Bekroonde Libertaskoor hou aanlyn vertoning ten bate van liefdadigheid

  • 0

Die bekroonde Libertaskoor (Foto: Mark Cloete Photography)

Sluit aan by die bekroonde Libertaskoor op Saterdag 11 Julie om 19:00 vir ’n virtuele aanlyn vertoning, gelei deur seremoniemeester Gillian Arendse. Die koor beplan om ’n verskeidenheid ikoniese Suid-Afrikaanse liedjies te sing, en daar is ook solisuitvoerings om die gehoor te betower. Instrumentale begeleiding word aangebied deur Gerhard Niemand op die klavier, die Ramon Alexander Trio, en Zorada Temmingh op die orrel.

Die vertoning sal tot 18 Julie beskikbaar wees om te kyk.

Die konsert word aangebied deur Visit Stellenbosch as die eerste aanbieding in die konsertreeks Stellenbosch On Stage, waarvan alle inkomste ten bate is van Stellenbosch Unite se welsynspogings ten opsigte van kwesbare gemeenskappe gedurende die COVID-19-pandemie.

Johan de Villiers, wat sedert die stigting van die koor in 1989 die dirigent van die koor is, vertel meer oor hul eerste aanlyn vertoning.

Johan de Villiers (Foto: Mark Cloete Photography)

Vertel asseblief meer oor die Libertas-koor se opkomende aanlyn konsert – wat maak jou opgewonde daaroor?

Die COVID-19-pandemie is ’n geweldige nekslag vir kore, aangesien repetisies en konserte voor gehore tans buite die kwessie is. Die Libertas-koor se opkomende aanlyn konsert is dus vir ons ’n fantastiese geleentheid om steeds aktief en relevant te bly.

Wat beplan jul vir die optrede? Watter liedjies gaan die koor sing?

Ons program is kontemporêr en gevarieerd, met ’n sterk fokus op ons land en die uitdagende tye wat ons nou beleef. Koorverwerkings van musiek deur ons eie ikone soos Laurika Rauch, Amanda Strydom, Ibrahim Khalil Shihab, Miriam Makeba en Dan Heymann word afgewissel met ’n tradisionele Zoeloe-gebed, asook ’n verskeidenheid van immergroen internasionale treffers, tesame met ’n toonsetting van Nelson Mandela se aangrypende “Let there be justice for all”-toespraak deur die eietydse Walliese komponis Karl Jenkins. Die Libertas-koor se talentvolle soliste tree gereeld op die voorgrond, en die begeleiding word verskaf deur Gerhard Niemand op klavier, sowel as die Ramon Alexander Trio.

Die Libertaskoor by ’n optrede in 2019 (Foto: André Engelbrecht)

Dit is die eerste keer dat julle ’n aanlyn konsert aanpak, reg? Wat is die uitdagings hiervan vir julle?

Hierdie is inderdaad ons eerste aanlyn konsert, met al die gepaardgaande unieke uitdagings daarvan. Die opnames is ’n mengsel van aparte video’s deur my as dirigent asook elke koorlid aan huis, tesame met sommige van die soliste se bydraes waarvoor daar ’n spesiale sessie gehou is. Ons is bevoorreg om ’n videoredigeerder van die kaliber van Gys Loubser te hê, terwyl die klankaspekte ten beste versorg word in die bekwame hande van Heinrich Frans. Om alles sinvol te integreer in ’n musikale produksie wat visueel sowel as klankgewys bevredig, was ’n opwindende spanpoging vir ons in die Libertas-koor en ons hoogs gewaardeerde tegniese deskundiges.

Is dit vreemd om te dink dat daar nie “fisies” ’n gehoor gaan wees vir hierdie optrede nie?

’n Virtuele gehoor in plaas van ’n fisiese een is beslis ’n nuwigheid vir ons, maar ons gaan vir seker deur die skerm probeer dring om dieselfde soort kontak met ons gehoor te bewerkstellig!

Die Libertaskoor by vanjaar se Toyota US Woordfees (Foto: Mark Cloete Photography)

Die Libertaskoor by vanjaar se Toyota US Woordfees (Foto: Mark Cloete Photography)

Die konsert is ten bate van liefdadigheid, reg?

Ja, absoluut! Die konsert word aangebied deur Visit Stellenbosch as die eerste aanbieding in die konsertreeks Stellenbosch On Stage, waarvan alle inkomste ten bate is van Stellenbosch Unite se welsynspogings ten opsigte van kwesbare gemeenskappe gedurende die pandemie.


Kaartjies vir die konsert is slegs R100 en nou beskikbaar via Computicket, met die opsie om ’n #Support Stellenbosch Wine Box ook te koop.

Dié wynboks bestaan uit ses uitgesoekte bottels wyn en is in drie opsies beskikbaar: eksklusief witwyn teen R670/boks, eksklusief rooi teen R770/boks en gemengde bokse teen R720 elk. Bokse word gepak met ’n niespesifieke samestelling van ’n wye reeks van die streek se top produsente.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top