Liewe Heksie: Flower Power – 'n amperse pantomime was vanjaar by die ABSA KKNK 2015 te sien. Goeie nuus vir Kaapse gesinne is dat hierdie produksie spoedig by die Bellville Stadskouburg speel.
Crystal-Donna Roberts, Emile Minnie en De Klerk Oelofse het vir Naomi Meyer van hulle rolle vertel.
Crystal-Donna, wie speel jy in Liewe Heksie Flower Power?
Ek speel die rol van Kwaaitjie Kabouter, 'n bitter haan, en ek is die trotse kopkant van Griet, die towerperd.
Wat is vir jou lekker van jou karakter en wat is uitdagend?
Wat ek lekker vind met Kwaaitjie is als in die naam ... Kwaaitjie. Hy is hierdie nors "know-it-all", maar hy het ook “likeable” eienskappe. Ek geniet die speelsheid van 'n kabouterseuntjie speel. Daar’s dinge wat mens met jou liggaam en stem kan doen wat net so lekker is. Jy voel soos ‘n kind wat met jou niggies en nefies gespeel het toe julle jonger was. Mens klim weer in daai tyd in en jy gaan weer in daardie gedeelte van jou brein in.
Die haan is 'n crazy rol. Hy praat nie juis baie nie, maar wanneer hy wel sy mond oopmaak, kom jy agter daar is miskien jare se bitterheid wat daar lê. Hy is “no-nonsense and to the point” ... en as mens daardie eienskappe in 'n haankostuum plaas, kan dit net pret wees.
Griet is mos “legendary”, so dit alleen dra groot by tot die lekker daarvan.
Wat is vir jou die belangrikste van jou karakters?
Met al die karakters ... die belangrikste in terme van die stuk as 'n geheel en in terme van die gehoor is rêrig om die gehoor te laat uitstap met 'n breë glimlag op die gesig. Dit kan mens net bereik deur dit rêrig eerlik te speel, maar eerlik binne die rame van pantomime. En wat ek nou al besef het, dat energie baie aansteeklik is. As ons pret het op die verhoog, dan het die gehoor ook pret.
En dan natuurlik ... try to create magic ... as akteurs maar ook binne die konteks van die toneelstuk.
Jy vertolk meestal volwasse karakters in heelwat donkerder en hartseerder dramas. Watter rolle geniet jy die meeste en hoekom?
Ek geniet eerlikwaar alle tipes rolle, veral die soort wat ek nog nie vertolk het nie. Ek sien uit na wanneer ek regte volwasse vrouekarakters gaan vertolk. 'n Ma met vyf kinders wat op die stoep sit en rook want haar kinders en haar man gee haar nonsens. Sulke tipes rolle.
Emile Minnie! Toe Margit vertel Flower Power is "Liewe Heksie op acid", toe wonder ek hoe skryf mens musiek hiervoor. Verklap asseblief jou geheime.
Geheim nommer 1: Trek silwer sequined boots aan en gaan sit voor jou klavier.
Geheim nommer 2: Omring jouself met die Liewe Heksie-span.
Geheim nommer 3: Haak geheel en al uit.
Maar hoe kry mens dit reg dat almal in die familie na dieselfde musiek wil luister?
Music makes the world go round. Ouma kan haar tone wikkel op ‘n hande-in-die-lug-poptreffer, en kleinsus kan bewoë raak op ‘n meesleurende Elton John-ballade. Musiek spreek van die hart tot die hart. Ouderdom is irrelevant.
Onthou jy Ballade vir ‘n Enkeling, die TV-reeks? Toe Die Heuwels Fantasties die temalied herskryf het, het hulle steeds hulde gebring aan Richard van der Westhuizen se oorspronklike lied. Noem jy die karakter steeds Liewe Heksie? Is Levinia steeds haar naam? Of perm jy haar hare met jou musiek, trek jy haar aan in ‘n neonkleurige jassie met wat jy sing?
Daar verwoord jy dit pragtig. Heksie behou haar karakter, maar sy kry beslis ‘n musikale make-over.
Moet die gehoor hulle sangstemme saambring vir die geleentheid?
