Litnet

Wannie Carstens skryf op Facebook:

Die 49 “vlugtelinge” na die VSA het elkeen ’n eie verhaal te vertel – ons kan van hulle verskil oor hulle hoe die geleentheid gebruik het. Ons weet nie wat in elkeen se lewe gebeur het dat daar besluit is om sover te gaan nie – om alles (ook familie) agter te laat en op so ’n omstrede wyse die land te verlaat, was beslis nie maklik nie.

Dit sal wel beslis misdaad (aanvalle op ’n plaas, gesins- of familielede wat vermoor is, kapings, huisinbrake, ens.) en ’n moedeloosheid wees met die wêreld waarin hulle in SA ’n bestaan moes maak, wat tot so iets moes laat oorgaan het. Die ANC het SA in 30 jaar verniel om dit ligweg te stel.

Maar vir die president om te kom en die betrokkenes as “lafaards” te etiketteer, is ’n stap te ver. Dit is bedenklik. Dat hy nie die vermoë het om na binne te kyk oor sy party se aandeel aan die skep van so ’n onrustige klimaat nie, getuig van iemand wat die skuld vir sy eie gebreke op ander verplaas.

En is die bykans 1 miljoen SA burgers wat sedert 1994 gemigreer het om beter geleenthede elders te ontgin, ook almal lafaards en anti-transformasie?

Dit was die man wat ons in 2018 beskou het as die “redder” na die Zuma-jare, maar die teleurstelling in hom is enorm. Maar nog te meer dat hy so laag daal, is bewys van ’n gebrekkige karakter (ons almal weet hy is met ’n groot mond en sonder ’n ruggraat gebore). Dit is ook bewys van ’n gebrekkige oordeel. Van ’n president verwag ’n mens beter.

Lees en kyk ook:

Die 49 wit Afrikaanssprekendes in die VSA: "vlugtelinge" of vlugtelinge?

Wat sê Bettina? Ope brief aan Afrikaner-vlugtelinge op pad na Daddy Trump toe