Nuwe stemme 6 – 6 vrae vir Annami Mailovich

  • 2

Nuwe stemme 6 het pas by Tafelberg verskyn. Bibi Slippers en Charl-Pierre Naudé is die samestellers van dié bundel, ’n versameling van die beste verse van Afrikaans se opkomende digters.

Liné Enslin gesels met die gepubliseerde digters. Lees hier die ander onderhoude.


 

Annami Mailovich

 

1. Beskryf jouself in ses woorde.

Baldadig. Gelukkig. Spons. Trampolien. Dromer. Reisiger.

2. Noem ses dinge waarsonder jy nie kan leef nie.

Reis. Kos. Wyn/koffie (ek sal een kan los, maar nie albei nie). Boeke (dit, my kar en my ouma se eetstel is letterlik al wat ek nog besit). Gesels. See.

3. Wat is die vreemdste plek of medium waarop of waarmee jy al ooit ’n gedig geskryf het?

Ek skryf maar altyd waar ek ’n stukkie tyd vir myself het. Dit gebeur gewoonlik op iets soos my foon/tablet, êrens waar dit donker is en ek my nie verkyk aan iets nie. Dit is gewoonlik nogal ’n “debrief” van dit waaraan ek my verkyk het. Maar ek is altyd op my eie – wat seker maar my gewoonte om met myself te praat, beaam. En gewoonlik toets ek dit uit op my sussie Claudi Mailovich wat in Johannesburg woon en ook dig – sommer vir die lekker, nes ek. Ons kan ure gedigte in ellelange WhatsApp-gesprekke uitruil. As ek skryf, trek sy gewoonlik ook los – of andersom.

Hier het ek al so geskryf op my eie: https://www.instagram.com/p/BQD6apxBRqQ/

4. Hoe lyk jou werkruimte?

By die werk ’n stasie in ’n oopplankantoor met tydskrifte en koffiebekers wat oral staan – ek is die deurmekaar een op kantoor – met ’n tweede skerm vir my skootrekenaar. Ek skryf gewoonlik op die naat van my rug, op my foon, laatnag in die bed terwyl die Suidooster Tafelberg ’n go gee. Of op my gespikkelde mat tussen my boeke, met my petit seeuitsig. Dit is die eerste ronde. Die herskryfproses gebeur gewoonlik in ’n koffiewinkel – verkieslik een waar die musiek lekker is, en die see in sig. Die kelners in Kampsbaai, waar ek woon, ken al my geite en voorkeure. ’n Swart Americano en ’n glas water met ys staan reg nog voor ek bestel.

My sitkamer: https://www.instagram.com/p/BI0JYTTh4Ev/

5. Wie is jou gunstelingskrywer of -digter?

George Weideman, sommer net, want ek is mal oor sy gedigte, en Philip de Vos vir sy speelse versies – en die feit dat hy homself nie te ernstig opneem nie, al is hy ontsettend goed. In prosaland is Khaled Hosseini en sy Afghaanssentriese stories los voor op my leeslys. Dis eenvoudig en sy stories se eerlike verteltrant, sonder frille, raak derduisende mense en dit is die droom.

6. Vertel asseblief bietjie meer omtrent een van jou gedigte wat in Nuwe stemme 6 opgeneem is.

My gedig “die familie skryf” is gebaseer op dieselfde sentiment as in George Weideman se “Blommekykers”. Ek het as kind male sonder tal “Blommekykers” voorgedra en het in die herskryfproses van my gedigte geheel en al van gedaante laat verwissel. Aanvanklik was dit ’n ongeïnspireerde, flou ars poëtikale gedig. Uit radeloosheid het ek Claudi gebel en gekerm hoe dit net nie wil werk nie – want nie een van die samestellers was vreeslik opgewonde daaroor nie, en ek wou hulle verkeerd bewys. Dit was ’n toonbeeld van ’n gedig wat doodeenvoudig nie wou vorm aanneem nie, nie eiesoortig genoeg was nie en eers ná ’n lang sosiopolitiese telefoongesprek lewe gekry het en eindelik opgeneem is.

’n Gedig is indrukke, stories en gesprek. Soms is dit gesprekke tussen vriende, familie en die kanon, ander dae is dit jou brein wat prentjies uitspoeg.

“op die suiderlyn” is ’n voorbeeld van ’n toneel wat ek net eenvoudig moes vasvang – en ook honderd present gegrond op die werklikheid, ’n daguitstappie op die trein na Simonstad en terug.

Op die trein: https://www.instagram.com/p/BMMSvtChSW9/

Kyk hier na video's waarin Annami van haar gedigte voorlees.

  • 2

Kommentaar

  • Claudine Grant

    Dankie vir die skrefie waardeur ek na dié digter kon kyk. Betekenisvolle vrae en antwoorde. Soveel gevoel in die voorlesing, veral van "die familie skryf!" Baie mooi.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top