Litnet

Van kleintyd af het my pa my broers geleer: ’n vrou hanteer jy met respek. My pa het ook nooit sy hand vir my ma gelig nie – hy het geweet dat hy haar daardeur sou verloor. In sy gemoed asook priesterskap.

’n Ware man sal sy vrou so hanteer dat sy haar beeld, wat “na Sy Beeld” geskape is, met onuitblusbare vreugde en vrede sal uitleef. Volledig mens – volledig vrou.

Ek hou van die woord “EIE” wat duidelik in die ou vertaling van die bybel uitstaan: “So behoort die mans hul EIE vroue lief te hê soos hul eie liggame. Wie sy EIE vrou liefhet, het homself lief.” Ef 5:22. Die man se hoogste verantwoordelikheid is dus om sy EIE vrou lief te hê (nie baie ander nie). Want hierdie liefde sal sy huweliksboot rig.

Meneer, jy hanteer ook elke vrou – klein of groot, wit of swart, ekstroverties of introverties – met respek. Nie omdat syself respek kan afdwing nie, maar omdat jy glo dat die beeld van God in haar vroulikheid herstel is om eg vrou te word.

Die vrou is nie ’n besitting of ’n slaaf nie. Wanneer ’n man sy vrou met wysheid en omgee hanteer, verontmenslik of verneder haar onderdanigheid of respek vir sy emosies en oordeel haar nie. Die vrou wat koesterend en met opregte ware romanse hanteer word, weet waar is haar plek of posisie in die huis. Want sy sit teenaan haar man se hart, onder sy arm, daar waar hy sy ribbebeen aan haar geskenk het. Dis haar plek.

Kyk bietjie na die foto hierbo - hoe sou dit gelyk het as die vrou die hoof in hierdie toneel was? Soos Jakobus dit uitdruk: “wanorde”. God het die orde van die huwelik vooraf bepaal. Ef 5 praat daaroor dat: God die Vader is die hoof van Christus, Christus is die hoof van die huisgesin (kerk), so moet die man die hoof van die vrou wees, die vrou is weer hoof van haar huishouding, dan kom die kinders, die bediendes, die kat en hond en laaste die potplante en vriendinne. Haar man kom dus eerste. Alles in orde en onder beheer.  

’n Vrou wat deur haar man gekoester word, sal nie die broek in die huis wil dra nie, sy sal nie die man wil oorheers of beheer nie, want God het bedoel dat die vrou die man se minnares sal wees, sy regterhand, sy bekleër in elke storm wat hul huweliksverbond mag ruk of pluk.

Voor God is man en vrou GELYK in waarde. Wat rolle en verantwoordelikheid betref is die man die leier, priester en profeet. Die een wat die familie moet beskerm, bewaak en onderhou. Meneer, staan in jou plek en posisie met waardigheid. Dis waar jy hoort.

Laaste ding Meneer, jou vrou is ook nie ’n besitting om jou ego te streel of selfsugtige drange te bevredig nie. Sy is ’n geskenk vanaf God aan jou. Om op te pas as iets wat nie ’n merk of skraap moet opdoen nie. So ’n Geskenk wat gereeld opge-polish word, sal die glans van jou huwelik uitstraal na buite, vir jou vriende en familie om te waardeer en begeer.

Die opdrag van: EIE vrou lief wees (Ef 5:22), sê dat liefde alleen die man se optrede bepaal. Enige aanslag buite hierdie raamwerk van liefde, is mishandeling. Liefdelose of afilantropiese optredes is verkragting van die vrou se regte op erkenning.

’n Vrou wat met erkenning, respekte en liefde behandel word deur haar man voor haar kinders, sal met liefde haar “man se voete was” (soos Henn dit noem), elke dag. Sy sal met waardigheid haar plek in die huwelik inneem volgens bybelse norme aan haar voorgehou. 

En O-ja meneer, moenie die maandelikse rooi rose vergeet met haar liefling-sjokolade daarby nie. Ek het hierdie vers met ’n pen in my bybel bygeskryf!

Meneer, geniet jou EIE vrou.

Trienie Mahne