Litnet

Dean Balie is in 1989 op Springbok gebore. Sy ouers het vroeg besef dat hy bietjie anders is en het besluit om te werk sodat hy eendag kon gaan studeer.

Hy het in 2010 ’n graad in drama aan die Universiteit Stellenbosch behaal. In sy derde jaar was hy lid van ’n groep studente wat in Nederland aan die Big 5 Festival deelgeneem het. Daarna het hy en sy boesemtjommie, Marlo Minnaar, Kaap toe getrek om die vryskutwêreld as akteurs aan te vat. Hulle was toe reeds professioneel betrokke by die feesproduksie, Die kortstondige raklewe van Anastasia W deur Marlene van Niekerk.

In 2012 het Dean die rol van die jong Kat Diamond in David Kramer en Taliep Petersen se Kat and the Kings gespeel. Hy het ’n Fleur du Cap ontvang vir beste akteur in ’n musiekblyspel. Ander werk met David Kramer en die Fugard-teater sluit in: Bloodbrothers I, Orpheus in Africa en Happy New Year.

Dean was ook in Hamlet, waarin hy beide Horatio en Polonius gespeel het. Die produksie het getoer na Romenië (The International Shakespeare Festival) en Provincetown in die VSA (The Tennesee Williams Festival).

Ander teaterwerk sluit in Vlooi, Die fliek, Babbelagtig, Robin Hood, Sinbad, Slegs vir almal, Shakespeare in Love, !Khagan, Bidsprinkaan en Die Poet, wie’s hy? Dean het in 2021 ’n Sinjatuur-toekenning by die Fiëstas ontvang vir sy bydrae tot die uitvoerende kunste.

TV- en rolprentproduksies waarin Dean verskyn het: Die Byl, Ekstra Medium, Christmas Chorus, Die Poet, wie’s hy?, Babbelagtig, Motel, Bergie, Nêrens, Noord-Kaap en Arendsvlei.