Nuwe stemme 6 – 6 vrae vir Naudé Kritzinger

  • 1

Nuwe stemme 6 het pas by Tafelberg verskyn. Bibi Slippers en Charl-Pierre Naudé is die samestellers van dié bundel, ’n versameling van die beste verse van Afrikaans se opkomende digters.

Liné Enslin gesels met die gepubliseerde digters. Lees hier die ander onderhoude.


 

Naudé Kritzinger

 

1. Beskryf jouself in ses woorde.

Een komma sewe vyf meter lank.

2. Noem ses dinge waarsonder jy nie kan leef nie.

Vrou, kinders, koffie, kos, misterie en klank.

3. Wat is die vreemdste plek of medium waarop of waarmee jy al ooit ’n gedig geskryf het?

Ek’s nie juis ’n extreme poet wat gedigte skryf terwyl ek by ’n vliegtuig uitspring nie. Ek het darem al ’n paar gedigte in die mik van ’n boom sit en skryf. Ek onthou ’n spesifieke maroelaboom – die vrugte in die warm son was besonder inspirerend.

4. Hoe lyk jou werkruimte?

’n Boekrak met teologieserige boeke in. Op die vloer is daar ’n oop paadjie tussen al die musieklêers, kategesemateriaal en ’n ou swemhandoek met 101 dalmations op (oh man!). Kom ons praat nie oor my lessenaar nie. Gelukkig is die hele woonbuurt ook my werkruimte: soveel huise, soveel mense, soveel stories en klanke. What a beautiful noise!

5. Wie is jou gunstelingskrywer of -digter?

As ek iemand móét kies, dan kies ek oorle oom Leonard Cohen, selfs bo die Nobelpryswenner Bob Dylan. Sy skryfwerk is wat my betref ’n spasie waar al die dinge wat ek geniet, saamkom: misterie, sinisme, die estetiese, klank en ritme, godsdiens, seksualiteit – en dit alles met woordekonomie en ’n waardering vir die lewe. Dit help natuurlik dat dit alles musiek word met ’n stem wat uit die aarde kom. Party van hierdie elemente kom natuurlik ook goed na vore in sekere Afrikaanse digters, soos Koos du Plessis, MM Walters, en Van Wyk Louw.

6. Vertel asseblief bietjie meer omtrent een van jou gedigte wat in Nuwe stemme 6 opgeneem is.

“Holberg” is miskien my gunstelinggedig van die ses wat ingesluit is, omdat dit so ’n anderwêreldse en mistiese atmosfeer daaraan het. Stephen King skryf êrens hoe lekker hy voel oor die eerste sin van The Gunslinger: “The man in black fled across the desert, and the gunslinger followed.” Ek het dieselfde gevoel met “Holberg” se begin: “Die oues sê die aarde is/ ’n kremetart en oud.” Ek onthou ek het dit net na Paasfees geskryf, met die interpretasie van sommige Christene in my agterkop waar Jesus na die doderyk neergedaal het en siele daar bevry het. Op die ou einde kon hierdie Christelike elemente nie lekker met die Afrika-mistiek gel nie en het die gedig sy eie gang dikteer. Die laaste strofe het ontstaan nadat eers Charl-Pierre Naudé my in die redigeringsproses uitgedaag het toe hy sê dat iets nog kort.

Kyk hier na ’n video waarin Naudé sy gedig "Holberg" voorlees.

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top