US Woordfees 2019: Diskoers

  • 0

Verskeie groot geeste, slim mense en ingeligtes is op die Diskoers-program en jy kan kom luister en saamgesels en dis: gratis.

Tim du Plessis

Die Woordfees-gespreksreeks

Weeksoggende om 11:00 is dit tyd vir hierdie gewilde reeks onder die bekwame leiding van Tim du Plessis. Op sy reguit manier het Tim die vermoë om deelnemers die régte vrae te vra en tot die hart van sake deur te dring.

Vanjaar is daar verskeie aktuele sake van dringende belang op die agenda. Die komende verkiesing is natuurlik op almal se lippe, en deelnemers wat hiervan gaan probeer sin maak, sluit in Judith February en Jan-Jan Joubert.

En waar Cyril Ramaphosa verlede jaar hierdie tyd skaars sy sit in die warm stoel gekry het, was daar nou al genoeg tyd om ’n idee te begin vorm van die man wat tans Suid-Afrika se president is. Maar is hy sterk genoeg om die faksie-gevegte binne die ANC te oorleef? En sal hy die groot skip wat die Suid-Afrikaanse ekonomie is, op beter koers kan help stuur? Kom hoor wat sê Moeletsi Mbeki, Piet Croucamp en Prince Mashele.

Die wêreldorde het onherroeplik verander en die meeste van ons sukkel om sin te maak van die nuwe rolle wat deur lande soos die VSA, Brittanje, Rusland en China ingeneem (gaan) word. Luister wanneer kenners soos Ishmail Lagardien en Elizabeth Sidiropoulos perspektief gee op ons plek in hierdie veranderende wêreld.

En dan is daar – die grondkwessie. Die afgelope jaar of wat het die herverdeling van grond in die toekoms gelê, maar nou is dit op ons en baie mense is steeds onseker oor wat dit werklik gaan behels. Deelnemers sluit in Phephelaphi Dube, Mohammad Karaan en Wandile Sihlobo.

Die media was nog altyd noodsaaklik as bron van inligting en menigsvormer. Maar sosiale media blyk soms ’n heel ander gedierte te wees, met niks of niemand wat dit kan stop nie. Chris Roper, Desmond Painter en Schalk Engelbrecht saal dié wilde perd op.

*4-8 Maart 11:00 | 50 min | Die Plataan | Gratis

RSG Praat Saam met Lynette Francis

Praat saam op RSG

Nog ‘n gewilde reeks wat al sinoniem met die Woordfees is, is RSG se oggendreeks Praat saam, met vuurvreter Lynnette Francis agter die mikrofoon. Kom luister wanneer kenners besin oor bestuursvaardighede in Suid-Afrika: Het ons die nodige leiers in die openbare en private sektor om die jammerlike stand van dienslewering reg te ruk en die ekonomie te stimuleer? Tony Ehrenreich en Harlan Cloete deel hul mening.

Die inmenging van Rusland om die uitslag van die vorige Amerikaanse verkiesing te beinvloed, het wêreldwyd baie mediadekking geniet, maar die voortdurende ontwikkeling van tegnologie moet tog sonder twyfel ook verkiesings wêreldwys beïnvloed. Wat gaan die impak van tegnologie op ons komende verkiesing wees? Courtney Sampson (Hoof van die OVK Wes-Kaap) gee sy mening.

Wanneer klimaatsverandering nogeens die voorblaaie haal, voel menige van ons om eerder ons kop in die sand te steek. Kan ons nog iets doen om ons planeet te red en die verwoesting teë te werk – of is dit reeds te laat?

Dink net: geld in die bank sonder dat jy jou daagliks vir lang ure aan ’n baas se grille onderwerp… Maar is dit werklik so ’n gawe gedagte? En behoort daar iets soos ’n universele basiese inkomste, ’n sogenaamde UBI, te wees? Of is arbeid adel die enigste seker weg na ’n inkomste? (Met, onder andere, Servaas van der Berg, bekleёr van die SARChI-navorsingstoel in die ekonomie van sosiale beleid)

 En dan word een van die Praat saam-gesprekke gewei aan ’n verkiesingsdebat, waartydens verteenwoordigers van verskillende partye hul saak kom stel.

* 4-9 Maart 08:00 | 50 min | Die Plataan | Gratis

Suna Venter-gedenklesing

Vanjaar word die tweede Suna Venter-gedenklesing, vernoem na een van die brawe joernaliste bekend as die SABC 8, gelewer deur Pumla Gobodo-Madikizela. Sy beklee die navorsingsleerstoel in Studies oor Historiese Trauma en Transformasie aan die Universiteit Stellenbosch, en is ’n ontvanger van die Alan Paton-prys vir haar boek A Human Being Died that Night.

* 5 Maart 17:00 | 50 min | Drostdy Teater | Gratis

Heindrich Wyngaard

Fredrik Van Zyl Slabbert-gesprekreeks

Kabous Meiring, bekend as aanbieder van Prontuit en MegaBoere, kry vanjaar die jongmense aan die praat oor kwessies wat vir hulle belangrik is. En hoewel die deelnemers in ouderdom wissel van studente tot afgetredenes, is die doel van hierdie gesprekreeks om sake deur die oë van die nuwe geslag te bekyk. As jy jonk is, of wil weet hoe jongmense oor sake dink, kom sluit gerus by Kabous en haar gaste aan. Onderwerpe wat onder die loep kom, sluit in die jeug se politieke deelname (met Farai Mubaiwa, mede-stigter van die Africa Matters inisiatief en Lwando Nkamisa voormalige SR-voorsitter van die US), sosiale integrasie in hoër onderwys (met, onder andere, Frances Petersen, rektor van die UFS, en Carli van Wyk, huidige SR-voorsiter), en die handhawing van ’n gesonde lewenstyl te midde van groot druk om te presteer (met Ronelle Carolissen en andere).

5-7 Maart 17:30 | 50 min | Visuele Kunste Vierkant | Gratis

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top