Nuwe stemme 6 – 6 vrae vir Elna van Niekerk

  • 1

Nuwe stemme 6 het pas by Tafelberg verskyn. Bibi Slippers en Charl-Pierre Naudé is die samestellers van dié bundel, ’n versameling van die beste verse van Afrikaans se opkomende digters.

Liné Enslin gesels met die gepubliseerde digters. Lees hier die ander onderhoude.


 

Elna van Niekerk

 

1. Beskryf jouself in ses woorde.

Sjoe, dis moeilik – ’n sin met ses woorde of ses karaktertrekke?

Regverdig, besluiteloos, introvert, geduldig, nuuskierig, eiewys (my man het die laaste een aangebied).

2. Noem ses dinge waarsonder jy nie kan leef nie.

  1. Tyd in die veld (verkieslik alleen).
  2. My man en kinders.
  3. My vriendinne en my suster – het ’n paar vriendinne wat van meer as vier dekades kom.
  4. Die internet en selfoon – toegang tot inligting, kommunikasie en dis sommer ook ’n notaboek.
  5. Boeke in ’n stapeltjie langs my bed.
  6. Musiek.

(Daar is nog baie dinge.)

3. Wat is die vreemdste plek of medium waarop of waarmee jy al ooit ’n gedig geskryf het?

Ek het al ’n konsep met lipstiffie geskryf agter op ’n stukkie rommelpapier. Ook al in die grond geskryf en dan met die selfoon afgeneem.

4. Hoe lyk jou werkruimte?

Ek sal liewer nie ’n foto stuur nie, want my werkruimte is (op die oog af) chaoties. My laptop is eintlik my kantoor. Ek kan enige plek sit en werk.

5. Wie is jou gunstelingskrywer of -digter?

Dit verander van tyd tot tyd. Ek lees baie digbundels en merk die gedigte waarvan ek hou, onderstreep die frases in die gedig wat my tref, kom dan daarna terug om weer te lees.

Ek kom gereeld terug na Wilna Stockenström en Antjie Krog. Ek lees graag Pablo Neruda hardop wanneer ek alleen is.

6. Vertel asseblief bietjie meer omtrent een van jou gedigte wat in Nuwe stemme 6 opgeneem is.

Soms loop ek lank met ’n idee rond en skryf baie bladsye voordat iets uiteindelik in ’n gedig vorm aanneem. Ander gedigte gebeur vinnig (alhoewel mens tog daarna nog slyp).

Die gedig “smokescreen”: ek het in die Marico-bosveld gesit en skryf een baie koue wintersnag. Die krag was af (soos baie keer daar gebeur). Daar is een van daardie klein swart antrasietstofies, maar ek het hout gebruik om dit aan die gang te kry en die hele vertrek was vol rook – ook my klere. Papiere en papiere vol geskryf (die vorige eienaar het ’n groot pak van daardie outydse drukkerspapier met die gaatjies aan die kant daar gelos). Van die klaargeskryfde goeters frommel ek dan op en gooi in die stofie.

Ek het net skielik die beeld gesien van hoe ek die volgende oggend die as-laaitjie ooptrek en dan sal al daardie woorde in die as lê, maar net vir ’n oomblik, voordat dit inmekaar sal val.

Luister hier na opnames van Elna se gedigte.

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top