Litnet

Johann P Boshoff (Jan Kempdorp, 1956) het sy kleinkinddae in Johannesburg deurgebring, in 1973 aan die Hoërskool Sentraal Bloemfontein gematrikuleer en in Maart 1983 sy BA Hons. in Afrikaans-Nederlands (letterkunde) aan die Universiteit van Johannesburg (destyds RAU) verwerf.

Boshoff was beroepsgewys onder meer (in volgorde) vryskutakteur, onderwyser en taalpraktisyn. As laasgenoemde het hy uiteindelik op 30 Maart 2004 uitgetree as hoof van Afrikaanse vertaling en redigering van die Nasionale Taaldiens, Departement van Kuns en Kultuur, Pretoria. Daarna verhuis hy en spits hom sedertdien toe op sy skryf-, joernalis- en vryskuttaalwerk, met slegs twee kort tussenspele as senior koerantsubredakteur (kopiesub) in Johannesburg en Bloemfontein.

Boshoff, multigenreskrywer, publiseer sedert 1983 (as solo-publikasies en bydraes tot versamelbundels) aanvanklik grootliks akademies en, sedert 1998, veral nie-akademies, te wete poësie, literêre prosa, Christelike oordenkingsbundels en joernalistieke werk, met lg. hoofsaaklik "sagte" nuus en resensies. Altesame 34 boeke het reeds onder sy naam verskyn.

Hy het die gewoonte om meer as een boek gelyk bekend te stel – 1998, 2002, 2006 en 2009. In 2011 doen hy dit weer op die Vryfees (voorheen Volksblad-kunstefees) in Bloemfontein.

Sy grootste eerbewys was toe hy in Februarie 2008 as Afrikaanse Skrywer van die Dekade (vir die bevordering van nasiebou deur veeltaligheid) deur die Pan-Suid-Afrikaanse Taalraad (Pansat) vereer is.