Sleutels tot ’n suksesvolle, volhoubare fees

  • 2
Engelina du Plessis se navorsingsartikel “Wat maak ’n wynfees suksesvol? Die Robertsonvallei-storie” bied interessante insigte vir elkeen wat betrokke is by of belangstel in feeste. Dit kan hier in LitNet Akademies gelees word. Melt Myburgh het Engelina gepols oor die geheime wat verseker dat feeste suksesvol en volhoubaar is.

........

Engelina, jou navorsing fokus op twee wynfeeste wat jaarliks in Robertson in die Wes-Kaap aangebied word: Wacky Wine en die Wine on the River. Hoe het dit gebeur dat jy spesifiek op dié twee feeste gekonsentreer het? Het jy ’n verbintenis met Robertson?

Ons navorsingseenheid, TREES, doen al die afgelope 10 jaar bemarkingsnavorsing by albei die feeste. In 2018 het die PUK-Kanselierstrust van die Noordwes-Universiteit befondsing aangebied om my navorsing uit te brei, waarna ek toe op die plaaseienaars van die gebied as produkeienaars van wyntoerisme begin fokus het. ’n Goeie werksverhouding tussen die navorsers en bestuur het aanleiding gegee tot die uitbreiding van die navorsing wat in die toekoms sal voortduur.

Feeste is uiteraard ’n baie algemene verskynsel in Suid-Afrika, en ook wêreldwyd. Byna elke dorp spog met ’n fees van een of ander aard. Is daar nie te veel feeste in die land nie?

Dit is ’n vraag waaroor daar baie gesels word en, soos die artikel ook uitwys, beleef hierdie aantal feeste verskeie uitdagings om suksesvol te wees en mededingend te bly, omdat baie van hierdie feeste binne die Suid-Afrikaanse konteks primêr om dieselfde mark meeding.

Engelina du Plessis

Watter kardinale aspekte moet feesorganiseerders in gedagte hou om dié mededinging om dieselfde mark as struikelblok te voorkom?

Binne hierdie mark is daar wel verskillende ouderdomme, geslagte, tale, ens, wat verskillende behoeftes openbaar. Kleiner feeste kan poog om ’n nismark te teiken, gefokus op ’n spesifieke demografiese groep. Voorbeelde van hierdie tipe nismarkfeeste is Oppikoppi, Woordfees, Stilfees en die Oesterfees, om ’n paar te noem. Met hierdie feeste word ’n spesifieke doel bereik en daarom trek dit ’n baie spesifieke groep mense. Met die groter feeste gaan hierdie benadering nie noodwendig suksesvol wees nie en kan prys, toegangsbeheer en programsamestelling ’n manier wees om die mark wat die fees bywoon, te manipuleer en te reguleer.

Die groot uitdaging van enige fees is om iets unieks te bied wat hul mededingende voordeel bevestig.

In jou artikel maak jy dit duidelik dat die sukses van ’n fees bepaal word deur faktore wat volhoubaarheid verseker. Wat is die belangrikste dinge wat feesorganiseerders in gedagte moet hou om te verseker dat die fees nie onder gaan nie?

Resultate dui daarop dat die regte mark, ’n verskeidenheid produkte en ’n persoonlike diensaanslag van die belangrikste faktore is wat aanleiding gee tot ’n suksesvolle wynfees wat ook volhoubaar is. Natuurlik kom alles op die bestuur neer.

Jy wys in die artikel op sleutelfaktore wat feesorganiseerders in gedagte moet hou om sukses te verseker, naamlik “bemarking, produkte gekoppel aan die fees, die program en die algemene bestuur daarvan”. Waar, dink jy, skiet feeste die meeste tekort as dit by hierdie aspekte kom?

Ek dink nie dis ’n kwessie van tekort skiet nie, maar dalk eerder dat daar nie die regte balans is tussen die faktore wat bestuur moet word en die mark wat na die feeste getrek word nie. Dit kom alles neer op die dag van die fees, waar daar uitstekende diens aan die besoeker gelewer moet word. Om die besoekers tevrede te hou moet verskeie aspekte, soos gehalte kos, parkering, vermaak, ablusie en soveel meer, gebied en bestuur word. Bemarking moet spesifiek wees tot die mark wat die organiseerders en wynplaaseienaars wil trek, anders ontstaan daar ’n gaping tussen die verwagtinge van wat die fees bied en wat die besoekers ontvang. Deur middel van navorsing kan feeste spesifiek bepaal wie die mark is en wat hul behoeftes en siening ten opsigte van die spesifieke fees is, en sodoende kan hul behoeftes bevredig word.

Wyntoerisme het spesifiek ’n positiewe impak op feesbestemmings. Watter voordele trek gemeenskappe uit dié vorm van toerisme?

Verskeie wyngebiede gebruik toerisme om hul wyne te bemark en bewustheid van hul produkte te skep, asook om ’n bydraende inkomste vir wynplase te bewerkstellig. Die feeste dien ook as ’n trekpleister om besoekers na ’n area te lok wat voorheen nie so welbekend was nie. Met die fokus op die gebied, byvoorbeeld Robertson, bou die wynfeeste gemeenskapstrots en -identiteit en bevorder dit stedelike vernuwing en kultuurontwikkeling. Verskeie nuwe gastehuise en restaurante het die lig gesien na die vestiging van die feeste.

