Die Suidoosterfees 2026, wat van 29 April tot 3 Mei in Kaapstad plaasvind, se tema Tuiste kry ’n fassinerende dimensie met die aankondiging van hierdie jaar se Zabalaza-wenproduksie, Kinnes van Somers, wat as deel van die ATKV Kinder- en Jeugteaterprogram opgevoer word.
Hierdie drievoudig bekroonde produksie ondersoek hoe die stories wat ons erf die mense vorm wat ons word, en vra waar die werklike tuiste van identiteit lê – in die verhale wat aan ons vertel word, of in ons eie keuses oor wie ons wil wees.
Zabalaza is die Baxter-teatersentrum se dinamiese ontwikkelingsprogram wat fokus op die ontdekking en ontwikkeling van dapper nuwe teaterstemme regoor die Wes-Kaap. Elke jaar word een uitstaande produksie gekies om in vennootskap met NATi by die Suidoosterfees op te tree, wat opkomende kunstenaars die platform bied om hul werk met ’n groter gehoor te deel.
Kinnes van Somers, onder leiding van regisseurs Tamsyn Alexander en Hanro Cloete, is ’n aangrypende herverbeelding van die klassieke Afrikaanse volksverhaal van Antjie Somers. Die produksie is pas bekroon vir Beste Produksie, Beste Regisseurs en Beste Ensemble by die 16de jaarlikse Zabalaza-fees, en gebruik volksdrama om te ondersoek hoe oorgelewerde verhale identiteit vorm.
Die verhaal ontvou in ’n hegte gemeenskap waar bangmaakstories en gefluisterde vrese nuwe lewe kry wanneer volksoorlewering en werklikheid begin vervaag. Wanneer die ou mite van Antjie Somers binne die volwasse Dolli begin roer, word gehore gekonfronteer met ’n spookagtige besinning oor wat ons van ons voorgeslagte erf en wat ons uiteindelik word. Die produksie maak gebruik van beweging, verweefde vertelling en herkenbare klanke van emaljekombuisware en kobaltblou oorpakke om die mite te herskryf vir ’n nuwe geslag.
Die tweetalige produksie (Afrikaans en Engels) word aangebied deur die talentvolle ensemble van Caitlyn Haywood, Hannah Sampson, Katelynne Matthews en Tameka Petersen, terwyl Alexander self ook optree. Die kreatiewe span het saam met Abigail Mei en Cameron Wilson ’n kollektiewe skeppingsproses gevolg.
Die stuk word op 1 Mei om 09:30 en 3 Mei om 12:30 by The Lane in die Waterfront Teaterskool opgevoer. Die tydsduur is 45 minute en dit is geskik vir gehore van 13 jaar en ouer. Kaartjies kos R100 en is beskikbaar by Webtickets, die Artscape-kaartjiekantoor en Pick n Pay-kiosks.
Die produksie word aangebied deur Zabalaza van die Baxter-teater, in samewerking met die Departement van Kultuursake en Sport (DKES) en NATi. Die hoofborge van die Suidoosterfees is die Wes-Kaapse regering en die provinsie se Departement van Kultuursake en Sport, Stad Kaapstad, Netwerk24, Die Burger, NATi, kykNET, die ATKV, Kunstekaap en dotsure.co.za. Smile FM is die fees se amptelike radiostasie.