Skemerson-rolprent in rolprentteaters te sien

  • 0

Pietie Beyers as Sella in die rolprent Skemerson

’n Afrikaanse rolprent wat geestesgesondheid aanspreek, met akteurs soos Pietie Beyers, Anneke Weidemann en Elize Cawood in die rolverdeling, begin 3 Mei landwyd in rolprentteaters draai.

Skemerson vertel die verhaal van Sella, wat besluit om sy eie lewe te neem. Hy is ’n dokter wat met sy geestestoestand sukkel nadat hy sy ma verloor het terwyl hy haar vir ’n tyd lank versorg het. Dit is nie net sy verdriet wat hom oorweldig nie, maar ook die feit dat hy verantwoordelik voel vir sy ma se dood en homself daarvoor blameer.

Toe hy op die punt is om ’n einde aan alles te maak, ontmoet hy egter vir Emma wat haar brose ma verpleeg wat nie meer lank het om te lewe nie. Hulle ontmoeting is die begin van ’n naweek wat hulle almal se lewens vir altyd sal verander.

Pietie Beyers, wat die hoofrol in die rolprent vertolk, en ook die draaiboekskrywer en medevervaardiger is, vertel meer.

Anneke Weidemann en Pietie Beyers

Pietie, nie net speel jy in die rolprent nie, maar jy is ook die draaiboekskrywer en medevervaardiger. Waarom het jy besluit om die tema van geestestoestande aan te spreek?

Die film is geïnspireer deur ware gebeure. Dis nie volledig my verhaal nie, maar soortgelyk aan die manlike hoofkarakter in Skemerson het ek al besonder intense angs ervaar. Ek glo eerlike gesprek skep ’n platform vir genesing. Die skrywe en maak hiervan was vir my terapeuties en ek hoop die film kan empatie kweek asook mense wat met uitdagings onder die oppervlak sukkel, vertroosting bied dat daar wel hulp en hoop is.

Elize Cawood

Die tema van geestestoestande is ’n sensitiewe tema om aan te roer. Hoe het julle te werk gegaan om die tema betekenisvol uit te beeld?

Dis inderdaad ’n baie sensitiewe tema. My eie ervaringe, sowel as dié van mense na aan my, kon aanvul by die geloofwaardigheid van die verhaal. Ek het verdere navorsing gedoen waar nodig. Die film eindig met ’n beeld waarop Sadag (South African Depression and Anxiety Group) se foonnommers op die skerm verskyn – dit gee kykers wat self met sielkundige of emosionele uitdagings sukkel, die geleentheid om uit te reik sou hulle wou. Sadag doen ongelooflike werk. Hulle dienste is gratis.

In die rolprent vertolk jy die rol van Stella, wat aan ’n geestestoestand ly en oorweeg om sy eie lewe te neem. Dit is definitief nie ’n maklike karakter om te vertolk nie. Hoe het jy voorberei vir die rol?

My lewe wás my voorbereiding! Ek het self (touch wood!) nooit op ’n brug gestaan nie, maar ek was al in ’n taai stryd met angs. Ek het verder 14 kg vir die rol verloor om egtheid verder te vestig. Angs het verskillende effekte op mense – onder andere kan dit mense se verhouding met kos verander.

’n Toneel uit die rolprent

Dit is jou eerste vollengte-rolprent wat jy aanpak – hoe was die ervaring vir jou?

Baie spesiaal. Die span was ongelooflik. Daar was ’n strewe na waarheid, menslikheid, respek en eerlikheid op die stel. Dit het gevoel asof almal in elke oomblik belê en glo in wat ons aanpak. Dit was verder besonders om my meisie, Anneke Weidemann (wat die rol van Emma vertolk), uit haar toneelspeel-aftrede te nooi en haar as deel te hê van die film. Sy is ’n mediese dokter en het sewe jaar laas toneel gespeel! Haar laaste toneelspel was in Die Wonderwerker en Die ongelooflike avonture van Hanna Hoekom en ons het die film só skeduleer dat ons al haar tonele in haar doktersverlof kon inpas!

Anneke Weidemann

Wat maak hierdie rolprent anders as ander Suid-Afrikaanse rolprente, en watter boodskap hoop jy om oor te dra met hierdie rolprent?

Daar wás nog nie so iets in Afrikaans nie. Korreksie, daar wás nog nie so iets nie. Dikwels is ’n kamera soos ’n vlieg teen die muur – dit neem waar. In Skemerson is jy as kyker nie soos ’n vlieg op die muur wat inkyk nie. Jy is binne-in die drama. Die nabyskote en atmosferiese musiek sorg vir – soos Elize Cawood (wat Mamma vertolk) dit noem – ’n sensuele ontploffing. Dis asof jy die karakter se polsslag kan voel. Dis nie net ’n storie wat verwyderd voor jou afspeel nie. Dis ’n intieme ervaring. ’n Suiwer menslike belewenis.

Jy het al bekend gemaak dat jy self ’n pad met ’n geestestoestand geloop het. Wat is jou raad vir mense wat ook met ’n geestestoestand worstel?

Ek is geen kenner nie, maar ek kan uit ervaring getuig: eerlikheid voel bevrydend. Praat met iemand wat jy vertrou. En as jy te skaam voel, gaan sien iemand professioneel. As dit nie vir jou finansieel moontlik is nie, kontak Sadag. Jy kan hulle WhatsApp en hulle sal jou terugbel. Gratis. Die slagspreuk van die film is “Dis oukei om nie oukei te wees nie.” Skemerson wil gerusstelling en vertroosting bied. Selfs in donker, onsekere tye is daar altyd en hulp en altyd hoop.

 

........................................

Sadag se nommer:
0800 456 789

........................................

  • Foto's verskaf
  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top