Nuwe stemme 6 – 6 vrae vir Elodi Troskie

  • 2

Nuwe stemme 6 het pas by Tafelberg verskyn. Bibi Slippers en Charl-Pierre Naudé is die samestellers van dié bundel, ’n versameling van die beste verse van Afrikaans se opkomende digters.

Liné Enslin gesels met die gepubliseerde digters. Lees hier die ander onderhoude.


 

Elodi Troskie

 

1. Beskryf jouself in ses woorde.

Ek benodig meer as ses woorde.

2. Noem ses dinge waarsonder jy nie kan leef nie.

Buffelsbaai. Sondae. Geel truie. Instagram-stories oor katte. Koffiewinkels. Reën.

(In ’n perfekte wêreld is elke dag Sondag in ’n koffiewinkel in Buffelsbaai terwyl dit reën en ek ’n geel trui aan het terwyl ek na foto’s van vreemdelinge se katte kyk.)

3. Wat is die vreemdste plek of medium waarop of waarmee jy al ooit ’n gedig geskryf het?

Ek het eenkeer ’n gedig agterop die boekmerk in my biblioteekboek geskryf. Ek het vergeet om dit uit te neem, en ek kan nie onthou watter boek dit was nie, en ek weet ook nie meer wat ek geskryf het nie. So êrens in Stellenbosch se biblioteek het ek ’n anonieme gedig begrawe.

4. Hoe lyk jou werkruimte?

Donker en deurmekaar. Donker, omdat ek gewoonlik eers saans aan die werk begin kom. En deurmekaar, omdat ek daarvan hou om boeke en papiere en skryfgoed om my te sien rondlê. Enigiets wat die illusie van produktiwiteit skep. Partykeer is daar wyn. Meestal tee. Altyd plante en ’n playlist met die naam “Middagslapie”.

5. Wie is jou gunstelingskrywer of -digter?

Baie voorspelbaar, maar my gunsteling is altyd wat ek mees onlangs gelees het. So vandag is dit Rupi Kaur. Môre is dit waarskynlik Antjie Krog omdat ek Change of Tongue vir ’n Engelse klas moet lees. (Hoewel sy in elk geval ’n deurlopende queen in my lewe is.)

6. Vertel asseblief bietjie meer omtrent een van jou gedigte wat in Nuwe stemme 6 opgeneem is.

Ek vertel sommer van die eerste een, “Groot Verseboek”. Ek het altyd na my ouers se grootwordstories geluister. Ek wou graag daaroor skryf en het probeer om die twee narratiewe inmekaar te vleg.

My pa is ’n paar jaar gelede oorlede en ná sy dood het ek ’n kopie van Groot verseboek in ’n boekrak by die huis gevind. Na ek dit vir twee, drie jaar gelees het, het ek die (baie verweerde) omslag afgehaal en my pa se naam in die binneblad gevind. Dit was baie spesiaal en het my nog nader aan hom laat voel om iets met hom te deel wat nou so ’n groot deel van mý lewe is.

In die gedig wou ek ook wys hoe gedigte (en kuns oor die algemeen) nie net vir ’n uitgesoekte groep mense beskore is nie. Dit behoort aan almal.

Luister hier na opnames van Elodi se gedigte.

  • 2

Kommentaar

  • Francois Williams

    Elodie, het 'n Franse-Chinese meisie geken eens, sy was besig met my beste vriend Eliot van Boston op daai stadium; sy het Franse wyn bemark in China ... mooi naam ... sy was ook oulik.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top