Frédéric Chopin

  • 2

vir Joseph Stanford

altyd by jou
in amber lamplig die arabeske mot

wanneer jy by jou lessenaar sit
geboë oor die vokalise in ambergrys genoteer

ʼn skuldbrief
aan bloederige slym
môreoggend
in ʼn wit porselein kamerpot opgehoes

die wat fyn luister
hoor soms in jou werk

op ʼn loopgang
treë
die een voet voor die ander neergesit

ʼn reis afgelê
tot hierdie staar
in Louis-Auguste Bisson se ateljee

jou hare
sorgvuldig gekrul

sakke onder die oë
geswolle gesig

die swart sykrawat
virginaal om jou nek gestrik
van onbesproke snit
in breë lapelle
jou jas van dienlike dik visgraatstof

oorskrydend naspeurbaar
ʼn druppel bouquet de Chantilly
met ʼn glasstoppertjie
op polse en in die waaie van arms gestip

jou hande
lig in jou skoot gevou

ʼn vitterige nabetragting
oor die afwerking in die fourchettes
van wit aandhandskoene

vanuit sy hoë nok
stoot die vlermuis ʼn twygwerk
vyfvingerig deur donker vlerke
dunner as voorhuid

tuimelend in skemer ontkluistering
klein flâneur
die self in sy kaatsing teruggevind

bo
die struik se skimmige koraal
vlymgrynsend
hangend tussen trillende patagia
die onteks van ontglaasde ogies

in waterklare lakwerk
die blom
in nagwit
ontfrommelend

 

Lees ook

JM Coetzee

Joe Orton

Philip Larkin

  • 2

Kommentaar

  • Mooiste beskrywende beelde ... so gemaklik vind selfs die vlermuis
    sy plek. Dit noop my om weer 'n keer na Chopin se musiek te luister.

  • A beautiful poem; both poignant and enchanting. Your poetry brings me back to an era and makes me want to read more. Beautiful and eloquent words which breathe life into the page.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top