Die gehoor dans op ‘n kol saam, en hulle gil spontaan wanneer die Geelheks die silwerroos wil steel. Doen maar ‘n strekoefening of twee voor jy die show kom kyk. En sluk ‘n sjerrietjie vir die keel.
De Klerk, wie speel jy in Liewe Heksie Flower Power?
Hi Naomi. Ek vertolk die rolle van Blommie die Kabouter, Borrie en Kerrie (die gifappels, terselfdertyd), Liewe Lotta (die Feëkoningin se bysiende “Lady in waiting”) en Griet die perd (se agterkant).
Wat is vir jou lekker van jou karakter en wat is uitdagend?
Wel, Blommie is lekker, want hy wil eintlik net hê almal moet 'n lekker tyd hê en loop self ook die heeltyd met 'n smile op sy bakkies rond. Borrie en Kerrie is vir my nogal 'n uitdaging omdat ek hulle albei op dieselfde tyd speel. Buiten dat ek aan elkeen 'n fisikaliteit en stem moes gee, moet ek ook kop hou met wie ek op watse stadium is. Dit als gesê, is die truuk met hulle twee eintlik om na “mekaar” te luister, want dan kom die ritme natuurlik. Lotta is 'n absolute fees om te speel! Sy storm net in en doen haar ding terwyl die Feëkoningin konstant haar irritasievlakke toets met haar opdragte. Baie mense sou dink dat Griet se agterkant my blaaskans in die stuk is, maar ek moet mooi kop hou om die lyf by die kop te hou. (Sien jy wat ek bedoel?!)
Wat is vir jou die belangrikste van jou karakter in Flower Power?
'n Karakter soos Blommie sou ek sê is baie funksioneel van aard: hy is 'n baie bekende figuur uit die oorspronklike stories en in ons stuk is hy belangrik in terme van die set-up van ons handeling. Dis vir my nogal 'n mooi oomblik as hy so opreg vir Heksie gaan troos nadat Koning Rosekrans met haar geraas het.
Borrie en Kerrie is natuurlik die Geelheks se dom handlangers. Ek dink omdat die een dom is en die ander een glo hy is nie, is daar potensiaal vir lekker komedie. Die hartseerste ding aan die twee is waarskynlik hulle “looks”!
Lotta is ook nou nie juis iets vir die oog nie ... Maar ek veronderstel dis een van die dinge wat mense die meeste van haar geniet. Sy het haar hartseer oomblikke in die versugtingslied, maar sy draai nie doekies om nie en haar snaaksste oomblik is seker as sy die Feëkoningin aansê om vir 'n slag haar eie kos te proe!
Griet se agterkant se hartseerste oomblik is die feit dat niemand ooit sal weet dis ek nie. Ek speel my hart uit aan die agterkant van daai perd en niemand weet dit nie. Haha. Die snaaksste is seker dan maar as die Geelheks haar onder die perd se stert bevind!
Jy vertolk meestal karakters in volwasse dramas. Watter rolle geniet jy die meeste en hoekom?
Hierdie antwoord is dieselfde as die een wat ek gee as mense my vra wat my gunsteling-seisoen is. Ek het nie voorkeure nie – elkeen is anders en ek geniet elkeen vir wat hy is. As dit 'n sekere seisoen is, rus die onus op jou om die beste daarvan te maak. Elkeen het sy eie uitdagings en soos seisoene is geen twee karakters ooit dieselfde nie. Liewe Heksie: Flower Power speel byvoorbeeld in Blommeland af – hoe dan anders as om 'n klomp lentekarakters te skep!
Liewe Heksie Flower Power
Bellville Stadskouburg: 19-31 Mei – vertonings om 19:00 en Saterdae ook om 14:00 en Sondae om 15:00.
Kaartjies vir volwassenes kos R100 en kinders onder 16 betaal R75.
Kaartjies beskikbaar by Computicket.
Navrae: 021 979 1911 / carnav@mweb.co.za
Ondersteun deur kykNET, Absa KKNK, Hiemstra Trust, TygerBurger, Hollywood Costumes, Hannon, Minuteman Press
