Vrouedag-skryfkompetisie: Miena

  • 0

Miena, my unieke huishulp. Sy kan tantrums gooi, is uitgesproke en staan haar man teen "gedugte" werkgewers. Miena … met die naam wat uitstekend by haar pas, want sy is ’n natuurlike "Die lewe is nie so moeilik nie"-mens.

Woensdagoggende kom sy met die plaaspad opgestap. Die ou heup wil nie altyd lekker saamwerk nie. Intussen het ek al haar musiek aangesit. Die “char-geldjie" lê op die tafel. Haar kos op die "butcher's block." Miena weet alles op daardie blok behoort aan haar. Sy stap met swier by die voordeur in. Sommige oggende met flambojante pers lipstiffie aan en dan gryp sy my op Ed Sheeran se "Perfect" en ons dans 7:45 in die oggend "like nobody is watching!"

So in die heen en weer loop, bieg Miena: “Ai, Altea, ek hou so baie van ander vrouens se mans.” Miena is al jare getroud, maar, ai, die liefde blom nie meer so lekker nie! Dan sê ek: "Sies Miena, jy kan en wil mos nie ’n goedkoop vrou wees nie?" Miena antwoord dan met ’n perslippeglimlag: “Ai, Altea, ons soek mos maar net om ’n bietjie liefgehê te word. Altea sal mos verstaan … Die bietjie-liefde-ding." Ons kyk mekaar stip in die oë, glimlag. Ja, ons verstaan! Ek waarsku haar egter oor die ander heup. Ongelukke kan gebeur in jaloerse tye. Miena weet! Sy weet van die lewe, van swaarkry, alkoholisme, verwerping en sommer van al hierdie dinge wat pyn in die hart en letsels vir die siel bring en wat jou laat verlang na ’n "klein bietjie liefde”.

Miena hou van ’n lekker storie en ék kan lekker luister. Sy hang oor my Marilyn Monroe-stoel.

Miena wil vertel, wil nie vertel nie en ek sê: “Vertel, Miena! Ons altwee hou mos van ’n lekker skinderstorie." Sy vertel met oë wat vonkel. Sy het egter intussen die wasbak se kraan oopgedraai om die skottelgoed te was. In die loop van die storievertelsessie hoor ek water loop. Ek en Miena hardloop gelyk. Sy het skoon vergeet. Die storie was "wasbakvergete" lekker. Miena kyk my met kwaai oë aan: "Dis jou skuld, Altea, jy laat my skinder!" Ek: "Miena jy hou van skinder … droog op!"

Ons lag lekker saam – ek en Miena.

Ons praat dikwels oor swaar tye, hartseer tye, ons kinders, oor vrouwees, hoe belangrik dit is om ’n mooi vrou te wees en ons rol in die lewe. Ek en Miena my "huisskoonmaakengel."

Ek besef dat van Miena die huishulp, wat met so min tevrede is, tot die rykste vroue op hierdie aardbodem wil dans "like nobody is watching" en ons wil net ’n klein bietjie liefde hê. Miena is vir my ’n inspirasie.

"Die lewe is baie kort, Altea, ons moet dans, lag en ons moet ’n bietjie liefhê!"

Jy is ’n mooi vrou, liewe Miena!

Skryf hier in:

Vrouedag-skryfkompetisie: ’n Vrou wat ek onthou

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top