Toyota US Woordfeesbundel 2020: ’n onderhoud met Hendie Grobbelaar

  • 3

LitNet plaas oor ’n tydperk van ’n maand onderhoude met die skrywers wie se verhale vanjaar in die Toyota US Woordfeesbundel opgeneem word. 

Hendie Grobbelaar (foto: LitNet)

Hendie Grobbelaar vertel vir Naomi Meyer van haar kortverhaal wat vanjaar in die Toyota US Woordfeesbundel opgeneem word.

Hendie, waaroor handel jou kortverhaal en wat was die inspirasie daarvoor?

Die tema van my verhaal, "Moltrein", is bendegeweld en die impak daarvan op gesinne en veral jong kinders. Dit is die verhaal van Gertina, ’n negejarige  meisie wie se pa haar probeer beskerm teen die fisiese en psigologiese impak van die geweld. Maar, dan word die bordjies ’n bietjie verhang ...  My inspirasie kom maar van die hartseerstories van gesinne en kinders wat vasgevang word in ’n lewe van geweld – iets wat nie hulle skuld is nie, of waaraan hulle niks kan verander nie. In so baie woonbuurte in ons land word hierdie oorlewingstryd ’n daaglikse normaliteit. Dit is so bitter hartseer!

Wil jy iets vertel oor die skryfproses daarvan? Het jy die verhaal vooraf beplan of het dit organies ontwikkel? Afronding, redigering?

Ek het gewoonlik ’n tema wat my prikkel en dan probeer ek’n hoofkarakter skep wat die leser ten beste sal betrek by die boodskap wat ek wil oordra. In hierdie geval het ek ’n kind gekies wat deernis sal ontlok en hopelik ook begrip vir gesinne se hulpeloosheid wanneer hulle min kan doen aan hulle omstandighede. Die verhaal was grootliks beplan, maar die slot het organies ontwikkel. Ek het ’n ander slot vir my storie gehad maar die hoofkaraktertjie het anders besluit! Nadat ek die storie geskryf het, moes ek hom eers laat "ryp word" vir ’n week of twee terwyl ek met die karakters in my kop geworstel het. Soos wat die tyd aangaan, werk elke karakter eintlik sy eie paadjie uit en ek het net die woorde gaan regtrek. Ek weet hierdie maak dalk net sin vir mense wat self skryf, maar dit is belangrik dat lesers ook besef dit is nie net ’n spul woorde wat jy agtermekaar sit en ’n storie "gebeur" nie. Daar is baie konflik, besprekings en wroegings agter die rekenaarskerm aan die gang, maar dit bly ’n voorreg en heerlikheid om daardie storie vir die lesers te kan gee.

Gaan jy vanjaar die Toyota US Woordfees kan bywoon, en indien wel, en as jy reeds tyd gehad het om na die program te kyk, is daar enige items waarna jy op die program uitsien?

Ek beplan beslis om die eerste naweek by te woon en het nog nie in diepte na die eerste drie dae gekyk nie. Gewoonlik loop ek net die eerste dag of twee rond en drink die atmosfeer, mense,  kleure en klanke in; dan besoek ek graag die kunsuitstallings en gesprekke wat aangebied word by van die oop venues. Natuurlik is die boekwinkel heel bo aan my besoeklysie!  Ek wil dit graag weer doen en dalk nog ’n musiekgeleentheid inpas. Die Toyota US Woordfees gee my ’n inspirasie-inspuiting soos min. Gewoonlik skryf ek ’n tornado wakker as ek terugkom!

  • 3

Kommentaar

  • Ek weet nie of hierdie die regte plek is vir my navraag nie, so verskoon tog as dit nie is nie.
    Ek het ook ingeskryf vir die Woordfeesbundel en ek sal graag wil weet waar ek die volledige lys van aanvaarde stories kan kry.
    Baie dankie

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top