Rosey die Rapper: “Dié is ek en ek wil rap”

  • 0

Rosey die Rapper se enkelsnit “My naam hoor” is pas benoem vir ʼn Ghoema-musiektoekenning in die kategorie beste hip-hop-liedjie van die jaar. Hierdie rapliedjie met sy treffende musiekvideo – geskiet in haar tuisdorp Porterville – stel dié jong rapper bekend met die gutsy punch van ʼn goedgemikte vuishou.

Annie Klopper: Rosey die Rapper is die verhoognaam van die twintigjarige Murensia Block, wat reeds in graad 4 begin liedjies skryf het. Sy vertel sy het toe reeds geweet sy wil rymklets doen, maar “was steeds onder ’n dop”. Vroeër was sy deel van ’n sanggroep genaamd Young Creators, en soos by menige musikant het haar voorliefde vir musiek ontstaan omdat sy grootgeword het met musiek in haar huis: “Dis waar my liefde vir rymklets vandaan kom,” sê sy.

Een kykie na “My naam hoor”, met sy uitdagende lirieke, en dis duidelik sy is nie meer onder daardie sogenaamde dop nie.

Onlangs het Rosey onder die bestuur van Vanguard Music Company gekom, onder leiding van Shameema Williams van die legendariese plaaslike rap-trio Godessa. Teen die draai van die vorige eeu was Godessa se lied “Tippie skale vannie tale” waarskynlik die eerste Afrikaanse hip-hop-lied deur vrouerappers in die populêre ruimte, met ʼn musiekvideo vir hierdie snit spesiaal geskiet vir die destydse televisieprogram Geraas. Nou volg Rosey in die diep voetspore van plaaslike vroulike hip-hop-pioniers soos Williams, EJ von Lyrik en Burni Amansure van Godessa deur haarself met vreeslose lirieke op die hip-hop-toneel te kom vestig. Vanjaar neem sy nuwe musiek op saam met die bekroonde musiekvervaardiger Patrick Hickey, beter bekend as Caramel, eertydse lid van die Kaapse hip-hop-groep Black Noise.

Ek het met Rosey, oftewel Murensia, gesels nadat ek nie anders kon as om met hierdie deurbraaktreffer haar naam te hoor nie:

Rosey die Rapper is jou verhoognaam. Is Rosey en Murensia altyd een en dieselfde persoon, of verskil jou verhoogpersoonlikheid op sommige maniere van dié van Murensia? 

Daar is ’n groot verskil tussen Rosey en Murensia. Murensia is baie stil en teruggetrokke, verkies meestal om in haar eie wêreld te wees. Rosey, aan die ander kant, is grapperig en praat baie en kan enige plek aanpas. My verhoogpersoonlikheid verskil definitief van dié van Murensia.

Jy represent vir Porterville, jou bakermat. Vertel vir my van Porterville ... wat maak jou tuisdorp vir jou uniek en spesiaal?

Ek het sestien jaar lank in Porterville gebly. Nie net is Porterville ’n pragtige dorp nie, maar dis propvol van die talente. As jy in die dorp kom, is jy in; mense sal altyd jou onthou al is jy stil. Wat ek probeer sê, is dat almal ken vir almal.

“My naam hoor” is ’n catchy tune en die video is puik. Met wie het jy gecollaborate om die video te maak en wat wou jy graag met dié song en video oordra?

Die video is geskiet deur Chris Kets en sy span. Ek het Porterville gekies omdat ek ons eie plek se mense wou inspireer. Ek wou hê mense moes sien dat uit so ’n klein dorp kan talent kom. Hierdie video kon enige plek geskiet gewees het, maar ek wou hê mense moet sien van waar ek is. Hierdie song en video is hoe ek my voorstel aan die industrie.

Dit lyk vir my of hip-hop op die Kaapse platteland aan die groei is. Sowel in populariteit as in hoeveel opkomende rappers daar is. Dink jy dit is so? Of weet ons nou net meer van rappers uit kleiner dorpies omdat sosiale media dit makliker maak om musiek en musiekvideo’s te versprei?

Dis definitief besig om te groei, en die mooiste van als is dat die meeste van hierdie kunstenaars op hulle eie werk vir wat hulle wil hê. Sosiale media maak dit definitief makliker, maar ek dink met harde werk kom populariteit.

Ten spyte daarvan dat daar nog altyd in hip-hop sterk vrouerappers is, is die meeste rappers mans. Wat dink jy maak dit vir vroue moeilik om hierdie wêreld te betree? Of dink jy dis ewe maklik vir vrouerappers as vir mans om naam te maak?

Ek dink dis ewe maklik, en ek weet baie gaan nie saam met my stem nie, maar as jy as artist (man óf vrou) die regte span het wat agter jou staan en jy jou beste doen, kan jy vir jouself ’n naam maak. Spesifiek in die Afrikaanse industrie dink ek dat meer vrouens in die toekoms sal vorentoe kom en sê: “Dié is ek en ek wil rap.”

Wie is jou rap-rolmodelle, plaaslik en internasionaal?

My plaaslike rap-rolmodelle is Die Hooflig, Jerome Rex, Isaac Mutant en die hele Broederbond. Internasionaal: Sa-Roc.

Wat is die belangrikste boodskap wat jy wil oordra? Hét jy ’n spesifieke boodskap, en is dit nodig vir ’n rapper om ’n boodskap te hê?

Ek het nie ’n spesifieke boodskap nie, maar vat dit van my af: als gebeur met tyd; wat jy vandag doen mag lyk na niks, maar eendag sal jy self die vrugte pluk van die boom wat jy geplant het. Dit is altyd nodig vir ’n rapper om ’n boodskap te hê, want ons is baie powerful en musiek is een element van kuns wat baie kragtig is.

 

Foto’s: Vincent Rhoode 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top