Uitnodiging na PEN Afrikaans se algemene jaarvergadering 2019

  • 0

Hiermee word julle nogmaals hartlik uitgenooi na PEN Afrikaans se algemene jaarvergadering (AJV) 2019. Die deure sal oop wees vir lede, hul metgeselle en ander belangstellendes, so kom klink 'n glasie, geniet ligte verversings en vind meer uit oor PEN Afrikaans se werksaamhede.

Ons AJV word gehou op Saterdag 14 September om 13:00 in die Wellington-biblioteek (oorkant die Breytenbachsentrum). Die adres is Malherbestraat 8, Wellington, 7654.

Wees asseblief so vriendelik om teen 6 September te laat weet of jy beplan om die AJV by te woon indien jy dit nie reeds gedoen het nie. RSVP na penafrikaans@gmail.com.

Let wel: Slegs opbetaalde lede van PEN Afrikaans het stemreg by die AJV.

Opbetaalde lede wat nie die vergadering sal kan bywoon nie, word vriendelik versoek om 'n volmagvorm in te vul en aan ons te e-pos. 

Deur 'n volmagvorm, wat hier afgelaai kan word, gee jy 'n ander lid die reg om namens jou te stem. Indien jy nie die AJV kan bywoon nie, vra ons jou om die volmagvorm uit te druk, te onderteken, te skandeer en dan terug te stuur as aanhegsel per e-pos na penafrikaans@gmail.com voor of op 6 September 2019.

Ons wil hierdeur graag die inspraak en stemme van soveel lede as moontlik verseker.

Daar sal vanjaar 'n nuwe bestuur by die vergadering verkies word. Ons moedig lede aan om bestuurslede te benoem met die oog op die verkiesing. 'n Nominasievorm kan hierafgelaai word. Stuur asseblief voltooide vorms na hierdie e-posadres.  

Die agenda vir PEN Afrikaans se algemene jaarvergadering, 14 September 2019, Wellington

  1. Verwelkoming
  2. Verskonings en vasstelling van ’n kworum
  3. Afspraak oor lede wat volmag het om vir ander te stem
  4. Goedkeuring van notule vir die AJV gehou op 2 Oktober 2018 in Potchefstroom, en sake voortspruitend daaruit. Die notule is hier beskikbaar.
  5. Voorsittersverslag
  6. Tesourier se verslag
  7. Bestuurder se verslag
  8. Toekenning van erelidmaatskap
  9. Verkiesing van ’n nuwe bestuur
  10. Algemeen

Stuur asseblief enige navrae of voorstelle vir die agenda na penafrikaans@gmail.com.
 
Die vergadering vind plaas tydens die Tuin van Digters, waartoe opbetaalde lede van PEN Afrikaans weer gratis toegang sal kry. Ons opregte dank aan Francois Lötter van die Breytenbachsentrum vir die ondersteuning. Opbetaalde lede se name sal op 'n lys by die ingang wees.

Die feesprogram is pas bekend gemaak en dit is duidelik dat daar 'n vol en opwindende twee dae vir liefhebbers van digkuns in die vooruitsig is. Breyten Breytenbach, wat op 16 September tagtig word, sal by die fees gehuldig word. ’n Ander hoogtepunt is die toekenning van die Ingrid Jonker-prys vir ’n Afrikaanse debuutbundel aan Pieter Odendaal vir sy bundel asof geen berge ooit hier gewoon het nie. Verskeie digbundels word bekendgestel, asook die nuwe uitgawe van Ons Klyntji, en daar sal soos gewoonlik ook 'n goeie skeut musiek wees.

Tydens 'n sessie wat deur PEN Afrikaans aangebied word, sal Frieda van den Heever die verhoog deel met digters Danie Marais, Jolyn Phillips, Lwanda Sindaphi, Diana Ferrus en Daniel Hugo wat gedigte in Afrikaans, Xhosa en Engels sal voorlees. Ons hoop om julle daar te sien. Die volledige program kan hier afgelaai word.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top