Toyota US Woordfeeskortverhaalbundel 2020: ’n onderhoud met Johan de Nysschen

  • 0

LitNet plaas oor ’n tydperk van ’n maand onderhoude met die skrywers wie se verhale vanjaar in die Toyota US Woordfeesbundel opgeneem word. 

Johan de Nysschen (foto: verskaf)

Johan de Nysschen vertel vir Naomi Meyer van sy kortverhaal wat vanjaar in die Toyota US Woordfeesbundel opgeneem word.

Johan, waaroor handel jou kortverhaal en wat was die inspirasie daarvoor?

Tydens ’n vakansie in die suide van Namibië het ons ’n draai in Lüderitz gemaak. Die ou dorpie met sy geboue laat jou dink dat jy êrens verkeerd afgedraai en aan die begin van die vorige eeu beland het. Dit het ’n blywende indruk op my gelaat. Terug by die huis het die herinneringe my na die pen laat gryp. Die óú droom, om ook eendag ’n boek op die rak te hê, laat my soms ’n manuskrip vir redigering instuur. ’n Redigeerder/teksontwikkelaar het van die karakter van oom Wesley gehou. Dié ou man, wat sy aande in een van die kuierplekke op die dorp verwyl, sê soms snaakse dinge. In sy eenvoud deel hy ook ’n paar wyshede. In my drome hoop ek dat daar op elke klein dorpie só ’n omie of tannie rondloop wat deur sy/haar blote bestaan kleur aan klein, stowwerige dorpies gee.

Wil jy iets vertel oor die skryfproses daarvan? Het jy die verhaal vooraf beplan of het dit organies ontwikkel? Afronding, redigering?

Oom Wesley was deel van ’n baie groter prentjie, wat handel oor diamantdiefstal en ander boewerye. Die kortverhaal het redelik maklik daaruit ontwikkel. Die suide van Namibië, met sy lang afstande tussen weinig meer as ’n paar huisies en ’n brandstofpomp, laat mens wonder wat daar aangaan as jy weer gery het. Hoe leef mense daar? Wat gebeur daar wat hulle lewens kleur gee?

Gelukkig het ek ’n vrou wat haar hele lewe lank Afrikaans as vak gegee het. Taal- en spelfoute is dus nie ’n groot probleem nie.

Gaan jy vanjaar die Toyota US Woordfees kan bywoon, en indien wel, en as jy reeds tyd gehad het om na die program te kyk, is daar enige items waarna jy op die program uitsien?

Ongelukkig sal ons nie die fees kan bywoon nie. ’n Paar faktore dra by tot die feit dat Pretoria hierdie jaar net nog verder as gewoonlik van Stellenbosch af is. Ons sien egter daarna uit om dit wel met ’n latere geleentheid te kan bywoon.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top