Persverklaring: Taalmuseum vier Taaldag met gesprek wat prikkel

  • 0

Die Afrikaanse Taalmuseum en -monument (ATM) se gewilde Taaldagviering fokus vanjaar via ’n gratis paneelgesprek op Vrydag 12 Augustus op die beroemde skrywer CJ Langenhoven se berugte bewering dat Afrikaans die enigste “witmenstaal” is wat buite Europa sou ontstaan het.

Ter ere van Vrouemaand is al die deelnemers van dié geleentheid, in samewerking met die Historium Trust en Langenhoven Gedenkfonds, vroue wat deskundiges op uiteenlopende taalgebiede is. Een is boonop ’n agterkleinkind van Langenhoven, wat 90 jaar gelede die tydelike met die ewige verwissel het. Die ATM-raadsvoorsitter en literatuurkenner Jean Meiring sal as fasiliteerder dien vir die gesprek tussen Willemien Brümmer, Anastasia de Vries, Jo-Mari Anne Nel en Eureka Barnard wat die vergrootglas op Afrikaans se wortels en die afgelope eeu se taalverwikkelinge en -politiek sal rig. Gaste sal daarna vrae aan die paneellede kan stel.

Brümmer is ’n bekroonde skrywer en joernalis wat ook al heelwat navorsing oor haar oupagrootjie gedoen het. De Vries is ’n bekende joernalis, rubriekskrywer en lektor wat gereeld oor die versweë geskiedenisse van Afrikaans skryf. Nel is ’n parlementêre taalpraktisyn wie se kortverhaalbundel, Stof, vanjaar gepubliseer is. Barnard is ’n museum- en taalkenner, en die direkteur van die Suid-Afrikaanse Sentrum vir Nederland en Vlaandere (SASNEV).

Hoewel Afrikaans nie ’n spesifiek geboortedag of -plek het nie, word die stigting van die Genootskap van Regte Afrikaners op 14 Augustus 1875 (in wat nou die Taalmuseum in die Paarl is) as Taaldag gevier omdat hierdie gebeurtenis uiteindelik tot die erkenning van Afrikaans as ’n amptelike taal gelei het.

Die geleentheid begin om 18:00 vir 18:30 in die Historiumgebou, Pastorielaan 11, Paarl, en verversings sal bedien word. Bywoning is gratis, maar besprekings via bemarking2@taalmuseum.co.za of (021) 863 0543 teen 11 Augustus is noodsaaklik. Die hele gesprek sal opgeneem en later aanlyn beskikbaar gestel word, terwyl Nel se boek ook by die geleentheid te koop aangebied sal word. ’n Interessante agtergrondartikel oor die onderwerp kan hier gelees word:

Afrikaans: Waarheid en versoening onder een DAK

Vir meer inligting oor al die ander opwindende geleenthede, konserte en kursusse by die Taalmonument en Taalmuseum, skakel 021 872 3441/863 0543, besoek www.taalmonument.co.za of volg hulle op Facebook. Die webtuiste bied boonop virtuele toere van die monument en museum, inligting in ses tale oor die simboliek van die Taalmonument asook baie interessante artikels oor Afrikaans, veeltaligheid en die instelling se verlede, hede en toekoms. Daar is voorts heelwat bronne vir skool- en navorsingsprojekte. Jaarpermitte kos slegs R120 vir individue of R220 per gesin, wat toegang tot alle Volmaanpieknieks insluit. Die ATM Koffiehuis bied daagliks heerlike kos en pragtige vergesigte.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top