Litnet

Chris Brunette is in 1961 in Durban gebore. Hy gradueer in 1984 as maatskaplike werker aan die destydse RAU (nou Universiteit van Johannesburg) en werk etlike jare as bedryfsmaatskaplike werker voordat hy ’n loopbaan in die joernalistiek betree. In 1996 verhuis hy na Kaapstad en werk as TV- en vermaakskrywer vir Huisgenoot, YOU en Drum en as internetjoernalis en inhoudsbestuurder vir die destydse 24.com en M-Web. Hy verdiep hom ’n tyd lank in internetstrategie en -bemarking vir die reklamehuis Foote, Cone & Belding (FCB) en verwerf in 2003 ’n honneursgraad in Afrikaans en Neerlandistiek met onderskeiding aan die UK, waarvoor hy die Hertzog-beurs verower. Hy aanvaar die pos as inhoudsbestuurder van LitNet in 2005 en voltooi in dieselfde jaar ’n meestersgraad in Afrikaans en Neerlandistiek met lof aan die UK onder die mentorskap van Etienne van Heerden, asook in die kreatiewe skryfkunde onder Joan Hambidge. Enkele van sy gedigte is opgeneem in Party van ons (2001), As die son kom oogknip (2002), Honderd dichters 9 (2005) en My ousie is ’n blom (2006). In 2006 lei hy ’n spesiale poësieprojek van LitNet, Vonkverse, by die KKNK. Hy woon en werk steeds in Kaapstad, waar hy onder andere nuwe skryfwerk en spesiale projekte vir LitNet behartig.