Litnet

Prof Matilda Burden (gebore Gericke) is ’n boorling van George en het aan die Hoërskool Outeniqua gematrikuleer. Sy beklee tans die pos van senior navorser, Kultuurgeskiedenis, by die Universiteitsmuseum van die Universiteit Stellenbosch, en gee ook studieleiding aan magister- en doktorale studente. Sy is terselfdertyd navorsingsgenoot en buitengewone professor in die vakgroep Geskiedenis en Antieke Kultuur aan die Noordwes-Universiteit, Potchefstroom. Sy gee leiding en opleiding in Kultuurgeskiedenis, Erfenisbewaring, Museumstudies en Argitektuurstyle aan die breë publiek deur middel van geakkrediteerde kort kursusse en lesings landwyd en tree op as konsultant vir die inrig van nuwe museums en uitstallings. Sy publiseer wyd in nasionale en internasionale tydskrifte en dien op talle rade en komitees rakende erfenisaangeleenthede op plaaslike, provinsiale, nasionale en internasionale vlak. Sy was voorheen onder meer lid van die raad van Erfenis Wes-Kaap, die Wes-Kaapse Kultuurkommissie en voorsitter van die Wes-Kaapse Raad vir Geografiese name. Sy is in 2016 verkies as visepresident van die internasionale Kommission für Volksdichtung (International Folksong Society) en ook vir die tweede maal as voorsitter van die Suid-Afrikaanse Vereniging vir Kultuurgeskiedenis. Prof Burden het ook onlangs ʼn omvattende werk oor Ou-Kaapse meubels gepubliseer (2013), en ʼn boek oor die argitektuur van Historiese Huise van SA Bpk se eiendomme (2016).