Dit bevorder die beeld van die bestemming. Die ekonomiese en sosiale voordele van wynfeeste, sowel as ander feeste, speel ’n belangrike rol ter bevordering van gebiede en dorpe met betrekking tot die verbetering van infrastruktuur, die verbetering van bemarkingstrategieë, asook die bevordering van plaaslike en organisatoriese bestuursvermoëns. Gedurende hierdie tydperk word vele werksgeleenthede geskep, wat ongetwyfeld as ’n groot pluspunt beskou word.

Waaraan skryf jy die geweldige groei van die “fees-en-gebeurtenis-sektor” hier te lande toe?

Ek dink tog daar steek baie waarheid in die frase “Afrikaners is plesierig” en dit geld vir alle Suid-Afrikaners. Die navorsing bevestig in ’n mate hierdie stelling en het bewys dat feeste bydra tot die toenemende behoefte wat mense toon om verskillende kunsvorme, kultuurervarings, tale en tradisies te ervaar. Feeste bied unieke geleenthede om ’n spesifieke kultuur te vier en bied ook terselfdertyd ’n diep betekenis vir deelnemers en besoekers. Die viering van kultuur is een van die redes waarom soveel verskillende feeste in Suid-Afrika ontwikkel het.

Hoe verskil wynfeeste in die algemeen van musiekfeeste, kunstefeeste en kultuurfeeste?

Wynfeeste verskil van ander feeste omdat die primêre fokus op wyn is. ’n Wynfees kan gedefinieer word as ’n geleentheid wat aan besoekers gebied word om wynplase, wingerde en wynkelders te besoek en om meer omtrent die eienskappe van druiwe en die wyndistrik te leer. Binne hierdie milieu kan ’n wynfees die ervaring van verskeie toerismeprodukte binne die wyndistrik ook aanbied, wat ’n unieke ervaring aan besoekers bied. Dit sluit wyn, restaurante, kulture, kuns, opvoeding en reis in, asook ’n fokus op die landskap, besienswaardighede, geskiedenis, erfenis en die wynproduksieproses.

Seisoenaliteit speel uiteraard ’n belangrike rol in die aanbod wat ’n fees vir die publiek kan gee. Wil jy hierop uitbrei?

Seisoenaliteit is een van die redes waarom bestemmingsbestuurders (DMO’s) feeste ontwikkel het. Feeste fokus daarop om toeriste buite piektye na ’n bestemming te lok en dien as ’n alternatief vir toerisme-seisoenaliteit.

Een van die grootste faktore wat enige fees suksesvol maak, is ongetwyfeld om lojaliteit onder besoekers te bewerkstellig. Hoe kan feeste dit regkry?

Lojaliteit is ’n navorsingsveld in eie reg en vorige navorsing wat spesifiek op die lojaliteitsaspekte teenoor feeste gefokus het, het die volgende faktore geïdentifiseer: ’n plek waar mense hulself kan geniet; waarde vir geld; die feesprogram en verskeidenheid van produkte (by ’n wynfees is dit die verskeidenheid wyne); bekende persone verbonde aan die fees; en natuurlik kwaliteit diens.

In jou artikel raak jy die kwessie van toegangsfooie aan. Wine on the River bied bv ’n dagtoegang- of ’n naweekkaartjie aan feesgangers. Sou jy sê dit is ekonomies meer sinvol vir ’n fees, eerder as ’n kaartjie-per-aanbieding benadering?

Dit is ongetwyfeld die beter opsie om naweekkaartjies te verkoop waar die besoeker voel dit is vir hom die moeite werd om ’n groter deel die fees by te woon en waarde vir geld te kry met die afslagprys wat die naweekkaartjie bied. Die besteding oor drie dae is vir seker meer as oor een dag, en tog is feeste se doelwit om ook ’n positiewe ekonomiese impak te verseker.

In die artikel maak jy aanbevelings ten opsigte van sleutelsuksesfaktore vir wynfeeste. Op grond van jou eie ervaring van feeste wat jy al bygewoon het, watter van hierdie is die belangrikste?

Ek dink die grootste aanbeveling is skarebeheer (crowd control). As bestuurders die vloei en handeling van besoekers gedurende ’n fees kan manipuleer, kan ’n suksesvolle fees verseker word. Met ander woorde, feesbestuurders moet op die dag genoegsame ingangs- en toegangspunte, ablusiegeriewe, voedselpunte, sitplekke, parkering en inligting aan besoekers verskaf, om maar ’n paar aspekte te noem.

As jy in ’n neutedop raad vir feesorganiseerders het, wat sou dit wees?

Dit kom daarop neer dat ’n kommervrye, gemaklike fees met ’n unieke ervaring aan besoekers gebied word en lojaliteit teenoor die fees gevestig word.

Lees ook:

Wat maak ’n wynfees suksesvol? Die Robertsonvallei-storie

  • 2

Kommentaar

  • Barend van der Merwe
    Barend van der Merwe

    Lyk of sy wou nog iets se by die 3de laaste vraag, toe sny julle haar af...

    Nietemin kyk, al wat jy eintlik nodig by so fees is mos maar 'n tent met 'n verhoog en klomp drank en klomp sangers. Dan raak die Afrikanertjies inderdaad plesierig jong.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top