Toyota US Woordfeesbundel 2020: ’n onderhoud met Gerda Taljaard

  • 0

LitNet plaas oor ’n tydperk van ’n maand onderhoude met die skrywers wie se verhale vanjaar in die Toyota US Woordfeesbundel opgeneem word. 

Gerda Taljaard (foto: Joanne Olivier)

Gerda Taljaard vertel vir Naomi Meyer van haar kortverhaal wat vanjaar in die Toyota US Woordfeesbundel opgeneem word.

Gerda, waaroor handel jou kortverhaal en wat was die inspirasie daarvoor?

’n Middeljarige vrou neem twee tienerkinders onder haar vlerk nadat hulle wees gelaat is weens moord op hul ouers. Van die begin af is dit duidelik dat sy haar hulp verleen weens ’n obsessie met hulle skoonheid, nie omdat sy werklik vir hulle jammer voel nie. Later blyk dit dat ook die twee kinders nie is wat hulle voorgee om te wees nie. Vandaar die verhaaltitel “Drakebloed”, wat nie net verwys na ’n soort toksiese plant wat die hoofkarakter gebruik om haar planne ten uitvoer te bring nie, maar ook na die aard van al drie karakters. Bose bloed vloei in hulle are ...

Dis altyd moeilik om ná die skryf van ’n verhaal te reflekteer oor waar die inspirasie daarvoor vandaan gekom het, maar ek het dié storie geskryf met die skilders Hans Holbein en Cornelis de Vos se kinderportrette in my agterkop. Verder het ek tydens die skryf van “Drakebloed” aanhoudend na Kathleen Ferrier-opnames van Mahler se Kindertotenlieder geluister. Dan kry ek nooit genoeg van film noir “movie stills” nie, en dit het al tot vele verhale aanleiding gegee. Die somber melodrama daarvan het ’n definitiewe invloed op “Drakebloed” se visualiteit.

Wil jy iets vertel oor die skryfproses daarvan? Het jy die verhaal vooraf beplan of het dit organies ontwikkel? Afronding, redigering?

Ek is nie ’n goeie beplanner nie. ’n Paar idees spook by my, en die res gebeur “vanself” op die rekenaarskerm. Dit was dan ook die geval met “Drakebloed”. Ek staan egter geweldig baie tyd af aan afronding en redigering. “Drakebloed” het agt maande geneem om ten volle te ontwikkel.

Gaan jy vanjaar die Toyota US Woordfees kan bywoon, en indien wel, en as jy reeds tyd gehad het om na die program te kyk, is daar enige items waarna jy op die program uitsien?

Ja! Dis die enigste kunstefees wat ek, sonder uitsondering, elke jaar bywoon. Die dramaverwerkings van Valsrivier en Kamphoer; die toneelstukke Donkie, Die negende stap en Kraai. Uitvoerings van klassieke musiek, veral die kore! Verskeie boekgesprekke ...

  • Taljaard is die enigste skrywer wie se kortverhale al vyf keer agtereenvolgend in die Woordfeesbundel (2015-2020) opgeneem is.

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top