Persverklaring: 2022 Hessequa Harmonie

  • 0
Vyfde Hessequa Harmonie gaan luisterryke fees van kuns en musiek wees

Die vyfde verjaardag van Hessequa Harmonie gaan van 20 tot 24 September luisterryk gevier word met ’n uitsonderlike program wat in Heidelberg in die Suid-Kaap aangebied word.

Rondom Erfenisdag is die perfekte tyd om die pad na die platteland te vat vir ’n keur van klassieke musiekkonserte, boekbesprekings, kunsuitstallings, dramaproduksies, ligte musiek en leefstylaanbiedinge wat iets vir die hele gesin bied. 

Vir musiekliefhebbers is daar onder andere optredes deur die Kaapse Filharmoniese Jeugorkes onder leiding van dirigent Brandon Phillips by die ATKV-galakonsert, Coenie de Villiers wat agter die klavier inskuif om van sy ou en nuutste komposisies te sing en ’n piekniekkonsert met Pietman Geldenhuys en Schalk Joubert om na uit te sien.

Elsabé Daneel gaan weer soggens die gewilde Boekebrekfis in die historiese Fouriehuis aanbied waar sy met skrywers soos Jan van Tonder, Erns Grundling en Hessequa-boorling, Helena Gunter gesels. Gaste kan hulle ook verlustig in kosstories van die glanskokke Herman Lensing en Yolani Abrahams by VIA Kook en Klassiek

“Ek is geweldig opgewonde daaroor dat ons weer vanjaar kuns uit die boonste rakke saam met die pragtige Hessequa-streek ten toon kan stel en ons is baie dankbaar vir die ongelooflike ondersteuning van die plaaslike gemeenskap, die munisipaliteit, borge en feesvriende wat dit vir ons moontlik maak om hierdie fees vir die vyfde agtereenvolgende jaar aan te bied,” het die uitvoerende hoof, Niël Rademan, gesê.

Hessequa Harmonie word aangebied met die ondersteuning van die Rupert Musiekstigting, VIA, Business and Arts South Africa (BASA), die Wes-Kaapse Departement van Kultuursake en Sport, Hessequa Munisipaliteit Explorer, die LW Hiemstra Trust, die Nasionale Afrikaanse Teater-inisiatief (NATI), die Johann Brink Trust, WESGRO, Van Loveren, die ATKV, die Kaapse Filharmoniese Jeugorkes, BVSA, Eureka Mills, Riversdal Toyota en Carmién tee.  

Kaartjies kan aanlyn bespreek word by plankton.mobi of kontant gekoop word by Karee Tree Designs in Heidelberg.

Besoek hessequaharmonie.co.za vir meer inligting en die volle program.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top