ’n Fiësta-toekenning en het in 2018 ’n Kanna-toekenning ontvang vir beste musiekproduksie. Die kô lat ôs sing-produksie waarin Frazer nuwe musiek gekomponeer het vir Adam Small-gedigte, was ook bekroon met ’n Woordfees Trofee en kykNET Fiësta-nominasie.
Woorde op akkoorde, wat hy saamgestel het, is in 2019 vir drie Kanna-toekennings benoem: beste musiekproduksie, beste opkomende kunstenaar en bydrae tot literatuur, en is ook ’n groot hoogtepunt. Die produksie is ook genomineer vir ’n KykNET Fiësta-toekenning in 2020. Die Jakkals en Wolf-produksie waarin hy ook musikale regisseur en musikant was, met SU-Dramastudente, is ook genomineer vir ’n Kanna en is bekroon met ‘n kykNET Fiësta vir beste duo of ensemble.
Frazer doen klankontwerp vir verskeie projekte en was ook akteur in die internasionale verhoogproduksie Krotoa: Eva van de Kaap. Die produksie het in 2018 vir twee maande in Nederland getoer en was in 2019 uitverkoop by Kunstekaapteater. Eva van de Kaap is tydens die Vrystaat Kunstefees 2019 genomineer vir beste Suid-Afrikaanse debuutproduksie.
Frazer het ‘n fyn aanvoeling vir sielvolle musiek met ‘n sterk Afrika-aanslag. Sy musiekrepertoire van genres wissel van Afrika-ritmes, blues, funk en folk tot reggae, jazz, rielmusiek en hip-hop. Temas wissel van protes tot opgewekte tradisionele Boland- en Kaapse klanke. Hy is ’n musikant (komponis, musiekvervaardiger, sanger, rymkletser, skrywer, digter) en is voorsanger van Tribal Echo Band. Die groep het alreeds twee albums agter die rug: Grafte oppie Vlakte en Onner Afrika son. Hy werk tans aan sy eie solo-album, wat in 2020 die lig sien.
’n Podsending met Frazer Barry
2020-11-11Robyn van de Rhede gesels met Frazer Barry, voorsanger van Tribal Echo Band, oor sy werk en sy betrokkenheid by die Vrystaat Kunstefees 2020, die Suidoosterfees 2020, asook die Jakes Gerwel Stigting en die Suidoosterfees se mentorskap-program vir opkomende liriekskrywers en sangers, waar Frazer as mentor opgetree het.
Toyota US Woordfees 2020: Woorde op akkoorde ‒ ’n viering van klank
2020-02-19"Mense moet nie vergeet dat hulle op die enigste planeet wat hulle hul tuiste kan noem, woon nie. Ons hoop dat die produksie die gehoor gaan aanspoor om die aarde lief te hê en te versorg."
Week van de Afrikaanse roman 2019: onderhoud met Frazer en Deniel Barry
2019-09-12"Ons hoor gewoonlik dat jy net stadig moet praat indien jy as Afrikaanssprekende in Nederland ’n gesprek voer. Alhoewel dit by tye werk, gaan jy agterkom dat Afrikaans in Afrika gevorm is en daarom ’n heeltemal nuwe taal is met oorblyfsels van ou Nederlandse woorde."
Frazer Barry oor Festival voor het Afrikaans 2018
2018-09-11"Afrikaanse, Afrika-, Nederlandse en Vlaamse kunstenaars het groot komponente van hul tale as ’n gemene faktor. Interpretasie en aanbieding is ’n gebied waarop ons baie by mekaar kan leer. Dit is nie lekker om in isolasie te kuns nie. Mens sou graag wou glo dat ’n mens uniek is, maar die realiteit is dat al ons idees en dinge wat ons bereik, geïnspireer is deur iemand of iets anders. Ons staan op berge van informasie en ons is ewige sponse."
Wat is op jou bedkassie? Frazer Barry antwoord
2017-12-22LitNet het aan ’n paar lesers gevra watter boek of boeke wag op hul bedkassie vir die rustyd tussen Kersfees en Nuwejaar. Lees Frazer Barry se antwoord.