Bombshell
Draaiboek: Charles Randolph
Regie: Jay Roach
Akteurs: Charlize Theron, Nicole Kidman, Margot Robbie, John Lithgow, Kate McKinnon
Ek wonder hoeveel vroue het nog nooit in die werkplek een of ander vorm van seksuele teistering ervaar nie. My raaiskoot sou wees baie min. Des te meer is dit dus tyd dat vroue opstaan en uitpraat daaroor, maar hoe gemaak as jy weet dit gaan jou jou werk kos?
Hierdie film is ’n dramatisering van die opspraakwekkende aanklag teen Robert Ailes (gespeel deur John Lithgow), stigter en bestuurder van Fox News. Die fokus is op drie vroue: Megyn Kelly (Charlize Theron), Gretchen Carlson (Nicole Kidman) en Kayla Pospisil (Margot Robbie) – al drie blond en beeldskoon, en al drie slagoffers van Ailes se seksuele attensies. As een van die voorste nuusankers is Kelly op die kruin van haar loopbaan, terwyl Carlson ’n paar jaar tevore gedemoveer is ná ’n uitval met Ailes. Pospisil, ’n saamgestelde karakter, is ’n jong vervaardiger met die brandende ambisie om ook “on television” te wees.
Wanneer Carlson deur Ailes afgedank word, het sy niks meer om te verloor nie en dagvaar sy hom vir seksuele teistering. Die sukses van haar saak sal egter daarvan afhang of ander vroue ook na vore kom om te getuig. Kelly is onwillig om betrokke te raak, want ná die groot Republikeinse TV-debat van 2016 het sy nie net onder Donald Trump se onsmaaklike twiets deurgeloop nie, sy is ook deur gewone Fox-kykers aangeval en beledig.
Charlize Theron se Oscar-benoeming vir beste aktrise is geen verrassing nie, maar ek sit my geld op Margot Robbie, wat benoem is as beste ondersteunende aktrise – haar spel is werklik uitstaande.
Bombshell word aanbeveel vir álle fliekkykers, vroue sowel as mans.
Sterre: 4
Kyk die lokprent hier:
Lees ook: