Litnet

Melanie Grobler is in Warmbad (Bela-Bela) gebore en het in Rustenbrug, Transvaal, grootgeword. Sy het aan die Universiteit van Pretoria gestudeer: BA in Sielkunde en Filosofie, en sy het ook in 2002 ’n graad as doktor in Kunsgeskiedenis voltooi, met haar doktorale tesis “Against fixity: A hybrid reading of Breyten Bretenbach’s art, poetry, writing, aesthetics and philosophy”. Sy was sedert 1980 betrokke as kurator, asook by slypskole vir voornemende skrywers en prosesfasilitering by die Hlumelo Teater, waarvan sy medestigter was. Sy het verskeie kulturele projekte by die Instituut van Voortgesette Onderwys, Unisa, asook die Kultuurburo van die Universiteit van Pretoria aangebied. Sy het vir vyf jaar onderrig ontvang by die Art Studio in Pretoria en het gedurende 1982-2002 aan twaalf groepuitstallings deelgeneem. Haar figuratiewe werk beeld die emotiewe kwaliteite van die enkele beeld uit. Tussen 1992 en 2000 is haar kortverhale in ses versamelings gepubliseer en haar digkuns in sewe. Haar debuutbundel, Tye en swye in die lewe van Hester H, is met die Rapportprys bekroon. Dié digbundel was ook op die kortlys vir die CNA-prys. Die Waterbreker is in 2003 gepubliseer.

Melanie Grobler is getroud met ’n prokureur en het drie kinders en een kleinkind.

Opgedateer/Updated: 2011-02-24

Bio-inligting verouderd? Stuur 'n e-pos aan bio@litnet.co.za
Bio info dated? Send an e-mail to bio@litnet.co.za