PEN Afrikaans Nuusbrief: Maart 2019

  • 0

Beste lede en vriende van PEN Afrikaans
 
Resensiekursus, slypskool en skrywerskamer by die US Woordfees


Die US Woordfees is pas verby en dit was inderdaad ’n fees met iets vir almal op die program.
 
PEN Afrikaans was betrokke by die boekresensiekursus in samewerking met Netwerk24 en NB-Uitgewers, asook die WOW-Skryfskool vir jong skrywers, wat in samewerking met die ATKV-Skryfskool aangebied is. Die terugvoer wat ons oor die twee kursusse ontvang, is oorweldigend positief. Dankie aan die aanbieders wat hul so goed van hul taak gekwyt het.
 
Ons het ook die Skrywerskamer in die statige Ou Hoofgebou behartig. Baie dankie aan diegene wat ’n draai kom maak het. Dit was lekker om julle daar te sien.

 
 
PEN Afrikaans veroordeel aanval op joernalis Karima Brown en mediavryheid in Suid-Afrika

 

Die maand is egter tot dusver nie net feestelik nie. Daar was ook ’n kommerwekkende aanval op joernalis Karima Brown wat nie ongesiens verby kan gaan nie. Dit het ironies genoeg die viering van Internasionale Vrouedag op 8 Maart voorafgegaan. Hier volg PEN Afrikaans se verklaring oor dié insident, wat ook hier in Engels beskikbaar is:
 
Sedert die aanlyn publikasie van ’n WhatsApp-boodskap van joernalis Karima Brown, wat per abuis na die EFF se WhatsApp-groep vir mediaverklarings gestuur is, het Brown deurgeloop onder skokkende dreigemente en teistering, wat hoofsaaklik op Twitter versprei is deur die leierskap en ondersteuners van die EFF.
 
Die EFF se mediaverklaring oor die aangeleentheid, gedateer 6 Maart 2019, etiketteer Brown as ’n ANC-verteenwoordiger in stede van ’n joernalis, en bevraagteken haar integriteit en die aard van haar posisie binne eNCA. Dit bevat geen verskoning vir die publikasie van Brown se selfoonnommer op Twitter nie, ’n ernstige skending van haar reg op privaatheid, en veroordeel nie die stortvloed intimidasiepogings, neerhalende opmerkings en dreigemente van geweld waaraan sy sedertdien onderwerp word nie.
 
Dit is ’n skokkende aanval op me. Brown se reg op privaatheid en haar fundamentele reg op vryheid en sekuriteit van die persoon, maar ook op mediavryheid in Suid-Afrika, soos aangedui deur die Nasionale Redakteursforum in ’n verklaring wat PEN Afrikaans ten volle steun. Hierdie soort gedrag is veral kommerwekkend gegewe die hoë voorkoms van geweld teen vroue in Suid-Afrika.
 
As ’n organisasie wat vryheid van uitdrukking en mediavryheid verdedig, veroordeel PEN Afrikaans die aanval ten sterkste en ons doen ’n beroep op die EFF-leierskap om dieselfde te doen.
 
’n Skrywersresidensie in samewerking met die Jakes Gerwel Stigting

Tyd om onverpoosd te skryf, is ’n versugting van menige skrywer. Die oorgrote meerderheid skrywers kan nie wegkom van hulle dagtake nie en vind dikwels nie genoeg tyd om ordentlik te sit en skryf nie. Boeke bly só ongeskryf en waardevolle talent word nie ten volle benut nie.

Die Jakes Gerwel Stigting en PEN Afrikaans is opgewonde om vanjaar ’n skrywersresidensie te loods wat aan skrywers die kans gee om vir ’n maand in die Gerwel-huis tuis te gaan om aan ’n skryfprojek te werk.
 
Opbetaalde lede van PEN Afrikaans kan tot 12 April aansoek doen vir hierdie gulde geleentheid.
 
Volledige inligting is hier beskikbaar. Lees gerus ook hierdie berig.
 
Verwikkelinge rondom die Wysigingswetsontwerp op Outeursreg

 

Die Wysigingswetsontwerp op Outeursreg is, ná aanvaarding deur die Nasionale Vergadering in Desember 2018, na die Gekose Komitee oor Handel en Internasionale Betrekkinge van die Nasionale Raad van Provinsies verwys. Die komitee het, gegewe die groot openbare belang van die onderwerp, vermoedelik ’n stortvloed voorleggings ontvang toe hulle die publiek uitgenooi het om teen 22 Februarie kommentaar op die wetsontwerp in te dien.
 
