Persverklaring: Oktober 2020 by die Bôrdienghuis

  • 0

Somer laat nie op haar wag nie en ons is reg om in te val by die Plan Van Aksie.

Donderdag, 8 Oktober, hou ons boekpartytjie. Die dokter-skilder-digter, Piérre Botes se debuut-digbundel, Vertrek, het sopas verskyn en hy en dokter Amanda Swart sal ons siele verryk met hulle gesprek wat om 19h00 plaasvind. Deure maak reeds om 16h30 oop vir pizzas en wyn. Toegang is R30. Digbundels kos R150 en kan by dié geleentheid gekoop word.

9 Oktober se vertoning vir Valiant Swart is uitverkoop, maar dié wat hom gemis het vir Vrydagaand kry weer ’n kans om met Rocktober seker te maak hulle vang hom vir ’n live show. Dit is uiteindelik tyd om die someraandlug in te vaar met ’n glas wyn in die een hand, ’n sny pizza in die ander en rock & roll vir sielskos.

Die line-up vir 10 Oktober lyk só:

  •  Kom val so 15h30 in by die Bôrdienghuis in Wellington en bestel solank alles wat jou hart begeer.
  • 16h30 skop Jackson Hyde and the Jeffrey’s Witnesses die aand af met ’n elektrise kitaar en ’n rocker-stem wat vir niemand terugstaan nie.
  • 18h00 bring Valiant sy alombekende gees na die verhoog toe.
  • 19h00 kan almal regskuif in hul stoele vir Die Van Der Mentals.
  • Kaartjies is R120 pp. Ons almal het ’n bietjie van ’n rocker in ons wat wag om vrygelaat te word 🎸
15 Oktober kom vermaak Deon Meiring ons. Na afloop van hierdie naweek se sukses waar hy saam met Koos Kombuis grense verskuif het, kan ons met oortuiging sê dat díe vertoning iets gaan wees om oor huis toe te skryf. Kaartjiekoste beloop R130 pp.

16 Oktober klim Pierre van Schalkwyk op die verhoog. Hierdie sanger, akteur en regisseur se groot doel is om die gehoor te inspireer. Sy album "Studentejare" word ook vanjaar vrygestel. Vir beide 15 en 16 Oktober maak die deure 17h00 oop vir lippe natmaak en die vertonings begin 19h00. Kaartjiekoste vir 16 Oktober is R100. 

17 Oktober open die Suidooster-fees in samewerking met die Breytenbach Sentrum. Bywoning geskied voorlopig op uitnodiging.

30 Oktober sluit ons die maand op ’n hoogtepunt af met die een, die enigste: Bottomless Coffee. "Husband & Wife Multi-Instrumentalist Folk Rock Duo, Lourens and Esté Rabé making songs about life, love, blues and breakfast."
Die vertoning begin 19h00, maar soos altyd; val 17h00 in om die atmosfeer van die Bôrdienghuis en die fabelagtigheid van die Tuin van Digters te geniet.

Ongelukkig word geen toegang sonder ’n bespreking toegelaat nie. Alle besprekings kan per whatsapp by Alma Nel gemaak word, op 082 964 9352. Jou plek is bespreek as Alma die hoeveelheid kaartjies bevestig het.

Maak hierdie Oktober onvergeetlik! Kom sondaars, kom!

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top