Litnet

Linda Roothman is gebore en getoë op ’n Karooplaas in die distrik van Cradock in die Oos-Kaap. Sy matrikuleer in 1983 aan die Hoërskool Cradock en studeer BA aan die Universiteit van die Vrystaat met Afrikaans-Nederlands, Engels en Geskiedenis as hoofvakke en behaal ’n Hoër Onderwysdiploma (cum laude).

Sy werk as Afrikaans-onderwyseres totdat haar dogter en seun gebore word. Hierna maak sy vir ’n klompie jare kinders groot en tree weer terug tot die onderwys. Die gesin verhuis verskeie kere totdat hulle uiteindelik sedert 2015 in Ugie in die Oos-Kaap woon, waar sy steeds as Afrikaans-onderwyseres by Hoërskool Ugie werk. Sy behaal ’n Honneurs in Afrikaans (cum laude), MA in Afrikaans (cum laude) en uiteindelik ook ’n PhD in Afrikaans (linguistiek, letterkunde en tale).

Haar navorsingsfokus is die Afrikaanse letterkunde, met spesifieke verwysing na ekokritiek, transliggaamlikheid, dierestudies, kriptosoölogie, magiese realisme, die materiële, geologiese en ruimtelike wendinge in die letterkunde, die Antroposeen, antropogenese, geologiewording, geologiese tyd, die geomenswetenskappe, geokritiek, literêre geografie, bioregionaliteit en die onderaardse troop.