Dit verskaf LitNet groot plesier om die wenners van ons Skole-skryfkompetisie saam met Fanie Viljoen aan te kondig. Die wenners in die onderskeie kategorieë is:
Graad 8–9
Mirali Hoekstra – My genesing
Graad 10–12
Cate-Lynn de Jager – Groepsdruk
Klik op die titels van die wenverhale om dit te lees.
Fanie Viljoen lewer so kommentaar in sy beoordelaarsverslag:
LitNet se Skole-skryfkompetisie het wonderlike skryfwerk opgelewer. Al die jong skrywers kan voorwaar trots wees op hul werk. Die verhale is met deernis geskryf en die temas het baie gewissel. Vreemd genoeg handel albei die weninskrywings oor skoolboelies.
Op versoek van LitNet het ek het albei die wenverhale geredigeer. Sommige sinne het ek behou of ek het dit rondgeskuif. Hier en daar het ek ook sinne uitgelaat, ander sinne bygevoeg en meer. Albei verhale se karakters het nou ook name gekry. “Groepsdruk” het ’n goeie einde, maar om te illustreer hoe verhale ’n heel ander wending kan neem, het ek die einde verander om te wys hoe ’n skrywer met verskillende idees kan speel.
In Mirali Hoekstra se “My genesing” staan ’n meisie op teen matrieks wat reken graad 8’s hoort nie op die skoolbus nie. Hulle treiter daagliks die leerders, maar uiteindelik staan die hoofkarakter op teen die boelies. Haar woede is soos ’n oseaan. Dit word sterker wanneer sy haar stem vind en uiteindelik ander leerders inspireer om dieselfde te doen.
Met behulp van magiese realisme gebruik die skrywer die oseaan en water as ’n treffende sentrale simbool. In so ’n kort stukkie skryfwerk moet die skrywer egter versigtig wees om nie metafore te meng nie. Die sin “’n Kryslag sirkel soos ’n roofvoël om my” wyk af van die sentrale watermetafoor, maar met ’n bietjie kreatiwiteit kan dit maklik reggestel word. Mirali se verhaal toon juis dat sy baie kreatief is. Dis onder andere duidelik in haar gebruik van dialoog. Hierdie element is natuurlik en help met karakterisering van die hoofkarakter en die boelies. Naamgewing sou ook verder kon gehelp het sodat die lesers die verskillende matrieks en hul dialoog kon onderskei.
Andersins is dit ’n knap verhaal en ’n waardige wenner van die prys.
Cate-Lynn de Jager se “Groepsdruk” raak ’n moeilike onderwerp aan. ’n Oorgewig meisie word die teiken van skoolboelies. Die hoofkarakter moet haar ’n string lelike name gaan noem om deel van sy vriendegroep te bly. Sal hy egter voor die groepsdruk swig?
Dialoog sou die verhaal ’n stewige hupstoot kon gegee het. Selfs net kort brokkies dialoog lig ’n opstel of skryfstuk bo die res. Dit word die enjin van ’n verhaal. Lesers wil graag die karakters hoor praat. Gee ook vir een of twee karakters name – wie is byvoorbeeld die ou wat uitgedaag word? Wie is die vriende en wie is die meisie?
Ek het gehou van die hoofkarakter se gewetenswroeging. Uiteindelik swig hy tydelik voor die groepsdruk, maar in twee goeie slotsinne besef hy die omvang van sy dade. Dis ongelukkig nou te laat. Niks wat hy sê, sal die skade ongedaan maak nie. Hierdie verhaal sal lesers aan die dink sit en kan lei tot ’n lewendige klasbespreking.
Die wenners ontvang elk R3 000 en boekpakkies van Penguin Random House SA.
Die kompetisie word moontlik gemaak deur die ondersteuning van die Hiemstra Trust.
