Heilige ibis

  • 2

Die son kom op net waar sy wil
en wys haar mooiste kleure
oor Blue Downs* en Driftsands* se duine.
Sy strooi haar gloed oor wilde tuine
wat weinig meer as sand en boegoe is.

Sy steek haar kop deur rook en mis
en vly haar skoonste lig oor roet en as –
dáár
waar net gister nog, die helse vure was.
En sonder oordeel skyn sy bloedig rooi
’wyl sy die hemel soos framboos
en tot die diepste diep oranje tooi.

Die son breek deur die donker wolk
en glim oor kuile en ’n vlei
waarom die groenste riete groei.
Sy laat blink die laaste winterwaters
wat nog in (amper droë) riviere vloei.

Sy gloei voor Helderberg se hang,
oor witgeverfde huise
waar die rykes woon.
Sy vlam oor fynbos en oor vlaktegras,
oor voetpad en teen heinings vas
waaragter plakkers
in plank- en sinkgehugte droom.

Die son skyn waar sy wil –
oor taxi’s en blink motors
en rus vir oomblikke verblindend, stil
bo ’n brug wat oor die N2 baan.

En hóóg,
waar ambergoud haar strale dans,
kruis ’n ibis* teen die hemeltrans.

En hy sprei sy vlerke vry en wyd ...
in ’n skadubeeld van heiligheid.

* heilige ibis – wit- en swartgekleurde ibisvoël

* Driftsands – ’n reservaat ongeveer 20 km vanaf Kaapstad langs die R300 en die N2

* Blue Downs – ’n informele woongebied aangrensend aan Driftsands

Lees ook

Rockbottom

Fyn – soos fynbos

Soos een wat op verlossing wag

 

  • 2

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top