PEN Afrikaans het van die geleentheid gebruik gemaak om die petisie wat ons einde verlede jaar in samewerking met PEN South Africa en ANFASA van stapel gestuur het, onder die aandag van die Gekose Komitee te bring. Aangesien die wetsontwerp onveranderd aanvaar is, geld die besware en die bekommernisse van die ondertekenaars steeds en dit is vir ons belangrik om toe te sien dat die stem van ons lede en die groter skeppende bedrywe gehoor word. Meer inligting oor die petisie is hier beskikbaar.
 
Ons is bly om te berig dat die Minister van Handel en Nywerheid ’n brief aan ons, PEN South Africa en ANFASA gerig het na aanleiding van die voorlegging van hierdie petisie. Alhoewel die brief getuig van vaste (en volgens ons misplaaste) idees oor beleidsoorwegings, is ’n reaksie tog bemoedigend.  Dit is die eerste keer dat ons ’n antwoord op enige van ons voorleggings gekry het. Dit is te danke aan die grootskaalse ondersteuning van die protesaksie wat dit beslis moeilik gemaak het om te ignoreer. Nogmaals dankie aan almal wat deelgeneem het. Ons formuleer tans 'n antwoord op die minister se brief.
 
’n Onafhanklike petisie is intussen geloods en is hier beskikbaar vir ondertekening. Ons moedig ons lede aan om ook hierdie protesaksie te ondersteun indien jul daarmee saamstem. Hoe meer waarnemers daar is en hoe meer stemme opklink, hoe minder ruimte is daar vir die besluitnemers om later onkunde te pleit of die wetsontwerp sonder meer te aanvaar.
 
ANFASA het op 19 Februarie ’n simposium oor die verwagte impak van die wetsontwerp aangebied. ’n Verslag oor die verrigtinge is hier beskikbaar.
 
Charl-Pierre Naudé skryf oor skrywersnetwerke en -residensies

 

In ons nuwe artikelreeks skryf skrywers oor ’n aantal onderwerpe wat met die wêreld van die skrywer te doen het. Hier is Charl-Pierre Naudé se stuk oor skrywersnetwerke en -residensies.
 
Lekker lees!
 
Ledegeld
 
Fakture vir ledegeld is uitgestuur. Baie dankie aan almal wat hul fakture reeds vereffen het. Laat weet asseblief na penafrikaans@gmail.com as jy nie ’n faktuur ontvang het nie, maar graag ’n opbetaalde lid van PEN Afrikaans wil wees.
 
Opbetaalde lede van PEN Afrikaans kan nie net in aanmerking kom vir die skrywersresidensie en gratis bywoning van Tuin van Digters nie, maar kry tot einde Maart ook 15%-korting by PharosAanlyn, Pharos se versameling aanlyn algemene en vakwoordeboeke.  PharosAanlyn is ’n omvattende naslaanbron vir elkeen wat effektief in Afrikaans, Engels en ander tale wil kommunikeer. Hierdie versameling sluit ’n wye verskeidenheid tegniese woordeboeke in en word deurlopend aangevul wanneer nuwe titels verskyn. Daar is tans meer as 30 woordeboeke in die versameling.
 
Ná vereffening van die faktuur vir ledegeld, kan opbetaalde lede van PEN Afrikaans ’n e-pos stuur aan sales@pharosonline.co.za om ’n koeponkode te kry. Lidmaatskap moet bevestig word deur ’n kwitansie vir 2019-ledegeld by die e-pos aan te heg.  
 
Maandelikse resensie-oorsig

 
Klik hier vir ons oorsig van Afrikaanse resensies wat in Februarie 2019 verskyn het en digitaal beskikbaar is. Hierdie oorsig sluit boekbesprekings, boekgesprekke en voorlesings in wat op die radio of TV uitgesaai is.
 
Indien jy weet van ander gerekende publikasies wat ook Afrikaanse resensies en boekgesprekke plaas en dit digitaal beskikbaar maak, laat weet asseblief na penafrikaans@gmail.com.
 
Nuwe Afrikaanse boeke in Maart 2019
 
Ons deel oudergewoonte graag die lys van nuwe Afrikaanse boeke wat hierdie maand verskyn. Baie geluk aan al ons lede wat nuwe boeke op die rak het.
 
Die publikasielyste kan hier in Excel-formaat afgelaai word.
 
Welkom aan ons nuwe lede

Ten slotte, hartlik welkom aan ons nuwe lede:

  • Hilda Smits
  • Eloise Wessels
  • Theo Kemp
  • Kirby van der Merwe
  • Mary-Ann Naudé
  • Sunita Keyser
  • Jeremy Vearey
  • Julian Jansen
  • Beyers de Vos
  • Janine van der Linde
  • Ronel Boshoff Bakker

Ons is baie bly dat julle aangesluit het en sien uit na goeie samewerking vorentoe.   
 
Vriendelike groete
Catrina Wessels
Bestuurder: PEN Afrikaans

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top