Talentkompetisie vir behoeftige jong kunstenaars

  • 1

Die onmoontlike is al danksy die Global Spotlight Talent Search-kompetisie moontlik gemaak vir kunstenaars uit moeilike sosio-ekonomiese omstandighede. Soveel sukses is al behaal dat van hulle al op wêreldverhoë opgetree het. ’n Geleentheid wat hulle andersins nooit beskore sou gewees het was dit nie vir die goedhartigheid van ander nie.

Adriana Francke wat Global Spotlight begin het

Die Global Spotlight Talent Search-kompetisie is gestig nadat Adriana Francke, ’n opvoedkundige, agt jaar gelede besluit het om ’n soektog na talent in die Drakensteinvallei bekend te stel wat sedertdien die Global Spotlight genoem is.

Die suksesvolle sanger Sydwell Beziek van die Paarl is ook hierby betrokke, sodat hy en Adriana “kan teruggee om aan ander geleenthede te kan bied”. Hiervoor het Sydwell ’n Blue Ribbon-toekenning van die internasionale organisasie The Difference Makers ontvang.

Adriana Francke en Sydwell Beziek

Oudisies in verskillende genres word op 17 Junie in die Paarl gehou sodat arm kinders die geleentheid kan kry om hul talente te vertoon.

Heelwat sukses is al in die verlede hiermee behaal. So het Morné Goedeman, wenner van die kompetisie in 2016, onlangs Spanje toe vertrek om daar te gaan optree. Hy was die eerste Drakenstein-kunstenaar wie se lewensverhaal in die tydskrif Vrouekeur vertel is. Hy het ook by die tydskrif Kuier se Moedersdagfunksie gesing, asook ’n verhoog met Karin Kortje gedeel.

Onder die Global Spotlight Talent Search se talle ander suksesverhale is:

* Anro Arendse, 2014 se wenner, wat nou ’n lid van die Suid-Afrikaanse Jeugkoor is wat oorsee optree en al die verhoog in Amerika met bekendes soos Jimmy Nevis en Jonathan Butler gedeel het.

* Clarissa Benjamin, die naaswenner, wat ook ook al ’n verhoog met Jonathan Butler en ander bekendes soos Jonathan Rubain, Elwira Standilli en Karin  Kortje gedeel het. Sy het ook op Expresso saam met die No Sweat-groep van Wellington verskyn.

Clarissa Benjamin en Anro Arendse , onderskeidelik naaswenner en wenner in 2014

* Deonichia Killowan, een van die naaswenners, wat ’n agtergrondkunstenaar is. Een van haar enkelsnitte is op die Dove-toekenning-wenner en Grammy-benoemde gospelsanger Neville D se jongste CD, Nuwe dinge, opgeneem.

* Keenin von Wielligh, wat die wenner in 2013 was, en Didi Davids, naaswenner in 2015, wat almal oorsee optree nadat hulle kontrakte in Spanje verwerf het.

* Frederico Graninger, die huidige Drakenstein Talent Search algehele wenner, asook die Suidooster Talent Search se beste manlike stemkunstenaar. Wyle Taliep Petersen se eerste vrou, Madeegha Anders, wat self ’n legendariese sangeres is, is sy mentor. Sy sê oor hom: “Hierdie jong man wat onlangs by die Canvas Tent gesing het, het die gehoor gaande gehad.” Sy vra dat hy meer uitnodigings kry om by geleenthede in die Kaap op te tree.

Frederico Granninger

Sydwell kan Adriana nie genoeg lof toeswaai vir haar aandeel in hul sukses nie. Hy beskryf Adriana as die “legend van die valley”. Benewens die feit dat sy  die adjunkskoolhoof van die Laerskool Groenheuwel in die Paarl is, het sy ook ’n groot liefde  vir opvoeding en kuns en kultuur.

“Haar passie vir leerders hou nie by die skool op nie, so het sy ook naskools by projekte soos die Global Spotlight Talent Search betrokke geraak.” 

Global Spotlight is ’n niewinsgewende organisasie  wat onder Sydwell se sambreelorganisasie Soulo Produksies val wat minderbevoorregtes  help om hul volle potensiaal en drome oor ’n kunsloopbaan te bevorder. 

Benewens die Global Spotlight Talent Search  was Soulo Produksies ook al verantwoordelik vir toneelopvoerings soos die drama Nog net 9,  asook konserte soos Seridia Lee, On my Own, slypskole, die bestuur van kunstenaars, en individuele sessies met mentors.

Morne Goedeman, wenner in 2016, wens Klinton Keet, wenner in 2018, geluk.

Sonder geld of fondse het Adriana R1 000 uit haar eie sak vir die eerste algehele wenner geskenk. Adriana is die produksiebestuurder en deel haar ervaring as opvoedkundige, offer haar tyd, geld en vaardighede vrywilliglik op sodat kinders se lewens kan verbeter.

Sydwell vertel: “Sy stel haar huis vir repetisies beskikbaar, sy ry die kinders na hul huise aan sonder dat sy ’n brandstoftoelaag daarvoor ontvang en sonder om enigiets terug te verwag.

“Sy betaal die rekeninge vir die kompetisies vanaf die bestuur se kant, kook kos, bederf vrywilligers en verskaf raad aan jong kunstenaars ten opsigte van hul menswees deur middel van die platform wat sy geskep het en al nege jaar lank in stand hou.”

Adriana se hart is groot. As die jongste suster van Sydwell se pa het sy hom in haar huis ingeneem nadat sy grootouers, wat hom grootgemaak het, oorlede is.. 

“Sy is die onbesonge heldin agter die skerms. Haar nalatenskap gaan wyd strek.”

Morne Goedeman, die algehele wenner van 2016 is tans op ’n kontrak van  6 maande in Selva, Islas Baleares, Spanje.

Global Spotlight doen ’n beroep op die gemeenskap om hulle te ondersteun.

Vir meer inligting oor komende oudisies op 17 Junie 2019 by die Paarl-Oos Thusong Gemeenskapsentrum, kontak Sydwell Beziek, voorsitter van Soulo Produksies, by 021 8728285 / 071 404 5169 of soulopro6@gmail.com.

  • Foto’s: verskaf
  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top