Long shot: ’n resensie

  • 0

Draaiboek: Dan Sterling en Liz Hannah
Regie: Jonathan Levine
Akteurs: Charlize Theron, Seth Rogen, O’Shea Jackson Jr, June Diane Raphael, Bob Odenkirk, Alexander Skarsgard, Lisa Kudrow

Wat Pretty woman in 1990 gedoen het, doen Long shot in 2019, maar getrou aan die tydsgees is die geslagte omgeruil. Dat die filmmakers weet dis ’n waagstuk, blyk reeds uit die titel, maar die verrassende is dat hulle dit sowaar regkry.

Charlotte Field (Charlize Theron), die Amerikaanse minister van buitelandse sake, sien ’n gaping om president te word, maar sy kort ’n goeie toespraakskrywer. Gelukkig is die knap joernalis Fred Flarsky (Seth Rogen) pas afgedank en kry hy die pos. Want sien, daar is ’n bietjie geskiedenis tussen hulle: Toe hy twaalf was, was sy die ambisieuse buurmeisie wat hom soms moes oppas, en hy was natuurlik doodverlief op haar. Dus ken hy haar van vóór sy haar in die haaitenk van die politiek, gevul met magtige ou wit mans, begeef het. Die grootste probleem? He doesn’t look the part in her world.

Hierdie fliek is so woke as kan kom. Dit tiek elke blokkie van wat nóú belangrik is: die omgewingskrisis, vroue in magsposisies, die korrupsie van geldmagnate, rassisme en selfs ’n bietjie godsdiensvooroordeel. En absoluut gepas berus die ontknoping op die mag van internetkommunikasie en sosiale media.

Vir ’n onpaar paar is daar seker nie ’n beter keuse as Charlize Theron en Seth Rogen nie. Rogen is Rogen is Rogen, maar Theron wys net weer dat sy waaragtig ’n goeie aktrise is.

Waarskuwing: Die humor en taalgebruik is hardebaard, maar daar was só lanklaas ’n kykbare romantiese komedie op ons kringloop dat ek hierdie een beslis aanbeveel.

Sterre: 4

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top