Studiegidse vir skoolkinders: ’n onderhoud met Sonia du Plessis

  • 4

Foto van Sonia du Plessis: verskaf

In hierdie dae waartydens baie skoolkinders nog tuis is, praat Sonia du Plessis met Naomi Meyer oor Sonia se studiegidse wat kinders sommer maklik hul Afrikaans sal laat baasraak.

Sonia, wat is jou agtergrond en jou betrokkenheid by die onderwys? Watter vakke is jou spesialiteitsgebied?

Ek het ’n doktorsgraad in Afrikaans (letterkunde). Ek was ’n Afrikaans-onderwyser (matrieks), ’n dosent in Afrikaans by die Universiteit van Limpopo, skoolhoof en toe kurrikulumbestuurder vir Afrikaans by die Curro-groep. Ek het verlede jaar besluit om my voltyds toe te wy aan die skryf van studiegidse en hulpmiddels vir Afrikaans.

Wat het jou geïnspireer om dit te skryf, of wat het jou bewus gemaak van die behoefte onder leerders of onderwysers vir studiegidse?

As onderwyser het ek self die druk ervaar om klas te gee, voor te berei, buitemuurse verantwoordelikhede te hê, ma te wees en nou en dan vrou vir my man te wees. Ek het ook beginneronderwysers se gespartel gesien om al die verskillende afdelings sinvol hul eie te maak en aan die leerders oor te dra. Ek het ook geweet wat werk en het die kennis in my studiegidse gedeel – ek is sedert 1993 betrokke by die skryf van studiegidse.

Waarom dink jy is studiegidse van hulp? Kan kinders nie die handboeke gebruik wat hulle het nie? Wat bied jou studiegidse vir kinders of vir onderwysers? 

Die waarde van my studiegidse lê in die visuele vaslegging van moeilike begrippe en die verstaan van letterkunde en taalkonvensies. Die kontekstuele vrae in my gidse waarvan die leerders nie die memorandum agter in die boek klakkeloos kan oorskryf nie, help ook die onderwysers baie. Verder lei dit die leerder om sy opsteltipe-vraag doelgerig en uniek te benader en ’n eiesoortige antwoord te formuleer.

Wie is jou teikengroep, vir wie het jy dit spesifiek geskryf: leerders of onderwysers?

Dit is beide. Die gids word met groot vrug deur skole gebruik vir ’n hele graadgroep. Wanneer ’n skool dit vir ’n graadgroep aankoop, is daar ’n besparing op fotokopieerkostes en hulle weet die kwaliteit van die studiegids is op standaard. Ek het ook baie individuele leerders of ouers van leerders wat die gidse aankoop ter aanvulling van wat hulle in die skool gebruik.

Hoe gereeld verander die sillabus en hoe relevant is jou studiegidse vir die onderwysers/leerders van 2020?

Die sillabus is veronderstel om elke twee jaar te verander. Weens finansiële beperkinge gebeur dit egter nie altyd nie. Die drama vir graad 12’s het die afgelope paar jaar byvoorbeeld nie verander nie. Wanneer dit egter verander in graad 10–12, word dieselfde onderwysers belas met nuwe voorbereiding. Dit is regtig omvattend. Verder moet die onderwyser heeltyd aktuele onderwerpe in die taal- en skryfafdelings gebruik – die voorbereiding hou dus nie op nie. Ek probeer om die las hier te verlig.

Van 2020 gepraat: Die COVID-19-virus het ons almal onkant betrap. Hoe dink jy kan jou studiegidse in hierdie tyd juis vir mense van waarde wees? Sal dit kan help met hersiening of beter verstaan noudat leerders tuis is?

Vir seker. Die studiegidse is omvattend, gerig op die sillabus, en met ’n memorandum beskikbaar. Ek glo dat wanneer ’n leerder deur die studiegids gewerk het, hy/sy gereed is om die eksamen met vertroue aan te pak.

Wat is die kernbeginsels van enige studiegids? Waarop fokus jou studiegidse spesifiek?

Die kern van my studiegids is om die gebruiker daarvan in staat te stel om dit wat van hom verwag word, te bemeester en enige meting daarvan met groot vertroue en sukses af te lê.

Hoe kan mense jou studiegidse in die hande kry? Waar kan hulle dit bestel? En wil jy iemand na jou webwerf verwys om voorbeelde te sien van wat hulle kan verwag?

Die webwerf is www.studiegidse.co.za. Die verskillende studiegidse wat beskikbaar is, word op die webblad aangedui. By elke studiegids is ’n uittreksel uit die betrokke studiegids. Vir elke studiegids is daar ook ’n memorandum, waar toepaslik. Sou skole vir ’n graadgroep aankoop, is daar ’n 40%-korting. Enige navraag kan gerig word deur die KONTAK-skakel. Bestellings word gedoen deur op die BESTEL-skakel te kliek en die vorm in te vul.

  • Alle grafika wat gebruik is, is verskaf deur Sonia du Plessis.
  • 4

Kommentaar

  • Jinne, dis nou oulik!

    Dankie Sonia! As dit nie vir mense soos jy was nie sou ons taal, letterkunde en ons kinders se begrip van ons pragtige taal Afrikaans as letterkundige skat soveel armer gewees het.

    Doe zo voort, doe zo voort!

  • Avatar
    Magdel van Tonder

    Dit klink baie oulik en gebruikersvriendelik. Ek stel belang in graad 11 en 12 se gidse vir familielede se kinders.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top